ទូតអាមេរិកថ្មីមកដល់ប្រទេសកម្ពុជានឹងធ្វើដំណើរគ្រប់ខេត្ត ក្រុង

ចែករំលែក៖

ភ្នំពេញ៖ លោកទូតថ្មីដែលទើបមកកម្ពុជា បានប្រកាសថាលោកនិងធ្វើដំណើរ គ្រប់ខេត្តក្រុងនៅក្នុងប្រទេសកម្ពុជា ។

ការប្រកាសនេះត្រូវបានធ្វើឡើងនៅក្នុងពិធី សច្ចាប្រណិធាន របស់អ្នកស្ម័គ្រចិត្តទីភ្នាក់ងារ Peace Corps ថ្មី ចំនួន ៦៤ នាក់ បានចូល នៅក្នុងស្ថានទូតសហរដ្ឋអាមេរិក កាលពីព្រឹកថ្ងៃទី២៥ ខែកញ្ញា ឆ្នាំ២០១៥ ប្រចាំព្រះរាជាណាចក្រកម្ពុជា ដើម្បីបំរើការងារ ដោយរស់នៅនិងធ្វើការនៅតាមសហគមន៍ជនបទ ដោយបង្រៀនភាសាអង់គ្លេស និងលើកកំពស់សុខភាព សាធារណៈ និងគំរោងនានាក្នុងសហគមន៍ ដូចជាសកម្មភាពទាក់ទងនឹងការអប់រំ បរិស្ថាន សិល្បៈ កីឡា សុវត្ថិភាពចរាចរណ៍ និងការអភិវឌ្ឍភាពជាអ្នកដឹកនាំ ក្នុងចំណោមយុវជន។

លោក William Heidt ឯកអគ្គរដ្ឋទូតសហរដ្ឋអាមេរិកប្រចាំព្រះរាជាណាចក្រកម្ពុជា ដែលទើបតែងតាំងថ្មី បានថ្លែង ជាភាសារខ្មែរ នៅក្នុងពិធីសច្ចាប្រណិធាន ចូលបំពេញការងារ របស់ក្រុមទី ៩ នៃអ្នកស្ម័គ្រចិត្តរបស់ទីភ្នាក់ងារ Peace Corps ថា “ទីភ្នាក់ងារ Peace Corps តំណាងអោយការទាក់ទងគ្នាដ៏ល្អ រវាងប្រជាជននិងប្រជាជន ដែលយើងមាន រវាងប្រទេសយើងទាំងពីរ ហើយខ្ញុំរីករាយ នឹងធ្វើដំណើរជុំវិញប្រទេសកម្ពុជា នៅក្នុងពេលប៉ុន្មានឆ្នាំខាងមុខនេះដើម្បីជួបនិងស្គាល់អ្នកស្ម័គ្រចិត្តរបស់យើងនិងស្វែងយល់ពីសហគមន៍ដែលពួកគេរស់នៅនិងធ្វើការ”។

លោក William Heidt ថ្លែងបន្តថា ក្នុងនាមជាអ្នកស្ម័គ្រចិត្តរបស់ទីភ្នាក់ងារ Peace Corps ពួកគេនឹងចូលរួមជាមួយជនជាតិអាមេរិកពិសេសចំនួនប្រហែល ២២០ ០០០ នាក់ ដែលបានចូលបំពេញការងារចាប់តាំងពីលោកប្រធានាធិបតី John F. Kennedy បានបង្កើតទីភ្នាក់ងារ Peace Corps នេះឡើងនៅឆ្នាំ ១៩៦១ ហើយពួកគេ ដើរតាមដានរបស់អ្នកស្ម័គ្រចិត្តចំនួនជាង ៤០០ នាក់ ដែលបានមកបំពេញការងារនៅកម្ពុជាតាំងពីឆ្នាំ ២០០៦ មក។ ពួកគេគឺជាមុខមាត់ពិតប្រាកដ នៃប្រទេសអាមេរិក ប្រហែលមានតែពួកគេទេដែលជាជនជាតិអាមេរិកដែលប្រជាជនកម្ពុជាភាគច្រើនស្គាល់។

លោកទូតបន្ថែមថា ក្នុងការកសាងទំនាក់ទំនងនេះម្តងមួយម្តងមួយតាមរយៈទឹកចិត្តបំរើការងារការចង់រៀនសូត្រការចង់ចែករំលែកជំនឿលើការផ្លាស់ប្តូរនិងភាពសោមនស្ស យ៉ាងច្រើនពួកគេជួយធ្វើអោយទីភ្នាក់ងារ Peace Corps បន្តនៅតែជាវិធីមួយក្នុងចំណោមវិធីល្អៗបំផុត របស់យើងក្នុងការកសាងទំនាក់ទំនងរឹងមាំ ជាមួយ ប្រទេសនិងប្រជាជនកម្ពុជា។ នៅពេលប្រជាជនកម្ពុជារៀនពីពួកគេពួកគេក៏នឹងរៀនពីប្រជាជនកម្ពុជាវិញដែរពិសេសគ្រួសារដែលគេនៅជាមួយ។ កេរ្តិ៍ដំណែលយូរអង្វែង នៃទីភ្នាក់ងារ Peace Corps ក៏ត្រូវបានគេមើលឃើញផងដែរនៅក្នុងស្ថានទូតអាមេរិកដែលក្នុងនោះសហការីជាច្រើនរបស់ខ្ញុំគឺជា អតីតអ្នកស្ម័គ្រចិត្ត ដែលបានបំពេញការងារនៅតាមកន្លែងនានា ដូចជា ប្រទេស Moldova, Zambia, Morocco, China, Thailand និងប្រទេស Cote d’Ivoire។ ពេលនេះ គេមកប្រទេសកម្ពុជាដើម្បីបំពេញការងារ តាមរបៀបថ្មី នៃការពង្រីកទំនាក់ទំនង របស់យើង។

