ខេត្តកំពង់ឆ្នាំង៖ បុរសម្នាក់បានស្លាប់ភ្លាមៗនៅនឹងកន្លែងកើតហេតុបន្ទាប់ពីត្រូវរថយន្តសាំយ៉ុងបានបើកយ៉ាងលឿនបុកពេញមួយទំហឹង កាលពីវេលាម៉ោង៨យប់ថ្ងៃទី៩ ខែកុម្ភៈ ឆ្នាំ២០១៧ នៅលើកំណាត់ផ្លូវជាតិលេខ៥ ចន្លោះបង្គោលគីឡូម៉ែត្រលេខ៩៣-៩៤ ត្រង់ចំណុចផ្លូវកោង ក្នុងភូមិត្រពាំងអញ្ចាញ ឃុំស្វាយជ្រុំ ស្រុករលាប្អៀរ ខេត្តកំពង់ឆ្នាំង។

សមត្ថកិច្ចនគរបាលចរាចរបានឲ្យដឹងថា ជនរងគ្រោះឈ្មោះងន ចាន់ឌៀរ ភេទប្រុស អាយុ៣៦ឆ្នាំ មានទីលំនៅក្នុងភូមិស្វាយជ្រុំថ្មី ឃុំស្វាយជ្រុំ ស្រុករលាប្អៀរ ខេត្តកំពង់ឆ្នាំង ជិះម៉ូតូម៉ាកយ៉ាម៉ាហា ស៊ីព្រុស គ្មានស្លាកលេខ ។ ចំណែកឯរថយន្តបង្កឡើងដោយរថយន្ត សាំយ៉ុង ពាក់ស្លាកលេខកំពង់ឆ្នាំង២A-០១៧១ ។

សមត្ថកិច្ចបានឲ្យដឹងទៀតថា នៅមុនពេលកើតហេតុជនជនរងគ្រោះជិះម៉ូតូរបស់ខ្លួនសណ្តោងរ៉ឺម៉កនៅពីក្រោយ ក្នុងទិសដៅពីលិចទៅកើត នៅពេលមកដល់ចំណុចកើតហេតុ ស្រាប់តែរថយន្តបង្កខាងលើដែលបើកក្នុងទិសដៅផ្ទុយគ្នា បានបើកជែងរថយន្តនៅខាងមុខ ក៏ជ្រុលចង្កូតទៅបុកម៉ូតូជនរងគ្រោះពេញមួយទំហឹងបណ្តាលឲ្យសា្លប់នៅនឹងកន្លែងតែម្តង ។ ចំណែកឯកអ្នកបើកបរថយន្តបានបើកគេចខ្លួនបាត់ស្រមោល ។

ចំពោះមធ្យោបាយទាំង២គ្រឿងត្រូវបានសមត្ថកិច្ចយកទៅរក្សាទុកនៅអធិការដ្ឋាននគរបាលស្រុករលាប្អៀរ ដើម្បីទុកអនុវត្តតាមនីតិវិធី ។ ចន្ថា