ភ្នំពេញ៖ រថយន្ដស៊េរីទំនើប២គ្រឿងបើកបរក្នុងល្បឿនលឿននិងខ្វះការប្រុងប្រយ័ត្នពេលដល់ចំណុចផ្លូវបំបែកជាបួនក៏ជ្រុលបុកគ្នាពេញទំហឹងនិងបន្តទៅបុកដើមឈើមួយដើមនៅលើចញ្ចើមផ្លូវបណ្ដាលឲ្យរថយន្ដទាំង២គ្រឿងរងការខូចខាតស្ទើរតែទាំងស្រុង។

ហេតុការណ៍គ្រោះថ្នាក់ចរាចរណ៍នេះបានកើតឡើងនៅវេលាម៉ោង១២និង១០នាទីរំលងអធ្រាត្រឈានចូលថ្ងៃទី២៤ ខែកុម្ភៈ ឆ្នាំ២០១៧ នៅចំណុចផ្លូវលេខ៣១៥ កែងនឹងផ្លូវលេខ៥៦៦ ស្ថិតក្នុងសង្កាត់បឹងកក់២ ខណ្ឌទួលគោក រាជធានីភ្នំពេញ។

ប្រភពព័ត៌មានពីកន្លែងកើតហេតុបានឲ្យដឹងថា នៅមុនពេលកើតហេតុគេបានឃើញរថយន្ដម៉ាកRanger ពណ៌ទឹកក្រូចចាស់ ពាក់ស្លាកលេខ ភ្នំពេញ2AN-2852 បើកបរដោយបុរសម្នាក់ធ្វើដំណើតាមបណ្ដោយផ្លូវលេខ៥៦៦ បើកក្នុងល្បឿនលឿនហើយបានឆ្លងកាត់ផ្លូវលេខ៣១៥ ស្របពេលដែលមានរថយន្ដម៉ាក ម៊ែរស៊ដែស ពណ៌ស ពាក់ស្លាកលេខ ភ្នំពេញ2AQ-7572 បើកបរដោយបុរនារីជនជាតិចិន២នាក់ធ្វើដំណើរតាមបណ្ដោយផ្លូវលេខ៣១៥បើកក្នុងល្បឿនលឿនដូចគ្នាក៏ជ្រុលបុកគ្នាយ៉ាងពេញទំហឹងបណ្ដាលឲ្យរថយន្ដRangerរេចង្កូតជ្រុលទៅបុកដើមឈើនៅលើចញ្ចើមផ្លូវ ចំណែករថយន្ដម៊ែរស៊ដែសវិលមួយជុំរងការខូចខាតផ្នែកខាងមុខស្ទើរតែទាំងស្រុង។

ប្រភពបានបន្តថា ក្រោយពីកើតហេតុម្ចាស់រថយន្ដទាំង២គ្រឿងបានចុះពីរថយន្ដហើយគេចខ្លួនបាត់អស់។ ក្រោយមកទើបកម្លាំងសមត្ថកិច្ចចុះដល់កន្លែងកើតហេតុធ្វើការវាស់វែងស្ទួចយករថយន្ដទាំង២គ្រឿងទៅការិយាល័យចរាចរណ៍រាជធានីភ្នំពេញដោះស្រាយតាមនីតិវិធីច្បាប់៕ ព្រែកជ័យ