ភ្នំពេញ: កម្លាំងនគរបាលខណ្ឌឬស្សីកែវ សហការជាមួយនិងនគរបាលប៉ុស្តិ៍ស្វាយប៉ាក បានស្រាវជ្រាវ និងឈានទៅដល់ការចុះបង្ក្រាបចាប់ឃាត់ខ្លួនជនសង្ស័យជាជនជាតិវៀតណាម ម្នាក់ ក្នុងករណីជួញដូរថ្នាំញៀន ដោយធ្វើការដកហូតបានថ្នាំញៀនចំនួន១០កញ្ចប់ធំផងដែរ ។
មន្រី្តនគរបាលខណ្ឌឫស្សីកែវបានឲ្យដឹងថាការបង្ក្រាបនេះបានធ្វើឡើងកាលពីវេលាម៉ោង០០និង១៥នាទីរំលងអធ្រាត្រឈានចូលថ្ងៃទី២៩ ខែមេសា ឆ្នាំ២០១៧ នៅចំណុចបន្ទប់ជួលលេខ២២ ផ្សារផ្លាហ្សា ផ្លូវលំ ក្រុម៣ ភូមិឡកំបោរ សង្កាត់ស្វាយប៉ាក ខណ្ឌឬស្សីកែវ ។
ជនសង្ស័យដែលចាប់ខ្លួនបានខាងលើនេះ មានឈ្មោះ ង្វៀង យាំងទៀង ភេទប្រុស អាយុ២៩ឆ្នាំ ជនជាតិវៀតណាម ស្នាក់នៅបន្ទប់ជួលលេខ២២ ក្រុម៣ ភូមិឡកំបោរ សង្កាត់ស្វាយប៉ាក។ក្នុងនោះដែរ សមត្ថកិច្ចធ្វើការដកហូតបានថ្នាំញៀនប្រភេទ ក្រាមព៌ណសថ្លា ចំនួន១០កញ្ចប់ធំ,
ជញ្ជីងថ្លឹងគ្រឿងញៀនចំនួន១, ថង់ប្លាស្ទិចសម្រាប់ច្រកមួយចំនួន,
ឧបករណ៍សម្រាប់ប្រើប្រាស់គ្រឿងញៀនមួយចំនួន។
សមត្ថកិច្ចដដែលបានឲ្យដឹងទៀតថាមុននឹងឈានដល់ចាប់ខ្លួនបានជនសង្ស័យខាងលើគឺកម្លាំងនគរបាលប៉ុស្តិ៍ស្វាយប៉ាកបាន សហការជាមួយនឹងនគរបាលព្រហ្មទណ្ឌខណ្ឌឬស្សីកែវ ចុះល្បាតក្នុងភូមិសាស្ត្រ របស់ខ្លួនដើម្បីការពារសុវត្ថិ សន្តិសុខជូនប្រជាពលរដ្ឋ រួចក៏ឈានទៅដល់ការកំណត់មុខសញ្ញាជនសង្ស័យខាងលើនិងឈានដល់ចុះបង្ក្រាបនិងចាប់ខ្លួនបានមុខសញ្ញាជួញដូរថ្នាំញៀនបានម្នាក់តែម្តង។
បច្ចុប្បន្នជនសង្ស័យជាជនជាតិវៀតណាមរូបនេះ រួមនឹងវត្ថុតាង ត្រូវបានសមត្ថកិច្ចបញ្ជូនទៅកាន់ អធិការដ្ឋាននគរបាលខណ្ឌឫស្សីកែវ ដើម្បីកសាងសំណុំរឿងបញ្ជូនខ្លួនទៅកាន់សាលាដំបូងរាជធានីចាត់ការតាមផ្លូវច្បាប់ ៕ ប្រាថ្នា
