ភ្នំពេញ៖ រថយន្តដឹកដីមួយគ្រឿងបើកបរក្នុងល្បឿនលឿន ហើយមកដល់ចំណុចផ្លូវតូច ចង្អៀតក៏បាន បុកពីក្រោយរថយន្តដឹកដីមួយគ្រឿងទៀតហើយអ្នកបើកបរបានមួងចង្កូតគេចក៏ធ្លាក់ផ្លូវក្រឡាប់ច្រង៉ាងតែសំណាងល្អមិនមានអ្នករងរបួស។ ហេតុការណ៍នេះបានកើតឡើងកាលពីម៉ោង០៨និង៣០នាទីព្រឹកថ្ងៃទី២០សីហា2015 នៅតាមវិថីហានណូយ ភូមិសំរោង សង្កាត់ឃ្មួញ ខណ្ឌសែនសុខ ។

បើតាមសំដីម្ចាស់រថយន្តដឹកដីខាងលើបានប្រាប់ឲ្យដឹងថា អ្នកបើកបរ ឈ្មោះ រ៉ាយុទ្ធ អាយុ ២១ឆ្នាំ ស្នាក់នៅ ភូមិឃ្មួញ សង្កាត់ឃ្មួញ ខណ្ឌ មានស្រុកកំណើតនៅ ខេត្តតាកែវ បានរត់គេចខ្លួនបាត់ ។

សាក្សីនៅកន្លែងកើតហេតុបានបញ្ចាក់បន្ថែមថាមុនពេលកើតហេតុគេបានឃើញយុវជនម្នាក់បើករថយន្តបែនដឹកដីមួយគ្រឿង ម៉ាក អ៊ីស៊ុយស៊ុយពាក់ស្លាកលេខ ភ្នំពេញ ក-5869 ភ ព បើកមកក្នុងល្បឿនលឿនក្នុង ទិសដៅពីជើងទៅត្បូងខណៈមកដល់ចំណុចខាងលើជាចំណុចផ្លូវតូចចង្អៀតនឹងជាផ្លូវកំពុងជួសជុល រថយន្តខាងលើបានបើកជ្រែងគ្នាជាមួយរថយន្តដឹកដី ធុនធំមួយគ្រឿងទៀតក៏ជ្រុលបុកពីក្រោយរថយន្តដឹកដីមួយគ្រឿងទៀតបណ្តាលឲ្យធ្លាក់ផ្លូវ ក្រឡាប់ច្រង៉ាង តែម្តង ចំណែក អ្នកបើកបររងរបួសស្រាលរួចបានរត់ គេចខ្លួនបាត់។

ក្រោយកើតហេតុម្ចាស់រថយន្តបានហៅរថយន្ត ស្ទូច មកស្ទូចឡើងយកទៅជួសជុលដោយខ្លួនឯងប៉ុណ្ណោះ ប្រជាពលរដ្ឋដែលរស់នៅតាមបណ្តោយផ្លូវខាងលើបានត្អូញត្អែថាសព្វថ្ងៃនេះនៅតាមបណ្តាយផ្លូវខាងលើគឺមានរថយន្តដឹកដីតូចធំបើកទៅមកក្នុងល្បឿនលឿនៗដូចហែលកឋិនចឹងពួកគាត់មិនខ្ចីខ្វាយខ្វល់ពីសុវត្តិភាពចរាចរណ៍ដល់អ្នកដ៏ទៃឡើយដូចនេះ ពួកគាត់ សូមសុំណូមពរដល់អាជ្ញាធរឬក៏សមត្ថកិច្ចពាក់ព័ន្ធជួយមើលឃើញករណីខាងលើនេះផង ៕

ដោយ៖ តុង សីហា