ភ្នំពេញ៖ ហេតុការណ៍គ្រោះថ្នាក់ចរាចរណ៍មួយ បានកើតឡើងបន្ទាប់ពីបុរសម្នាក់បើកបរខ្វះការប្រុងប្រយ័ត្ន ដោយសារតែការជាន់ហ្គ្រែរច្រលំជ្រុលទៅបុកផ្ទះជាងកាត់សក់ដែលនៅទល់មុខផ្ទះគ្នា បណ្ដាលឲ្យរងការខូចខាតបាក់បែកទ្រព្យសម្បត្តិមួយចំនួននិងម៉ូតូឌ្រីមសង់០១៧ពណ៌ទឹកមាស តែមិនមានគ្រោះថ្នាក់ដល់មនុស្សឡើយ ។

ករណីគ្រោះថ្នាក់ចរាចរណ៍នេះ បានកើតឡើងកាលពីវេលាម៉ោង១០និង៣០នាទីព្រឹក ថ្ងៃទី៩ ខែមិនា ឆ្នាំ២០១៧ នៅចំណុចមុខផ្ទះលេខ៥និងលេខ៦ ផ្លូវ៣២៦ សង្កាត់ផ្សារដើមគ ខណ្ឌទួលគោក រាជធានីភ្នំពេញ ។

តាមប្រភពបានប្រាប់អោយដឹងថា រថយន្ត Rav4 ពណ៌ទឹកប្រាក់ ពាក់ស្លាកលេខ កំពង់ចាម 2A-6681 បើកបរដោយបុរសម្នាក់វ័យប្រហែលជាង៤០ឆ្នាំ បើកចេញពីផ្ទះជួលលេខ៥ ផ្លូវ៣២៦ ក៏ជាប់ហ្គែ្ររខ្លាំងពេកជ្រុលទៅបុកចូលផ្ទះកាត់សក់ដែលនៅទុលមុខគ្នាបណ្តាលអោយបាក់បែកខូចខាតទ្រព្យសម្បត្តិមួយចំនួនរួមទាំងម៉ូតូមួយគ្រឿងម៉ាកហុងដាសេ១២៥ ពណ៌ទឹកប្រាក់សេរី០១៧ ស្លាកលេខ ភ្នំពេញ 1GC-0366 បាក់កាត់តាប៊ូកង់មុខនិងវៀចក ចំណែកឯរថយន្ត Rav4 ធ្លាយធុងសាំងហៀពេញផ្លូវ បាក់កញ្ចក់មើលផ្លូវខាងស្តាំ និងផ្នែកខាងមុខផងដែរ ។

ក្រោយកើតហេតុសមត្ថកិច្ចនរគបាលមូដ្ឋាននិងចរាចរណ៍ខណ្ឌទួលគោក ចុះមកដល់កន្លែងកើតហេតុ ដោយខាងម្ចាស់រថយន្តបានប្រាប់ថា គាត់ទទួលខុសត្រូវ និងសងជាការជួសជុលផ្ទះសម្បែងជូនជនរងគ្រោះទាំងអស់វិញ ៕ ដោយ៖ស តារា