ភ្នំពេញ៖ បុរសម្នាក់ស្រវឹងស្រាជិះម៉ូតូទាក់ដៃចង្កូតជាមួយម៉ូតូ១គ្រឿងហើយជ្រុលទៅបុកម៉ូតូមួយគ្រឿងទៀតដល់ពេលសមត្ថកិច្ចចុះមកវាស់វែងគ្រាន់តែសមត្ថកិច្ចលើកម៉ូតូដាក់លើរថយន្តរៀងធ្ងន់ដៃបន្តិចសោះក៏ចង់រករឿងរកវាយសមត្ថកិច្ថថែមទៀតផង បង្កឲ្យមានការភ្ញាក់ផ្អើលដល់ប្រជាពលរដ្ឋ កាលពីវេលាម៉ោង១០និង៣០នាទីយប់ថ្ងៃទី១៧ ខែមីនា ឆ្នាំ២០១៧ ត្រង់ចំណុចម្ដុំត្រឡោកបែក ភូមិទំនប់ ផ្លូវ៥៩៨ សង្កាត់ភ្នំពេញថ្មី ខណ្ឌសែនសុខ។

តាមប្រភពព័ត៌មានពីកន្លែងកើតហេតុបានឲ្យដឹងថា មុនពេលកើតហេតុគេឃើញម៉ូតូ១គ្រឿងម៉ាក ភ្លូហ្សា (Plusa) ពណ៌លឿង គ្មានស្លាកលេខ បើកបរដោយបុរសម្នាក់ក្នុងទិសដៅពីត្បូងទៅជើងក្នុងល្បឿនលឿន លុះមកដល់ចំណុចកើតហេតុស្រាប់តែម៉ូតូខាងលើបានប៉ះដៃចង្កូតជាមួយនិងម៉ូតូមួយគ្រឿងម៉ាកស្មាស មិនចាំស្លាកលេខ បណ្ដាលឲ្យម៉ូតូខាងលើដួលអូសប្រមាណជា១០ម៉ែត្រទៅខាងឆ្វេងផ្លូវបណ្ដាលឲ្យជ្រុលទៅបុកម៉ូតូមួយគ្រឿងម៉ាកធូដេ ពណ៌ក្រហម គ្មានស្លាកលេខ ជិះដោយសង្សារមួយគូរ ក្នុងទិសដៅពីជើងទៅត្បូងហើយត្រូវបានម៉ូតូខាងលើដួលអូសមកបុកម៉ូតូធូដេនោះបណ្ដាលឲ្យម៉ូតូទាំង២ជាប់គ្នាទាញមិនចេញហើយអ្នកជិះម៉ូតូធូយដេយម្នាក់ក្នុងចំនោមពីរនាក់ជាសង្សាររបស់គេនោះបានត្រូវរងរបួសបែកក្បាលត្រូវបានបញ្ជូនទៅកាន់គ្លីនិកឯកជន អង្គរធំដើម្បីព្យាបាល។

បើតាមសម្ដីពីខាងម្ចាស់ម៉ូតូធំ ម៉ាកភ្លូហ្សាបានប្រាប់ឲ្យដឹងថា មុនពេលកើតហេតុរូបគាត់ទើបតែចេញមកពីលេងផ្ទះមិត្តភក្ដិនៅម្ដុំស្ពានអាកាស៧មករា ហើយបំណង់ជិះត្រឡប់ទៅផ្ទះវិញនៅម្ដុំជ្រោយចង្វា លុះមកដល់ចំណុចកើតហេតុស្រាប់តែម៉ូតូម្ខាងទៀតមកបុកម៉ូតូរបស់គាត់តែម្ដង។

បើតាមប្រភពពីខាងម្ចាស់ម៉ូតូធូដេបានឲ្យដឹងថា មុនពេលកើតហេតុរូបគាត់និងសង្សារបានជិះម៉ូតូមកពីកន្លែងលក់របស់គាត់នៅក្បែរខារ៉ាអូខេសំរិទ្ធពេជ្យ បំណងទៅទិញបង្អែមហើយពេលជិះមកដល់ចំណុចកើតហេតុស្រាប់តែមានម៉ូតូមួយគ្រឿងដែលជាម៉ូតូបង្កជិះទាក់ដៃចង្កូតជាមួយម៉ូតូមួយផ្សេងទៀតហើយបានដួលមកបុកម៉ូតូរបស់គាត់បណ្ដាលឲ្យសង្សាររបស់គាត់រងរបួសនិងខូចខាតម៉ូតូធ្ងន់ធ្ងរ ហើយពេលកំពុងតែវិកវល់ក្នុងការប៉ះគ្នានោះក៏មានក្រុមចោរដៃឆៅមួយក្រុមគ្នា២នាក់មកឆក់កាបូបដែលមានលុយ១០០ដុល្លារនិងសៀវភៅបញ្ជីមួយនៅក្នុងកាបូបនេះយកទៅបាត់ដោយសុវត្ថិភាព។

ក្រោយពេលកើតហេតុសមត្ថកិច្ចនគរបាលចរាចរខណ្ឌសែនសុខបានចុះមកធ្វើការវាស់វែងហើយខណៈដែលសមត្ថកិច្ចលើកម៉ូតូទាំងពីរទាញចេញពីគ្នារៀងធ្ងន់ដៃបន្តិចស្រាប់តែខាងម្ចាស់ម៉ូតូភ្លូហ្សាបានរត់មកប្រើកាយវិការច្រងេងច្រង៉ាងដាក់សមត្ថកិច្ចទាំងខ្លួនឯងស្រវឹងជោកជាំងផងនោះ ហើយរកបបួលសមត្ថកិច្ចដោះអាវវាយគ្នាទៀតផង គ្រាន់តែរឿងលើកម៉ូតូរបស់គាត់ខ្លាំងបន្តិចតែប៉ុណ្ណោះ។

ក្រោយពេលកើតហេតុសមត្ថកិច្ចបានឃាត់បុរសដែលស្រវឹងមានអាកប្បកិរិយាមិនសមរម្យដាក់សមត្ថកិច្ចនោះនិងម៉ូតូទាំង២គ្រឿងយកទៅអធិការដ្ឋាននគរបាលខណ្ឌសែនសុខរងចាំការដោះស្រាយនៅពេលក្រោយ ៕ តុង សីហា