ភ្នំពេញ៖ នាល្ងាចថ្ងៃសៅរ៍ ទី១១ ខែ មីនា ឆ្នាំ២០១៧នេះ អ្នកប្រដាល់គុនខ្មែរ ៤នាក់បានណាត់តតាំងគ្នានៅលើសង្វៀនទូរទស្សន៍ប៉ុស្តិ៍លេខ៥ TIFFY ARENA ខាងកើតស្ពានជ្រោយចង្វា គឺកីឡាករ ចៅ ផលឌឿ អ្នកប្រដាល់ជើងចាស់មកក្លិប សំរោងកោងខេត្តបាត់ដំបងប្រកួតជាមួយកីឡាករ ឡៅ ផានាថ ជើងខ្លាំងមកពីក្លិប មកុដរាជសីហ៍ក្នុងប្រភេទទម្ងន់៦៧គីឡូក្រាម។ ខណៈដែលកីឡាករ ហ៊ែល វ៉ា អ្នក ប្រដាល់ក្លិបឃ្លាំងមឿងកីឡាខេត្តពោធិ៍សាត់ នឹងជួបប្រកួតសងសឹកជាមួយកីឡាករ ជ័យ ប៊ុនសង់ អ្នកប្រដាល់ក្លិបគីសែមានប្ញទិ្ធ ក្នុងប្រភេទទម្ងន់៥៧គីឡូក្រាម ។

អ្នកផ្គូផ្គងរបស់សង្វៀនទូរទស្សន៍ប៉ុស្តិ៍លេខ៥បានបញ្ជាក់ថា សម្រាប់សប្តាហ៍នេះ គណៈកម្មការបានសម្រាំងអ្នកប្រដាល់ជើងខ្លាំង៤នាក់ចូលរួមប្រកួតគូពិសេសជា លក្ខណៈមិត្តភាពចំនួន៣គូផ្សេងទៀតដើម្បីផ្តល់ភាពសប្បាយរីករាយថ្ងៃចុងសប្តាហ៍ដល់ប្រជាពលរដ្ឋដែលនិយមទស្សនាការ ប្រកួតកីឡាប្រដាល់ក្បាច់គុនបុរាណខ្មែរ ឥឡូវគេប្តូរមក (គុនខ្មែរ) ។

ប្រភពពីអ្នកចាប់គូដដែលបានបញ្ជាក់បន្ថែមថា សម្រាប់ការប្រកួតរវាងកីឡាករ ឡៅ ផានាថ នឹងកីឡាករ ចៅ ផលឌឿ អាច និយាយបានថា ជាការប្រកួតមួយនាំឲ្យទស្ស និកជនជក់ចិត្តខ្លាំងតាមរយៈបទពិសោធន៍ស្នៀតប្រដាល់ដ៏ប៉ិនប្រសប់រៀងៗខ្លួនរបស់ពួកគេកន្លងទៅ។ ផានាថ មួយរយៈពេលចុងក្រោយនេះការប្រកួតរបស់គេហាក់មិនសូវល្អតែកីឡាកររូបនេះមាន ចិត្តប្រដាល់ធំឲ្យតែទម្ងន់ស្មើគ្នាគឺគេហ៊ានវាយទាំងអស់ទោះបីធ្លាប់ស្គាល់ពីថ្វីដៃ ផល ឌឿ ថាខ្លាំង ប៉ុនណាក៏ដោយចុះ ។

ចំណែកឯកីឡាករ ចៅ ផលឌឿ ចាស់ វស្សាក្នុងវិស័យកីឡាប្រដាល់ កីឡាកររូបនេះវាយចេញខ្លាំងទាំងកណ្តាប់ដៃ ជង្គង់និងស្នៀតកែងមានភាពរហ័សរហួនក្នុងការ បន្លាស់ទីដើម្បីវាយបកទៅលើដៃគូរបស់ ខ្លួនវិញ។ ផលឌឿ មួយរយៈចុងក្រោយនេះ មិនសូវជាសំណាងល្អដូច ឡៅ ផានាថ ដែរ។ ប្រកួតចុងក្រោយរបស់ ផលឌឿ កាលពី ថ្ងៃទី១៨ ខែកុម្ភៈ ឆ្នាំ២០១៧កន្លងទៅវាយ ចាញ់កីឡាករ គឹម វាសនា មកពីក្លិបកង ពលតូចទ័ពឆត្រយោង៩១១ក្នុងទឹកទី២។ រីឯកីឡាករ ឡៅ ផានាថ ប្រកួតចុង ក្រោយ វាយចាញ់កីឡាករ សេក គឹមភាព អ្នក ប្រដាល់ក្លិបអង្គរមានជ័យខេត្តសៀមរាប ដោយពិន្ទុ ។

ដោយឡែកជំនួបប្រកួត រវាងកីឡាករ ហ៊ែល វ៉ា នឹងកីឡាករ ជ័យ ប៊ុនសង់ ពុំដែលបានជួបប្រកួតគ្នាម្តងណាឡើយ។ កីឡាករ ហ៊ែល វ៉ា មានបច្ចេកទេសល្អប្រហាក់ ប្រហែលកីឡាករ ជ័យ ប៊ុនសង់ដែរ ។

ជ័យ ប៊ុនសង់ វាយចេញល្អ និងកណ្តាប់ ដៃធ្ងន់ ពិសេសនោះស្នៀតជង្គង់ ។ ប្រកួត ចុងក្រោយនេះប៊ុនសង់ វាយឈ្នះ តាំង សីហា មកពីក្លិបកងពលតូចលេខ៧០ ដោយពិន្ទុ។ រីឯ ហ៊ែល វ៉ា ប្រកួតចុងក្រោយ វាយចាញ់កីឡាករ សួង សុវណ្ណថា អ្នក ប្រដាល់សមាគមកីឡាក្រសួងការពារជាតិ ក្នុងទឹកទី៣ ។

ចំពោះគូពិសេសលក្ខណៈមិត្តភាពផ្សេងទៀតដូចជា កីឡាករ សុំ សុខឡេង អ្នក ប្រដាល់មកពីក្លិបសាលវ័ន្តកីឡាប្រកួតជាមួយ សយ សុខ អ្នកប្រដាល់មកពីក្លិបពន្លឺ វិបុលមានឫទ្ធិ។ ចំណែកឯកីឡាករ សាំង គីម អ្នកប្រដាល់មកពីក្លិបអេ ភូថង កីឡា ប្រកួតជាមួយកីឡាករ លីន សុវណ្ណារ៉ា អ្នកប្រដាល់មកពីក្លិបបុរីរាជសីហ៍មានឫទ្ធិក្នុង ប្រភេទទម្ងន់៥១គីឡូក្រាម ៕ សារីម