ភ្នំពេញ៖ យុវជនម្នាក់បានស្លាប់និងម្នាក់ទៀតរបួសធ្ងន់ខណៈទើបតែចេញពីផឹកស៊ីុនៅកោះពេជ្រហើយបានជិះម៉ូតូឌុបគ្នាក្នុងល្បឿនលឿនបានចាប់ហ្វ្រាំងម៉ូតូទាំងបង្ខំបណ្ដាលឲ្យដួល កាលពីវេលាម៉ោង១២យប់រំលងអធ្រាត្រឈានចូលថ្ងៃទី១៦ ខែមករា ឆ្នាំ២០១៧ នៅទុលមុខនិងបុរីចំការមន ផ្លូវព្រះនរោត្ដម សង្កាត់ទន្លេបាសាក់ ខណ្ឌចំការមន រាជធានីភ្នំពេញ។

សពជនរងគ្រោះមានឈ្មោះ ដន់ ភេទប្រុស អាយុ១៩ឆ្នាំ មុខរបរសិស្ស ស្នាក់នៅភូមិទួលរកា សង្កាត់ចាក់អង្រែក្រោម ខណ្ឌមានជ័យ ។ចំណែកជនរងគ្រោះម្នាក់ទៀតឈ្មោះនួន អ៊ូប៉ៃ ភេទប្រុស អាយុ១៩ឆ្នាំ មុខរបរកម្មករ ស្នាក់នៅផ្ទះ១៧៥៣ ផ្លូវជាតិលេខ២ ភូមិព្រែកតាឡុង សង្កាត់ចាក់អង្រែក្រោម ខណ្ឌមានជ័យ។

បើតាមប្រភពព័ត៌មានពីសមត្ថកិច្ចបានប្រាប់ឲ្យដឹងថា មុនពេលកើតហេតុយុវជនទាំង២នាក់ទើបតែចេញពីផឹកស៊ីុនៅកោះពេជ្រ ហើយបានជិះម៉ូតូ១គ្រឿងម៉ាកMSX ពណ៌ស ពាក់ស្លាកលេខភ្នំពេញ1FK-9990 ឌុបគ្នាក្នុងល្បឿនលឿនធ្វើដំណើរតាមបណ្ដោយផ្លូវ ព្រះនរោត្ដម ក្នុងទិសដៅពីជើងទៅត្បូង លុះមកដល់ចំណុចកើតហេតុស្រាប់តែមានរថយន្តនៅខាងមុខ ក៏បានចាប់ហ្វ្រាំងម៉ូតូទាំងបង្ខំបណ្តាលឲ្យដួលបោកពីក្រោយរថយន្តពេញទំហឹងស្លាប់យុវជនម្នាក់នៅនិងកន្លែងកើតហេតុ ចំណែកអ្នកអង្គុយខាងក្រោយរងរបួសធ្ងន់។

ក្រោយកើតហេតុរថយន្តខាងលើបានបើកចេញទៅបាត់សម្រោល ចំណែកយុវជនដែលរបួសធ្ងន់ត្រូវបានរថយន្តសង្គ្រោះបន្ទាន់ដឹងយកទៅព្យាបាលផងដែរ។ រីឯសពយុវជនខាងលើត្រូវបានក្រុមគ្រួសារមកទទួលយកទៅធ្វើបុណ្យតាមប្រពៃណី៕ ស រស្មី