ភ្នំពេញ៖ យុវជនអាយុ២៣ឆ្នាំម្នាក់ ត្រូវបានប្រជាពលរដ្ឋឃាត់ខ្លួនប្រគល់ឲ្យសមត្ថកិច្ចនគរបាលប៉ុស្តិ៍ទួលសង្កែអនុវត្តទៅតាមផ្លូវច្បាប់ខណៈជនសង្ស័យបានឡើងទៅលើផ្ទះ រួចធ្វើសកម្មភាពគាស់បង្អួចប៉ុនប៉ងលួចយកទ្រព្យសម្បត្តិ តែត្រូវបានជនរងគ្រោះមកទាន់ក៏ស្រែកធ្វើឲ្យមានការភ្ញាក់ផ្អើលដល់អ្នកជិតខាងនាំគ្នាព័ទ្ធចាប់ប្រគល់ឲ្យសមត្ថកិច្ច។

ករណីខាងលើនេះបានកើតឡើងកាលពីវេលាម៉ោង៤និង៣០នាទីទៀបភ្លឺឈានចូលថ្ងៃទី១១ ខែមេសា ឆ្នាំ២០១៧ ស្ថិតនៅចំណុចផ្ទះជនរងគ្រោះ ផ្ទះលេខ៧៩ GE1 ផ្លូវកាំកូសុីធី ក្រុម៧ ភូមិគង្គាផុស សង្កាត់ទួលសង្កែ ខណ្ឌឫស្សីកែវ។

ជនសង្ស័យមានឈ្មោះ ដានី ភេទប្រុស អាយុ២៣ឆ្នាំ មានស្រុកកំណើតនៅស្រុកព្រះស្តេច ខេត្តព្រែវែង។ ចំណែកជនរងគ្រោះមានឈ្មោះ ស៊ាន ស៊ុនរាជ ភេទប្រុស អាយុ៣៣ឆ្នាំ មានទីលំនៅបន្ទប់ជួលផ្ទះខាងលើ។

បើតាមសម្តីជនរងគ្រោះរៀបរាប់ឲ្យដឹងថា មុនកើតហេតុរូបគេបានបើកម៉ូតូចេញពីទីតាំងផ្ទះទៅផ្សារ ហើយពេលត្រឡប់មកដល់ផ្ទះវិញឡើងទៅដល់បន្ទប់របស់ខ្លួន ស្រាប់តែឃើញជនសង្ស័យកំពុងធ្វើសកម្មភាពគាស់បង្អួច ខណៈនោះរូបគេក៏បានស្រែកសួរទៅលើជនសង្ស័យ«ធ្វើអ្វីនៅបន្ទប់របស់ខ្ញុំ» ស្រាប់តែឃើញដូចច្នេះ ជនសង្ស័យក៏បានផ្លោះចូលទៅក្នុងដីឡូត៍ដែលនៅក្បែរនោះ ដើម្បីរត់គេចខ្លួន តែត្រូវបានសន្តិសុខ និងប្រជាពលរដ្ឋចាប់ខ្លួនប្រគល់ឲ្យសមត្ថកិច្ចនគរបាលប៉ុស្តិ៍តែម្តង។

ជនរងគ្រោះបានបន្តទៀតថា កាល១ខែមុន រូបខ្លួនបានបាត់ទូរស័ព្ទ និងរបស់របរ ដោយសារតែជនសង្ស័យបានគាស់បង្អួចឆ្កិះយកអស់ម្តងរួចមកហើយ តែលើកនេះបានមកទាន់ បើពុំនោះទេច្បាស់ជាអស់ច្រើនជាងមុន។

បច្ចុប្បន្នជនសង្ស័យត្រូវបានឃាត់ខ្លួននៅក្នុងអធិការដ្ឋាននគរបាលខណ្ឌឫស្សីកែវ ដើម្បីចាត់ការបន្តទៅតាមផ្លូវច្បាប់៕ អរុណរះ