ខេត្តកំពង់ស្ពឺ៖ ក្មេងប្រុស២នាក់ដើររកខ្យងក្ដាមប្រទះឃើញម៉ូតូ១គ្រឿងនៅក្បែរភ្លឺស្រែ ហើយបានរាយការណ៍ឲ្យនគរបាលប៉ុស្តិ៍ និងនគរបាលស្រុក ដើម្បីចុះទៅពិនិត្យ។
ករណីក្មេងរកក្ដាមប្រទះឃើញម៉ូតូខាងលើនេះបានកើតឡើងនៅវេលាម៉ោង៨និង៣០នាទីព្រឹកថ្ងៃទី៦ ខែមេសា ឆ្នាំ២០១៧ នៅចំណុចស្រែចុងអូរព្រីង ខាងលិចភូមិដក់ពរ ឃុំវល្លិស ស្រុកសំរោងទង ខេត្តកំពង់ស្ពឺ។
អធិការស្រុកសំរោងទងបានឲ្យដឹងថា ក្មេងប្រុសដែលប្រទះឃើញម៉ូតូខាងលើនេះទី១ឈ្មោះណា សុផានិត អាយុ១២ឆ្នាំ និងទី២ឈ្មោះឈឺន ភារម្យ អាយុ១៥ឆ្នាំ រស់នៅភូមិតាគៀត ឃុំត្រពាំងគង ស្រុកសំរោងទង ខេត្តកំពង់ស្ពឺ។ ម៉ូតូដែលក្មេងប្រុសទាំង២ប្រទះឃើញពេលដើររើសខ្ចៅខ្យង ក្រោយមានភ្លៀងធ្លាក់នេះម៉ាកហុងដាឌ្រីម សេ១២៥ ពណ៌ខ្មៅ ស៊េរី២០១៦ ពាក់ស្លាកលេខភ្នំពេញ១GJ-៨៥០៨។
លោកអធិការបញ្ជាក់ថា ម៉ូតូដែលក្មេងប្រទះឃើញនេះសង្ស័យជារបស់អ្នករស់នៅភ្នំពេញ ហើយសង្ស័យថា ចោរលួចយកមកផ្លុងចោលគ្រាដែលម្ចាស់ឬក៏ជនសង្ស័យខ្លាចសមត្ថកិច្ចតាមទាន់។
បច្ចុប្បន្នម៉ូតូខាងលើនេះបានយកមករក្សាទុកនៅអធិការដ្ឋាននគរបាលស្រុកសំរោងទង ដើម្បីសមត្ថកិច្ចអំពាវនាវស្វែងរកម្ចាស់ហើយម្ចាស់ត្រូវយកឯកសារមកផ្ទៀងផ្ទាត់យកម៉ូតូរបស់ខ្លួនទៅវិញ៕ សេនា ស័ក្តិ
