ភ្នំពេញ៖ កម្លាំងនគរបាលប៉ុស្តិ៍បឹងសាឡាង ខណ្ឌទួលគោក ឃាត់ខ្លួនជនសង្ស័យម្នាក់ជាក់ស្តែង ពីបទលួចម៉ូតូ ដែលប្រព្រឹត្ត នៅថ្ងៃទី២០ ខែសីហា ឆ្នាំ២០១៥ វេលាម៉ោង ១១និង៥០នាទីព្រឹក មុខផ្ទះលេខ១៦ហ្សេត ផ្លូវលេខ៣៣៦ ក្រុមទី២៨ ភូមិ១០ សង្កាត់បឹងសាឡាង ខណ្ឌទួលគោក រាជធានីភ្នំពេញ ។
តាមប្រភពពីលោក តន់ រ៉ាវុធ នាយផ្នែកនគរបាលព្រហ្មទណ្ឌខណ្ឌទួលគោក បានឲ្យដឹងថា ជនសង្ស័យឈ្មោះ ថុង សំអុល ហៅ គួយ ភេទប្រុស អាយុ ២៧ឆ្នាំ ជនជាតិខ្មែរ មុខរបរ ពំុពិតប្រាកដ ស្នាក់នៅផ្ទះជួលលេខ៤១ហ្សេត ផ្លូវលេខ៣៣៦ ក្រុមទី២៨ ភូមិ១០ សង្កា ត់បឹងសាឡាង ខណ្ឌទួលគោក រាជធានីភ្នំពេញ ។ចំណែកឯជនរងគ្រោះឈ្មោះ ឃន បារាំង ភេទប្រុស អាយុ ៣៤ឆ្នាំ ជនជាតិខ្មែរ មុខរបរ លក់បន្លែ នៅផ្សារដើមគរ ស្នាក់នៅបន្ទប់ជួលលេខ៥ ជាន់ទី៣ ផ្ទះលេខ១៦ហ្សេត ផ្លូវលេខ៣៣៦ ក្រុមទី២៨ ភូមិ១០ សង្កាត់បឹងសាឡាង ខណ្ឌទួលគោក រាជធានីភ្នំពេញ ។
វត្ថុតាងចាប់យក ម៉ូតូមួយគ្រឿងម៉ាក សង់កូរ៉េ ពណ៌ក្រហម ពាក់ស្លាកលេខរតនគីរី 1A-9446 (ជាម៉ូតូរបស់ជនរងគ្រោះ បានប្រគល់ឱ្យជនរងគ្រោះវិញ) កូនសោរម៉ូតូ និងសោរផ្ទះចំនួន៥ ។
លោក តន់ រ៉ាវុធ នាយផ្នែកនគរបាលព្រហ្មទណ្ឌ បានបន្តទៀតថា នៅមុនពេលកើតហេតុ គឺ ជនរងគ្រោះបានជិះម៉ូតូមកពីលក់បន្លែនៅផ្សារដើមគរ បានមកចតទុកនៅចំណុចកើតហេតុ ដោយពុំបានចាក់សោរកទេ ហើយបានឡើងទៅបន្ទប់ជួល នៅជាន់ទី៣ មួយសន្ទុះចុះមកវិញស្រាប់តែ បាត់ម៉ូតូ ក៏បានមកប្តឹងសមត្ថកិច្ចនគរបាល ប៉ុស្តិ៍បឹងសាឡាង បានអន្តរាគមន៍ឃាត់ខ្លួន ជនសង្ស័យ និងវត្ថុតាង ( ម៉ូតូជនរគ្រោះ ) ជាក់ស្តែង នៅចំណុចផ្លូវលេខ១៩២ សង្កាត់ ទឹកល្អក់ទី៣ ខណ្ឌទួលគោក ។
បច្ចុប្បន្នជនសង្ស័យកំពុងឃាត់ខ្លួននៅ អធិការដ្ឋាននគរបាលខណ្ឌទួលគោក ដើម្បី បញ្ជូនទៅតុលាការ ចាត់ការតាមច្បាប់ ៕
ដោយ៖ ស ដារ៉ា
