ខេត្តកណ្តាល៖ សមត្ថកិច្ចនគរបាលស្រុកពញាឮបង្រ្កាបចាប់ខ្លួនជនសង្ស័យម្នាក់កាលពីវេលាម៉ោង១២ និង៣៥នាទីថ្ងៃត្រង់ទី២៦ ខែកុម្ភៈ ឆ្នាំ២០១៧ ស្ថិតក្នុងភូមិល្វា ឃុំទំនប់ធំ ស្រុកពញាឮ ដកហូតវត្ថុតាងថ្នាំញៀន២កញ្ចប់ អាវុធ៣ដើម និងសម្ភារពាក់ព័ន្ធមួយចំនួនទៀត ដើម្បីកសាងសំណុំរឿងចាត់ការតាមច្បាប់ ។
មន្ត្រីនគរបាលស្រុកពញាឮបានឲ្យដឹងថា ជនសង្ស័យជាមុខសញ្ញាជួញដូរគ្រឿងញៀនដែលត្រូវបានចាប់ខ្លួននោះឈ្មោះ លី សុខ ភេទប្រុស អាយុ៤៣ឆ្នាំ មុខរបរកម្មករ មានទីលំនៅភូមិល្វា ឃុំទំនប់ធំ ស្រុកពញាឮ ។ ក្នុងប្រតិបត្តិការបង្រ្កាបចាប់ខ្លួនជនសង្ស័យ សមត្ថកិច្ចបានធ្វើការដកហូតវត្ថុតាងញៀនប្រភេទមេតំហ្វេតាមីន ហៅម៉ាទឹកកកចំនួន២កញ្ចប់ ,អាវុធ៣ដើម(កាំភ្លើងច្នៃ១ដើមនិងដាវ២ដើម) ,ជំពាមកៅស៊ូ១ ,ទូរស័ព្ទដៃ១គ្រឿង ,សម្ភារវេចខ្ចប់ និងឧបករណ៍សម្រាប់សេពគ្រឿងញៀនមួយចំនួនទៀត ។
ប្រភពដដែលបានបន្តថា បន្ទាប់ពីទទួលបានព័ត៌មានពីមហាជនល្អថា នៅក្នុងភូមិសាស្ត្រ ឃុំទំនប់ធំ មានជនសង្ស័យធ្វើសកម្មភាពជួញដូរគ្រឿងញៀនខុសច្បាប់រួចមក សមត្ថកិច្ចនគរបាលស្រុកសហការជាមួយនគរបាលប៉ុស្តិ៍រដ្ឋបាលចុះធ្វើការស្រាវជ្រាវ រហូតឈានដល់បង្រ្កាបចាប់ខ្លួនជនសង្ស័យរួមជាមួយវត្ថុតាងពាក់ព័ន្ធ ដើម្បីកសាងសំណុំរឿងចាត់ការតាមច្បាប់ ៕ ស្អាងជ័យ
