ភ្នំពេញ៖ កម្លាំងនគរបាលអន្តរាគមន៍ខណ្ឌពោធិ៍សែនជ័យបានចុះល្បាតពួនស្នាក់ក្នុងមូលដ្ឋានរបស់ខ្លួនដើម្បីការពារសន្តិសុខជូនប្រជាពលរដ្ឋក៏ប្រទះឃើញជនសង្ស័យ២នាក់ដើរតាមដងផ្លូវដោយមានការសង្ស័យទើបឃាត់ហៅសួរនាំនិងឆែកឆេរកឃើញថ្នាំញៀនចំនួន១០កញ្ចប់តូច កាលពីវេលាម៉ោង១០យប់ថ្ងៃទី២៤ ខែមេសា ឆ្នាំ២០១៧ នៅចំណុចភូមិគោកបញ្ជាន់ សង្កាត់ចោមចៅ ខណ្ឌពោធិ៍សែនជ័យ រាជធានីភ្នំពេញ។

សមត្ថកិច្ចបានឲ្យដឹងថា ជនសង្ស័យទី១ឈ្មេាះ ហ៊ុន បញ្ញា ភេទប្រុស អាយុ១៤ឆ្នាំ(អ្នកកាន់ថ្នាំ) និងទី២ឈ្មោះ សុខ រ៉ាវីន ភេទប្រុស អាយុ២១ឆ្នាំ មុខរបរមិនពិតប្រាកដ ស្នាក់នៅទីលំនៅផ្ទះជួលភូមិកេីតហេតុខាងលេី។

សមត្ថកិច្ចបន្តថា វត្ថុតាងដកហូតមានថ្នាំញៀនក្រាមពណ៌សថ្លា១០កញ្ចប់ថង់តូច ទូរស័ព្ទដៃ២គ្រឿង។

សមត្ថកិច្ចបន្តទៀតថា នៅមុនពេលកើតហេតុកម្លាំងអន្តរាគមន៍របស់អធិការនគបាលខណ្ឌពោធិ៍សែនជ័យដោយមានការបញ្ជាផ្ទាល់ពីលោក យឹម សារ៉ាន់ អធិការនគរបាលខណ្ឌបានចុះល្បាតក្នុងមូលដ្ឋានរបស់ខ្លួនដើម្បីពង្រឹងនិងពួនស្នាក់រាល់បទល្មើសផ្សេងៗដើម្បីការពារជូនប្រជាពលរដ្ឋ ខណៈកំពុងជិះម៉ូតូល្បាតតាមបណ្តោយផ្លូវវេងស្រេងស្រាប់តែប្រទះឃើញជនសង្ស័យ២នាក់កំពុងដើរដោយមានការសង្ស័យទើបហៅឃាត់សួរនាំ និងធ្វើការឆែកឆេរលើដងខ្លួនក៏រកឃើញថ្នាំញៀនចំនួន១០កញ្ចប់តូចទើបឃាត់ខ្លួនតែម្តង។

បច្ចុប្បន្នជនសង្ស័យទាំង២នាក់ឃាត់ខ្លួននៅផ្នែកព្រហ្មទណ្ឌពោធិ៍សែនជ័យរង់ចាំកសាងសំណុំរឿងបញ្ជូនទៅតុលាការដើម្បីចាត់ការតាមច្បាប់៕ សុខាសែនជ័យ