ភ្នំពេញ៖ រថយន្តសាំយ៉ុងមួយគ្រឿងទុកក្នុងរបងផ្ទះហើយនៅតែជនសង្ស័យធ្វើសកម្មភាពកាត់សោទ្វាររបងលួចយកទៅបានទៀត ខណៈដែលម្ចាស់លង់លក់ក្នុងដំណេក ភ្ញាក់ដឹងខ្លួនបាត់រថយន្តទើបផ្អើលឆោឡោឡើង កាលពីវេលាម៉ោង៥និង៣០នាទីព្រឹក ថ្ងៃទី១៤ ខែកុម្ភៈ ឆ្នាំ២០១៧ ស្ថិតនៅផ្ទះលេខ១២អុឺ០ ផ្លូវបេតុង ភូមិព្រៃព្រីងជើង សង្កាត់ចោមចៅ ខណ្ឌពោធិ៍សែនជ័យ ។

រថយន្តដែលត្រូវជនសង្ស័យលួចទៅបាត់នោះម៉ាកសាំយ៉ុង ពណ៌ស បិតស្កុតក្រហមលាតខៀវ ពាក់ស្លាកលេខភ្នំពេញ2M-7131 ជាកម្មសិទ្ធរបស់ឈ្មោះពៅ លាម ភេទប្រុស អាយុ៣១ឆ្នាំ មុខរបរបើកឡានដឹកសិស្ស ស្នាក់កន្លែងកើតហេតុ មានស្រុកកំណើតនៅឃុំលិច ស្រុកសីធរកណ្តាល ខេត្តព្រៃវែង។

តាមសម្ដីជនរងគ្រោះបានឲ្យដឹងថា នៅមុនពេលកើតហេតុវេលាម៉ោង៩និង៣០នាទីថ្ងៃខែដដែល រូបគាត់បានត្រឡប់ពីដឹកសិស្សវិញគាត់បានទុករថយន្តក្នុងរបងផ្ទះដោយចាក់សោត្រឹមត្រូវ ហើយបានសម្រាក់លង់លក់បាត់ទៅ។ រហូតមកដល់វេលាម៉ោង៥និង៣០នាទីព្រឹកថ្ងៃទី១៤ កុម្ភៈ ស្រាប់តែភ្ញាក់ពីដំណេកវិញ ស្រាប់តែបាត់រថយន្តទើបបង្កការភ្ញាក់ផ្អើល ចំណែកទ្វារត្រូវជនសង្ស័យចងខាងក្រៅជាប់ទើបហៅប្រជាពលរដ្ឋជួយស្រាយចំណង  ។

ក្រោយពេលកើតហេតុជនរងគ្រោះបានត្រឹមតែកាន់កាតគ្រីទៅប្តឹងសមត្ថកិច្ចប៉ុស្តិ៍ចោមចៅសុំការអន្តរាគមន៍៕ សុខាសែនជ័យ