ខេត្តកណ្តាល ៖ នៅលើកំណត់ផ្លូវជាតិលេខ៤ ចំណុចមុខភូមិអង្គស្នួល ឃុំពើក ស្រុកអង្គស្នួល ខេត្តកណ្កាលចន្លោះគីឡូម៉េត្រលេខ ២៥/២៦ មានករណីគ្រោះថ្នាក់ចនរាចរណ៍មួយបានកើតឡើង រវាងរថយន្តនិងម៉ូតូបើកបញ្រ្ចាស់ទិសគ្នា បណ្តាលឲ្យអ្នកបើកម៉ូតូស្លាប់នៅនឹងកន្លែងកើតហេតុ ។ ហេតុការណ៍នេះកើតឡើងកាលពីវេលាម៉ោង២០និង៥០នាទីយប់ ថ្ងៃទី១១ ខែមីនា ឆ្នាំ២០១៧ ។

សាក្សីឃើញហេតុការណ៍ខាងលើបានឲ្យដឹងថា នៅវេលាម៉ោងខាងលើ គេឃើញរថយន្ត១គ្រឿង ម៉ាកហ៊ីយ៉ាន់ដាយសណ្ដាងរ៉ឺមក ពណ៌ក្រហម ពាក់ស្លាកលេខភ្នំពេញ៣C-៩៧៤៤ (អ្នកបើកបរមិនស្គាល់អត្តសញ្ញាណ រត់គេចខ្លួនបាត់) បើកពីទិសកើតមកលិច (ភ្នំពេញ/កំពង់សោម) បើកមកដល់ចំណុចមុខផ្សារអង្គស្នួលរថយន្តបានឈប់ ។ មួយសន្ទះរថយន្តបានបត់ឆ្លងថ្នល់ ពីជើងទៅត្បូងវិញ ស្របពេលនោះក៏មានម៉ូតូ១គ្រឿង ម៉ាកហ្សូមរ័ ពណ៌ខ្មៅ ពាក់ស្លាកលេខភ្នំពេញ១GF-៣៥២៤ បានបុកចំកង់រ៉ឺម៉ករថយន្តខាងស្ដាំ បណ្តាលឲ្យដួលបោកក្បាលលើទ្រូងថ្នល់ស្លាប់នៅកន្លែងកើតហេតុ ។ ចំពោះរថយន្តបានបើករត់មកទិសខាងលិច ឈប់ទុកចោលនៅខាងជើងថ្នល់ជាតិ ចំណុចមុខភូមិថ្នល់ទទឹង ឃុំដំណាក់អំពិល ស្រុកអង្គស្នួល ខេត្តកណ្តាល ។

មន្រ្តីនគរបាលលស្រុកអង្គស្នួលបានឲ្យដឹងថា អ្នកបើកម៉ូតូឈ្មោះ មាស សូនី ភេទប្រុស អាយុ២២ឆ្នាំ មានទីលំនៅភូមិកណ្តាល ឃុំត្រពាំងល្វា ស្រុកឧដ្តង ខេត្តកំពង់ស្ពឺ ។ ធ្វើដំណើរក្នុងទិសដៅពីលិចទៅកើត(កំពង់សោម/ភ្នំពេញ) ។

មន្រ្តីជំនាញផ្នែកចរាចរណ៍ស្រុកអង្គស្នួលបានឲ្យដឹងថា ករណីគ្រោះថ្នាក់នេះគឺបណ្តាលមកពីអ្នកបើកបររថយន្តបត់ឆ្លងផ្លូវ ខ្វះការប្រុងប្រយ័ត្ន ។ ចំពោះអ្នកបើកម៉ូតូវិញ បើកបរក្នុងល្បឿនលឿន ខ្វះការប្រុងប្រយ័ត្នដូចគ្នា ។

ក្រោយការពិនិត្យ និងវាស់វែងពីជំនាញចរាចរណ៍រួចមធ្យោបាយពាក់ព័ន្ធយកមករក្សាទុកនៅអធិការរដ្ឋាននគរបាលស្រុកកសាងសំណុំរឿងតាមនីតិវិធី ។ ចំណែកសពជនរងគ្រោះបានប្រគល់ជូនក្រុមគ្រួសារយកទៅធ្វើបុណ្យតាមប្រពៃណី ៕ ស្អាងជ័យ