ខេត្តស្វាយរៀង៖ មានហេតុការណ៍គ្រោះថ្នាក់ចរាចរណ៍គួរឲ្យរន្ធត់រវាងរថយន្តហាយឡែនឌ័របុកជាមួយរថយន្តដឹកស៊ីម៉ង់ត៍ពីក្រោយពេញទំហឹងលាន់សូរដូចរន្ទះបាញ់បណ្ដាលឲ្យមនុស្សប្រុស៣នាក់រងរបួសធ្ងន់ស្រាល កាលពីវេលាម៉ោង១និង១៥នាទីរសៀលថ្ងៃទី៣ ខែមីនាឆ្នាំ២០១៧ ត្រង់ចំណុចខាងលិចរង្វង់មូលរូបគោ សង្កាត់ព្រៃឆ្លាក់ ក្រុង-ខេត្តស្វាយរៀង។

យោងតាមសាក្សីដែលឃើញហេតុការណ៍បានឲ្យដឹងថា មុនកើតហេតុគេឃើញមានបុរស៣នាក់មិនត្រូវបានស្គាល់អត្តសញ្ញាណបានបើករថយន្តមួយគ្រឿងម៉ាកហាយឡែនឌ័រ ពណ៌ស្ករ ពាក់ស្លាកលេខភ្នំពេញ2AB-8028 ដោយធ្វើដំណើរលើកំណាត់ផ្លូវជាតិលេខ១ពីកើតទៅលិច ក្នុងល្បឿនលឿនខ្វះការប្រុងប្រយ័ត្នក៏ជ្រុលទៅបុករថយន្តដឹកសីុម៉ង់ត៍ពីក្រោយដែលកំពុងចតលើចញ្ចើមផ្លូវយ៉ាងពេញទំហឹងលាន់សូរដូចរន្ទះបណ្តាលឲ្យរងខូចខាតរថយន្តស្ទើរមួយចំហៀង និងមនុស្សរងរបួសធ្ងន់ស្រាល៣នាក់។

ក្រោមមកក៏មានការភ្ញាក់ផ្អើលដល់អ្នកភូមិក៏ដូចជាអ្នកធ្វើដំណើរឆ្លងកាត់នាំគ្នាចោមរោមមើលនិងរាយការណ៍មកសមត្ថកិច្ចនគរបាលចរាចរក្រុងនិងទាញយកបុរសទាំង៣នាក់ដែលរងរបួសធ្ងន់ស្រាលមកកាន់មន្ទីរពេទ្យបង្អែកក្រុងស្វាយរៀង។ បន្ទាប់មករថយន្តទាំងពីរត្រូវបានសមត្ថកិច្ចនគរបាលយកទៅរក្សាទុកនៅការិយាល័យនគរបាលចរាចរណ៍ខេត្តដើម្បីដោះស្រាយតាមផ្លូវច្បាប់ ៕ យឹម សុថាន