ភ្នំពេញ៖ បុរសមា្នក់បើកបររថយន្តមួយគ្រឿងម៉ាកឡិចស៊ីសRX350ទាំងស្រវឹងជោគជាំបានរេចង្កូតជ្រុលទៅបុកទ្វារភូមិគ្រឹះលេខ១១៨ តាមមហាវិថីព្រះមុនីវង្ស សង្កាត់ទន្លេបាសាក់ ខណ្ឌចំការមន រាជធានីភ្នំពេញ។ ហើយបណ្តាលឲ្យទ្វារធ្លាក់បាក់សង្កត់លើរថយន្តចំនួន២គ្រឿង រួចអ្នកបើករថយន្តបង្កព្យាយាមបើករត់ទៅដល់ផ្លូវលេខ២៨២កែង៦៣ សង្កាត់ទន្លេបាសាក់ ខណ្ឌចំការមន ទើបឃាត់បាន។ ហេតុការនេះកើតឡើងនៅកាលពីវេលាម៉ោង៤ទៀបភ្លឺ ថ្ងៃទី១៨ ខែសីហាឆ្នាំ២០១៥ ។
បើតាមប្រភពព័ត៌មានឲ្យដឹងថា មុនពេលកើតហេតុគេឃើញបុរសម្នាក់វ័យជាង៣០ឆ្នាំបើករថយន្តមួយគ្រឿងម៉ាកឡិចស៊ីសRX350 ពណ៌ខ្មៅពាក់ស្លាកលេខ ភ្នំពេញ 2AD-8482 បើកបរតាមមហាវិថីព្រះមុនីវង្សក្នុងទិសដៅពីជើងទៅត្បូង ក្នុងស្ថានភាពទាំងស្រវឹងស្រា។ ខណៈមកដល់ចំណុចខាងលើក៏បានរេចង្កូតជ្រុលទៅបុកទ្វាររបងភូមិគ្រឹះលេខ១១៨បាក់អស់មួយផ្ទាំងធ្លាក់សង្កត់មកលើរថយន្ត២គ្រឿងទៀតមួយគ្រឿងម៉ាកពឺហ្សូពណ៌ប្រផេះ ពាក់ស្លាកលេខ«រដ្ឋ» និងរថយន្តមួយគ្រឿងទៀតម៉ាកឡិចស៊ីស ពណ៌ខ្មៅ ពាក់ស្លាកលេខ ភ្នំពេញ 2AQ-7779 បណ្តាលឲ្យខូចខាត ។
ក្រោយពេលកើតហេតុ រថយន្តបង្កក៏បានព្យាយាមបើករត់គេចរហូតទៅដល់ផ្លូវលេខ២៨២កែង៦៣ ទើបឃាត់បានទាំងអ្នកបើកបរនិងរថយន្តបង្កដែលខូចខាតផ្នែកខាងមុខរថយន្ដ ។
បច្ចុប្បន្នរថយន្តបង្កនិងអ្នកបើកបរ ត្រូវបានសមត្ថកិច្ចបញ្ជូនទៅការិយាល័យនគរបាលចរាចរណ៍ផ្លូវគោក រង់ចាំធ្វើការដោះស្រាយតាមច្បាប់ ៕
...
ដោយ៖ ស រស្មី
