ខេត្តកំពង់ស្ពឺ៖ កាលពីវេលាម៉ោង៩ និង៣០នាទីយប់ថ្ងៃទី១៨ ខែមករា ឆ្នាំ២០១៧ នៅចំនុចលក់ស៊ុបយីហោ ប៊ុនណ្ណា១ ស្ថិត ភូមិក្រាំងពលទេព សង្កាត់រកាធំ ក្រុង ច្បារមន កម្លាំងនគរបាលក្រុងច្បារមន ចេញល្បាតឃាត់ឆែកឆេរជនសង្ស័យ២ នាក់ពាក់ព័ន្ធថ្នាំញៀន។
សមត្ថកិច្ចអាវុធហត្ថបានឲ្យដឹងថាជនសង្ស័យទី១.ឈ្មោះ នួន សូនី ភេទប្រុស អាយុ១៦ឆ្នាំ មុខរបមិនពិតប្រាកដ រស់ នៅភូមិគៀមន្នី ឃុំរុងរឿង ស្រុកថ្ពង ខេត្ត កំពង់ស្ពឺ និងទី២.ឈ្មោះ គីម ស្រន់ ភេទ ប្រុស អាយុ១៩ឆ្នាំ មុខរបមិនពិតប្រាកដ រស់នៅភូមិកំពង់ល្ពៀក ឃុំកំពង់សៀម ស្រុកកំពង់សៀម ខេត្តកំពង់ចាម។
មន្រ្តីដដែលបញ្ជាក់ថា ជាមួយការឃាត់ខ្លួនជនសង្ស័យសមត្ថកិច្ចដកហូតថ្នាំ ញៀនម៉ាទឹកកក១កញ្ចប់តូច, ម៉ូតូម៉ាក ស៊ុយហ្ស៊ុយគីវីវ៉ា ពណ៌ខ្មៅ ស៊េរីឆ្នាំ២០១៣ មួយគ្រឿង និងទូរស័ព្ទដៃម៉ាកអាយហ្វូន៤ ពណ៌ខ្មៅ១គ្រឿង។
បច្ចុប្បន្នជនសង្ស័យត្រូវបានបញ្ជូនទៅបញ្ជាការដ្ឋានកងរាជអាវុធហត្ថខេត្តដើម្បីចាត់ការបន្តតាមនីតិវិធី៕ សេនា ស័ក្កិ
