ភ្នំពេញ៖ ចោរស្រីម្នាក់បន្លំលួចយកកូនឆ្កែដាក់ចូលក្នុងថង់ភ្លាមៗត្រូវម្ចាស់គេឃើញទាន់ដេញតាមទាន់ចាប់វាយបណ្ដោយឲ្យរបួសធ្ងន់ត្រូវរថយន្តសាមុយបានដឹកជនរងគ្រោះទៅមន្ទីរពេទ្យផងដែរ។

ហេតុការណ៍គួរឲ្យភ្ញាក់ផ្អើលនេះបានកើតឡើងកាលពីវេលាម៉ោង២និង៣០នាទីរំលងអធ្រាត្រឈានចូលថ្ងៃទី១០ ខែមេសា ឆ្នាំ២០១៧ នៅចំណុចការ៉ាស់សាំងតេឡា តាមបណ្តោយផ្លូវលេខ២១៥ សង្កាត់វាលវង់ ខណ្ឌ៧មករា  រាជធានីភ្នំពេញ។

ស្រ្តីជនសង្ស័យមិនត្រូវបានស្គាល់អត្តសញ្ញណ មានអាយុជាង៣០ឆ្នាំ ស្លៀកខោខ្លី អាវដៃខ្លីក្លា មុខរបរនិងស្នាក់នៅមិនពិតប្រាកដ ។

បើតាមប្រភពព័ត៌មានពីជនរងគ្រោះបានប្រាប់ឲ្យដឹងថា មុនពេលកើតហេតុរូបខ្លួនបាននាំកូនឆ្កែមកអង្គុយលេងនៅសួនច្បារនៅមុខការ៉ាស់សាំងតេឡាមួយស្ទុះក្រោយមកស្រាប់តែឃើញស្រ្តីជនសង្ស័យខាងលើបានដើរចូលទៅកន្លែងឆ្កែរបស់គាត់ហើយបានយកថង់ដាក់កូនឆ្កែចូលទៅបម្រុងដើរចេញទៅឃើញដូច្នេះក៏បានរត់ទៅដេញតាមស្រ្តីជនសង្ស័យរហូតដល់មុខការ៉ាស់សាំងតេឡាទើបចាប់បានតែត្រូវស្រ្តីសង្ស័យយកដបមកវាយរូបខ្លួនមុនបណ្ដោយឲ្យរបួសដៃនិងក្បាលក៏ត្រូវខ្លួនឆក់បានដបវិញយកដបនោះវាយទៅលើស្រ្តីសង្ស័យវិញ បណ្ដោយឲ្យរបួសធ្ងន់តែម្តង។

ក្រោយកើតហេតុស្ត្រីសង្ស័យខាងលើត្រូវបានរថយន្តសាមុយបានដឹកយកទៅមន្ទីរពេទ្យភ្លាមៗផងដែរ៕ ស រស្មី