ភ្នំពេញ៖ ជនសង្ស័យ២នាក់ត្រូវបានកម្លាំងនគរបាលជំនាញ សហការគ្នាជាមួយកម្លាំងប៉ុស្តិ៍នគរបាលរដ្ឋបាលសំរោងធ្វើការចាប់ឃាត់ខ្លួនបានភ្លាមៗរួមជាមួយថ្នាំញៀន៤០កញ្ចប់ផងដែរយកមកប៉ុស្តិ៍ដើម្បីសួរនាំ។

ក្នុងហេតុការណ៍បង្ក្រាបមេក្លោងជួញដូរគ្រឿងញៀនខាងលើនេះបានធ្វើឡើងកាលពីវេលាម៉ោង៥និង៣៥នាទីល្ងាចថ្ងៃទី២៣ ខែកុម្ភៈ ឆ្នាំ២០១៧ ស្ថិតនៅតាមបណ្តោយផ្លូវលេខ១៥១ ត្រង់ចំណុចភូមិសំរោងត្បូង សង្កាត់សំរោង ខណ្ឌព្រែកព្នៅ។

ប្រភពបានឲ្យដឹងថា មុនឈានដល់ការឃាត់ខ្លួនជនសង្ស័យទាំង២នាក់ ជាមុខសញ្ញាជួញដូរដោយខុសច្បាប់នូវសារធាតុញៀនខុសច្បាប់នោះ កម្លាំងបានស្រាវជ្រាវរយៈយូរមកហើយក៏ប្រទះឃើញជនសង្ស័យ២នាក់ជិះម៉ូតូម៉ាកស៊ុយស៊ូគីឡេត ពណ៌ខ្មៅ ស៊េរី២០១៣ ពាក់ស្លាកលេខ ភ្នំពេញ1BS-0366 ពីកើតទៅលិចដោយមានការសង្ស័យកម្លាំងយើងក៏ធ្វើការឃាត់ត្រួតពិនិត្យ រកឃើញក្រាមពណ៌សថ្លាមានតំរុយគ្រឿងញៀន(ម៉ាទឹកកក)ចំនួន៤០ថង់តូចដែលជនសង្ស័យឈ្មោះ សុខ វីរះ ភេទប្រុស អាយុ១៩ឆ្នាំ កាន់ជាប់និងដៃឆ្វេងរួចក៏ទម្លាក់ចោលទៅលើដី ភ្លាមនោះកម្លាំងឃាត់ខ្លួនជនសង្ស័យទាំង២រួមនិងវត្ថុតាងយកមកធ្វើការសាកសួរនៅប៉ុស្តិ៍នគរបាលរដ្ឋបាលសំរោងតែម្ដង។

ជនសង្ស័យដែលត្រូវឃាត់ខ្លួន ទី១មានឈ្មោះផាន់ រដ្ឋា ហៅថា ភេទប្រុស អាយុ២៥ឆ្នាំ ជនជាតិខ្មែរ មុខរបរមិនពិតប្រាកដ មានទីលំនៅបច្ចុប្បន្នផ្លូវលំ ភូមិតាតូច ឃុំជ្រៃលាស់ ស្រុកពញាឭ ខេត្តកណ្ដាល ទី២.ឈ្មោះសុខ វីរះ ភេទប្រុស អាយុ១៩ឆ្នាំ ជនជាតិខ្មែរ មុខរបរមិនពិតប្រាកដ មានទីលំនៅបច្ចុប្បន្ន ផ្ទះគ្មានលេខ ផ្លូវលំ ភូមិតាតូច ឃុំជ្រៃលាស់ ស្រុកពញាឭ ខេត្តកណ្ដាល ។ ចំណែកវត្ថុតាងដែលដកហូតយកបានមាន ថ្នាំញៀនប្រភេទម្សៅក្រាមសថ្លាចំនួន៤០កញ្ចប់ និងម៉ូតូ១គ្រឿងម៉ាកស៊ុយស៊ូគីឡេត ពណ៌ខ្មៅ ពាក់ស្លាកលេខភ្នំពេញ1BS-0366 សេរី២០១៣ និងទូរស័ព្ទដៃ១គ្រឿង។

បច្ចុប្បន្ន ជនសង្ស័យទាំង២នាក់ត្រូវបាននគរបាលប៉ុស្តិ៍សំរោងធ្វើកំណត់ហេតុរួមនិងវត្ថុតាងបញ្ជូនបន្តទៅអធិការនគរបាលខណ្ឌព្រែកព្នៅចាត់ការបន្តដើម្បីក៏សាងសំណុំរឿងបញ្ជូនទៅតុលាការចាត់ការបន្តតាមនីតិវិធីច្បាប់៕ ព្រែកជ័យ