ភ្នំពេញ៖ រថយន្តហាយឡែនឌ័រ១គ្រឿងលឿនជ្រុលបុករថយន្តម៉ាកឡិចស៊ីសRX330  បណ្តាលឲ្យរថយន្តទាំង២គ្រឿងខូតខាតយ៉ាងធ្ងន់ធ្ងរ ចំណែកម្ចាស់ប្រកែករកត្រូវរៀងៗខ្លួន កាលវេលាម៉ោង១២នាទីរំលងអធ្រាត្រឈានចូលថ្ងៃទី១៦ ខែកុម្ភៈ ឆ្នាំ២០១៧ នៅចំណុចក្នុងរង្វង់មូលចោមចៅ ភូមិព្រៃជីសាក់ សង្កាត់ចោមចៅ ខណ្ឌពោធិ៍សែនជ័យ។

ប្រភពព័ត៌មានពីសាក្សីឃើញហេតុការណ៍នៅកន្លែងកើតហេតុបានឲ្យដឹងថា មុនពេលកើតហេតុគេបានឃើញរថយន្តម៉ាកឡិចស៊ីសRX330 ពណ៌ត្រេអ៊ី ពាក់ស្លាកលេខ ខ.ម 2-3745 ធ្វើដំណើរតាមបណ្តោយផ្លូវជាតិ៣ឆ្ពោះមករង្វង់មូលចោមចៅ ខណៈបើកមកដល់ចំណុចរង្វង់មូលចោមចៅកែងនិងផ្លូវវេងស្រេង ក៏ស្រាប់តែមានរថយន្តបង្កម៉ាកហាយឡែនឌ័រ ពណ៌ស្ករ ពាក់ស្លាកលេខភ្នំពេញ 2W-3009 បើកបរដោយបុុរសមិនស្គាល់អត្តសញ្ញាណម្នាក់បើកតាមផ្លូវវេងស្រេងក្នុងទិសដៅពីកើតទៅលិចក្នុងល្បឿនលឿនមកបុករថយន្តឡិចស៊ីស RX330 ប៉ើងទៅលើសួនរង្វង់មូលបណ្តាលឲ្យដាច់កង់ខាងឆ្វេងនិងបែកកង់ខាងស្ដាំ រីឯរថយន្តបង្កដាច់បាក់កាងខាងមុខធ្ងន់ធ្ងរ។

ក្រោយពេលកើតហេតុភាគីម្ចាស់រថយន្តទាំងសងខាងបានចោទប្រកាន់គ្នាទៅវិញទៅមក រកត្រូវរៀងខ្លួនរហូតជិត៣ម៉ោង ដោយមានការសម្របសម្រួលពីសំណាក់សមត្ថកិច្ចជំនាញ ចុងក្រោយភាគីរថយន្តបង្កហាយឡែនឌ័រព្រមសងទៅខាងឡិចស៊ីRX330ចំនួន៤៥០ដុល្លារដើម្បីបញ្ចប់រឿងនៅកន្លែងកើតហេតុ៕ សុខាសែនជ័យ