សូមបញ្ជាក់ថា ទីភ្នាក់ងារPeace Corps ជំរុញសន្តិភាពនិងមិត្តភាពដោយបំពេញគោលដៅបីខាងក្រោមនេះ៖

ជួយប្រជាជននៅក្នុងប្រទេសដែលមានវត្តមាននៃអង្គការនេះក្នុងការបំពេញតំរូវការរបស់គេលើបុរសនិងនារីដែលមានជំនាញ។
ធ្វើអោយប្រជាជនក្នុងប្រទេសម្ចាស់ផ្ទះយល់បានកាន់តែច្រើនពីប្រជាជនអាមេរិក ។
ធ្វើអោយប្រជាជនអាមេរិកយល់បានកាន់តែច្រើនពីប្រជាជនដទៃទៀត។

ខេត្តដែលអ្នកស្ម័គ្រចិត្តធ្វើការនៅឆ្នាំ ២០១៥ បាត់ដំបង កំពង់ចាម ត្បូងឃ្មុំ កំពត ព្រៃវែង សៀមរាប ស្វាយរៀង តាកែវ ពោធិ៍សាត់ កំពង់ធំ កំពង់ស្ពឺ បន្ទាយមានជ័យកោះកុងនិងកំពង់ឆ្នាំង។

ចំនួនអ្នកស្ម័គ្រចិត្តដែលកំពុងបំពេញការងារនៅពេលនេះ (គិតត្រឹមថ្ងៃទី ២៥ កញ្ញាឆ្នាំ ២០១៥) មាន ៤៤ នាក់។ ចំនួនអ្នកស្ម័គ្រចិត្តដែលកំពុងឆ្លងកាត់វគ្គរៀនសូត្រ (នឹងបញ្ចប់វគ្គនៅថ្ងៃទី ២៥ កញ្ញាឆ្នាំ ២០១៥)មាន៦៣ នាក់។

ចំនួនអ្នកស្ម័គ្រចិត្តដែលមកបំពេញការងារ (គិតត្រឹមថ្ងៃទី ២៦ កញ្ញាឆ្នាំ ២០១៥) មាន ១០៧ នាក់។

រយៈពេលនៃការបំពេញការងារគឺ ២ ឆ្នាំ ដោយស្រី្តមាន ៦០%។

អ្នកស្ម័គ្រចិត្តរបស់ទីភ្នាក់ងារ Peace Corps នៅប្រទេសកម្ពុជារស់នៅនិងធ្វើការនៅតាមសហគមន៍ជនបទ ដោយបង្រៀនភាសាអង់គ្លេស និងលើកកំពស់សុខភាព សាធារណៈ។ អ្នកស្ម័គ្រចិត្តទាំងនោះក៏ធ្វើការផងដែរជាមួយសមភាគីកម្ពុជារបស់គេក្នុងគំរោងនានាក្នុងសហគមន៍ ដូចជាសកម្មភាពទាក់ទងនឹងការអប់រំ បរិស្ថាន សិល្បៈ កីឡា សុវត្ថិភាពចរាចរណ៍ និងការអភិវឌ្ឍភាពជាអ្នកដឹកនាំ ក្នុងចំណោមយុវជន។ រួមជាមួយនឹងក្រុមទី ៩ នៃអ្នកស្ម័គ្រចិត្តនៅខែកញ្ញាឆ្នាំ ២០១៥ នេះទីភ្នាក់ងារ Peace Corps មានអ្នកស្ម័គ្រចិត្តចំនួនជាង ៤៦៥ នាក់ ដែលបានធ្វើការនៅតាមខេត្តយ៉ាងតិចចំនួន ១៧ ខេត្តនៅទូទាំងប្រទេសកម្ពុជាគិតចាប់តាំងពីឆ្នាំ ២០០៧ មក។

ទីភ្នាក់ងារ Peace Corps នៅកម្ពុជានៅពេលនេះមានគំរោងបច្ចេកទេសចំនួនពីរ គឺគំរោងបង្រៀនភាសាអង់គ្លេស និងបណ្តុះបណ្តាលគ្រូ ហើយនិងគំរោងអប់រំសុខភាព តាមសហគមន៍។

អ្នកស្ម័គ្រចិត្ត៖

រៀបចំមេរៀននិងចូលរួមបង្រៀននៅក្នុងថ្នាក់
រៀបចំនិងបើកវគ្គបណ្តុះបណ្តាល - រៀបចំឯកសារបង្រៀន
ចូលរួមនៅក្នុងសកម្មភាពក្រៅការសិក្សា
រៀបចំបង្កើតក្លិបនិយាយភាសាអង់គ្លេស
បង្ហាញគំរូបច្ចេកទេសក្នុងការវាយតំលៃ
ចូលរួមនៅក្នុងការអភិវឌ្ឍសហគមន៍
លើកកំពស់ការយល់ដឹងលើសុខភាពមាតានិងកូនហើយនិងអាហារូបត្ថម្ភ។
ជំរុញការត្រួតពិនិត្យលើការថែទាំនៅមុននិងក្រោយពេលឆ្លងទន្លេ
លើកកំពស់ការយល់ដឹងលើវិធានការការពារប្រឆាំងនឹងជំងឺមិនឆ្លង
លើកកំពស់ការយល់ដឹងលើសុខភាពបន្តពូជនិងការប្រព្រឹត្តប្រកបដោយសុវត្ថិភាពផ្នែកផ្លូវភេទ។
ជំរុញការយល់ដឹងនិងការប្រើជំនាញថ្មីៗទាក់ទងនឹងទឹកអនាម័យល្អ៕