ខេត្តសៀមរាប ៖ មានមនុស្សយ៉ាងហោចណាស់៣នាក់បានរងរបួសធ្ងន់ស្រាល ក្នុងករណីគ្រោះថ្នាក់ចរាចរណ៍ រវាងរថយន្តក្រុងរិទ្ធិមុន្នី បុកគ្នាជាមួយរថយន្តម៉ាកហ្វតអង្គការស៊ីម៉ាកយ៉ាងពេញទំហឹង នាយប់ម៉ោង១រំលងអធ្រាត្រ ឈានចូលថ្ងៃទី១៧ ខែកុម្ភៈ ឆ្នាំ២០១៧  នៅ លើផ្លូវជាតិលេខ៦A ស្ថិតក្នុងភូមិសំរោងកញ្ចោច ឃុំឬស្សី ស្រុកជីក្រែង ខេត្តសៀមរាប មានរថយន្តពីរគ្រឿងបុកគ្នា ។

អធិការស្រុកជីក្រែង លោកវរសេន៍ត្រី សុខ សុទ្ធាវុធ បានឲ្យដឹងថា រថយន្តក្រុងដឹកអ្នកដំណើររបស់ក្រុមហ៊ុនរិទ្ធមុន្នី  ពាក់ស្លាកលេខភ្នំពេញ ៣C-០៣៤៥ ទិសដៅពីលិចទៅកើត ផ្ទុកមនុស្សក្នុងរថយន្ត៤០នាក់ ។ លុះបើកមកដល់កន្លែងកើតហេតុបានបុកជាមួយរថ យន្ត១គ្រឿងម៉ាកហ្វត ពណ៌ស ពាក់ស្លាកលេខរដ្ឋ០៥ ២-០៣៧៦ ជា របស់អង្គការស៊ីម៉ាក់ ។ លោកបន្តថា រថយន្តម៉ាកហ្វតបានរងការខូចខាតមួយកំណាត់មុខ ។ ចំណែកអ្នកដំណើរនៅក្នុងរថយន្តក្រុងរិទ្ធមុន្នី មានអ្នករងរបួសធ្ងន់២នាក់ និងស្រាលម្នាក់ ខណៈអ្នកបើកបររថយន្តក្រុងបានរត់គេចខ្លួនបាត់ស្រមោល ។

ក្នុងករណីនេះដែរ កម្លាំនគរបាលជំនាញស្រុកជីក្រែងបានចុះជួយអន្តរាគមន៍  និងបានបញ្ជូនជនរងគ្រោះទៅកាន់មន្ទីរពេទ្យ ។ ដោយ ឡែកមធ្យោបាយធ្វើដំណើរទាំង២គ្រឿងបានយកទៅរក្សាទុកនៅអធិការនគបាលស្រុកជីក្រែង ដើម្បីដោះស្រាយគ្នាតាមផ្លូវច្បាប់ ៕ ជាយក្រុង