ខេត្តព្រះសីហនុ៖ លោកវរសេនីយ៍ទោ ង៉ុយ ជៀន ប្រធាននគរបាលប៉ុស្តិ៍ច្រកទ្វារពង់ផែអន្តរជាតិខេត្តព្រះសីហនុបានឲ្យ ដឹងថានៅវេលាម៉ោង៩និង១០នាទីព្រឹកថ្ងៃទី១៣ ខែកុម្ភៈ ឆ្នាំ២០១៧ នេះមាននាវា ស្វ័យការពារប្រទេសជប៉ុនចំនួន៣គ្រឿងបានចូលចតនៅកំពង់ផែអន្តរជាតិខេត្ត ព្រះសីហនុប្រកបដោយសុវត្ថិភាព និងទៅតាមការគ្រោងទុករបស់ស្ថានទូតប្រទេសជប៉ុនប្រចាំនៅព្រះរាជាណាចក្រកម្ពុជា។

លោកបានបន្តឲ្យដឹងទៀតថា នាវា ស្វ័យការពារខាងលើមានទី១.នាវាឈ្មោះ Asayuki មានលេខ១៣២ បណ្តោយមាន ប្រវែង ១៣០ម៉ែត្រ និងទទឹង១៣,៦ ម៉ែត្រ ជម្រៅទឹក៨,៥ម៉ែត្រ កងម៉ារីនលើនាវា មាន១៩៦នាក់នាវាចូលចតអែបកំពង់ផែ ទី២.នាវាឈ្មោះ Shimayuki លេខ៣៥១៣ មានបណ្តោយ១៣០ម៉ែត្រ និងទទឹង១៣,៦ ម៉ែត្រ ជម្រៅទឹក ៨,៥ម៉ែត្រ ចូលចតអែប កំពង់ផែមានកងម៉ារីនចំនួន១៧៦នាក់ ទី៣.នាវាឈ្មោះ Makinami មានលេខ ១១២ បោះយុថ្កាចម្ងាយប្រមាណជាង១ម៉ាយពីកំពង់ផែ នាវានេះមានបណ្តោយ ១៥១ម៉ែត្រ និង ទទឹង១៧,៤៣ម៉ែត្រ ជម្រៅទឹក៥,៣ម៉ែត្រ មានផ្ទុកកងម៉ារីន ២១២នាក់។

លោកវរសេនីយ៍ទោ ង៉ុយ ជៀន បាន បន្តឲ្យដឹងទៀតថា នាវាស្វ័យការពារខាងលើដឹកនាំដោយលោកវរនាវីឯក សាវ៉ាគូបូ ម៉ាសាហ៊ីកូ។នៅក្នុងឱកាសចូលចតនាវាខាងលើ ត្រូវបានទទួលការស្វាគមន៍យ៉ាងកក់ក្តៅពីលោកឧត្តមនាវីទោ រស់ វាសនា មេបញ្ជាការ- រងមូលដ្ឋានកងទ័ពសមុទ្ររាម រួមជាមួយ នាយនាវីរង ពលនាវីជាច្រើនរូបទៀត។ តាមការបង្ហើបឲ្យដឹងពីមន្ត្រីស្ថានទូត ប្រទេស ជប៉ុន ប្រចាំនៅកម្ពុជាបានឲ្យដឹងថា នៅក្នុងរយៈពេលចូលចតចាប់ពីថ្ងៃទី១៣ ដល់ ថ្ងៃទី១៦ ខែកុម្ភៈ ឆ្នាំ២០១៧ ខាងមុខ នេះ គោលបំណងនៃដំណើរទស្សនកិច្ច របស់កងម៉ារីនទាំង៣ខាងលើ ដើម្បីពង្រឹង ទំនាក់ទំនងមិត្តភាពរវាងប្រទេសជប៉ុន នឹងព្រះរាជាណាចក្រកម្ពុជា តាមរយៈកម្ម វិធីផ្លាស់ប្តូរនូវបទពិសោធន៍ផ្សេងៗពីគ្នាទៅវិញទៅមក ក៏ដូចជាបានផ្តល់ឱកាសឲ្យនាយនាវិកទាំង១១០នាក់ដែលទើបបាន បញ្ចប់ការសិក្សាបានឈ្វេងយល់ពីវប្បធម៌ និងវិស័យយោធានៅកម្ពុជាផងដែរ។

ប្រភពខាងលើបានបន្ថែមឲ្យដឹងទៀត ថា នៅក្នុងរយៈពេលនៃការចូលចតនាវាខាងលើនេះ លោកវរនាវីឯក កាវ៉ាគូបូ ម៉ា សាហ៊ីកូ មានគម្រោងធ្វើទស្សនកិច្ចទៅ កាន់រាជធានីភ្នំពេញ ដើម្បីបានជួបសម្តែងការគួរសមជាមួយមេបញ្ជាការកងទ័ពជើងទឹកកម្ពុជានៅថ្ងៃទី១៤ ខែកុម្ភៈ និងធ្វើ ទស្សនកិច្ចនៅមូលដ្ឋានកងទ័ពជើងទឹក សមុទ្ររាម និងជួបសម្តែងការ្រគួរសមជា មួយលោក យន្ត មីន អភិបាលនៃគណៈអភិ បាលខេត្តព្រះសីហនុផងដែរ៕ ឆ្លាម សមុទ្រ