ភ្នំពេញ៖ រថយន្តដឹកភេសជ្ជៈរបស់ក្រុមហ៊ុនកូកាកូឡាមួយគ្រឿងក្រឡាប់ផ្ងាជើងទ្រមេឃ ខណៈគេចពីរថយន្តមួយគ្រឿងផ្សេងទៀតដែលវ៉ាមកបញ្ច្រាសទិសដោយក្នុងល្បឿនលឿនដូចគ្នាហើយបួងចង្កូតធ្លាក់ផ្លូវ កាលពីវេលាម៉ោង៨យប់
ថ្ងៃទី១៥ ខែមករា ឆ្នាំ២០១៧ នៅតាមបណ្តោយផ្លូវជាតិ៣ មុខឃ្លាំងថៃ ប៊ុន រ៉ុង ស្ថិតក្នុងភូមិអង្គត្រគៀត សង្កាត់កន្ទោក ខណ្ឌពោធិ៍សែនជ័យ រាជធានីភ្នំពេញ ។

តាមសាក្សីពីកន្លែងកើតហេតុបានឲ្យដឹងថា នៅមុនពេលកើតហេតុគេឃើញរថយន្តខាងលើដឹកភេសជ្ជៈចម្រុះពេញរបស់ក្រុមហ៊ុន កូកាកូឡា ពាក់ស្លាកលេខភ្នំពេញ3B-0010 បើកបរដោយបុរសម្នាក់និងមានអ្នករួមដំណើរ២នាក់ទៀត ធ្វើដំណើរតាមបណ្តោយផ្លូវជាតិលេខ៣ ក្នុងល្បឿនលឿនទិសដៅពីជើងទៅត្បូង ខណៈមកដល់កន្លែងកើតហេតុ ក៏មានរថយន្តមួយគ្រឿងមិនចាំម៉ាកបានជែងរថយន្តមួយគ្រឿងផ្សេងទៀតក្នុងទិសដៅបញ្ច្រាសគ្នាមកចំពីមុខរថយន្ត កូកាកូឡាធ្វើឲ្យរថយន្តមិនដឹងគេចទៅណាទើបសម្រេចចិត្តបួងចង្កូតមកស្តាំដៃធ្លាក់ផ្លូវ តែដោយខ្លាចបុកជាមួយរថយន្តកុងតឺន័រដែលចតចោលនៅដីចញ្ចើមថ្នល់ក៏បួងចង្កូតត្រឡប់មកវិញទើបបណ្តាលឲ្យរថយន្តក្រឡាប់ចាក់ភេសជ្ជៈពេញថ្នល់ តែសំណាងមិនបង្កឲ្យមានអ្នករងរបួស។

ក្រោយពេលកើតហេតុអ្នកបើកបររួមជាមួយនិងព្រូ២នាក់ទៀតមិនមានរងរបួសបាននាំគ្នារត់អស់
 ទើបសមត្ថកិច្ចមូលដ្ឋានទៅដល់កន្លែងកើតហេតុហៅរថយន្តស្ទួចយកទៅរក្សាទុកនៅប៉ុស្តិ៍នគរបាលកន្ទោករងចាំម្ចាស់មកយកទៅវិញ៕ សុខាសែនជ័យ