ភ្នំពេញ៖ ក្មេងស្ទាវមួយក្រុមជិះម៉ូតូម៉ាកNEX៣គ្រឿង បានមកឈប់នៅសួនច្បារមុខ ក្រសួងការពារជាតិសង្ស័យអង្គុយចាំប្លន់អ្នកដំណើរនៅពេលយប់ ស្រាប់តែឃើញសមត្ថកិច្ចខណ្ឌ៧មករាជិះម៉ូតូល្បាតនៅក្នុងមូលដ្នាន ក៏នាំគ្នាឡើងជិះម៉ូតូរត់អស់ ដោយបន្សល់ទុកនូវដាវសាមូរ៉ៃ៣ដើមនៅកន្លែងកើតហេតុ កាលពីវេលាម៉ោង១២និង៣០នាទីយប់រំលងអធ្រាត្រឈានចូលថ្ងៃទី១៦ ខែកុម្ភ: ឆ្នាំ២០១៧  ស្ថិតនៅក្នុងសង្កាត់មិត្តភាព ខណ្ឌ៧មករា រាជធានីភ្នំពេញ ។

បើតាមប្រភពព័ត៌មានពីសមត្ថកិច្ចបានឲ្យដឹងថា នៅមុនពេលកើតហេតុកម្លាំងល្បាតខណ្ឌ៧មករាកំពុងល្បាតនៅក្នុងមូលដ្នានរបស់ខ្លួន ខណៈពេលជិះល្បាតមកដល់សួនច្បារមុខក្រសួងការពារជាតិក៏បានឃើញក្មេងស្ទាវមួយក្រុមមានគ្នា៦នាក់ ដោយជិះម៉ូតូ៣គ្រឿងម៉ាក NEX ទាំងអស់ កំពុងអង្គុយលេងនៅលើសួនច្បារ ពេលនោះសមត្ថកិច្ចបានជិះមកហើយបម្រុងឈប់សួរ តែមិនទាន់បានសួរផង ក្មេងស្ទាវទាំងនោះស្រាប់តែនាំគ្នាឡើងជិះម៉ូតូរត់គេចខ្លួនអស់តែម្តង ភ្លាមៗនោះសមត្ថកិច្ចក៏ប្រទះឃើញដាវសាមូរ៉ៃ៣ដើមនៅកន្លែងកើតហេតុ  ទើបសមត្ថកិច្ចដឹងថា ពួកគេប្រហែលជាអង្គុយចាំធ្វើសកម្មភាពប្លន់នៅពេលយប់  ។

ក្រោយកើតហេតុសមត្ថកិច្ចបានយកដាវសាមូរ៉ៃ៣ដើមនោះទៅរក្សាទុកនៅប៉ុស្តិ៍នគរបាលមិត្តភាពដើម្បីស្រាវជ្រាវផងដែរ ៕ ស រស្មី