ខេត្តប៉ៃលិន ៖ ប្រជាកសិករក្នុងខេត្តប៉ៃលិន បានខិតខំដាំដុះដំឡូងមី រហូតមកដល់ខែឧសភានេះប្រជាកសិករនៅតាមបណ្តាខេត្តជាប់ព្រំដែនកម្ពុជាថៃ នៅតែបន្តប្រមូលផលដំឡូងមីដែលអ្នកខ្លះនៅមិនទាន់ដកលក់អស់នៅឡើយនិងអ្នកខ្លះទៀតក៍បន្តដាំជាបន្តបន្ទាប់បើទោះបីតម្លៃដំឡូងមីពេលបច្ចុប្បន្ននេះមានការធ្លាក់ចុះយ៉ាងខ្លាំងនិងពេលខ្លះគ្មានអ្នកទិញក៍ដោយក៍ពួកគាត់នៅតែបន្តដាំដោយគ្មានជំរើសនិងសង្ឃឹមថានៅឆ្នាំក្រោយនឹងបានតម្លៃខ្ពស់ជាងពេលនេះ។
លោក គ្រូ សុជាតិ ជាពលរដ្ឋរស់នៅភូមិភ្នំរាំងសង្កាត់អូរតាវ៉ៅក្រុងប៉ៃលិនដែលកំពុងដាំដំឡូងមីជាច្រើនហិចតាបានពួកគាត់បានលើកឡើងថានៅឆ្នាំមុនដំឡូងមីរបស់គាត់មិនសូវបានផលច្រើនប៉ុន្មានទេដោយជួបគ្រោះរាំងស្ងួតនារដូវប្រាំងដល់រដូវវស្សាវិញបែរជាភ្លៀងជោគជាំធ្វើឲ្យមើមដំឡូងមីគាត់រលួយមិនសូវបានផល ម្យ៉ាងទៀតតម្លៃចុះខ្លាំងទៀត ធ្វើឲ្យជីវភាពគាត់កាន់តែជួបការលំបាក និងជំពាក់បំណុលគេច្រើន តែគាត់នៅតែបន្តដាំទៀតព្រោះគ្មានមុខរបរក្រៅពីនេះ។
ចំណែកពលរដ្ឋផ្សេងទៀតដែលកំពុងដកដំឡូងមីបានត្អូញត្អែថាឥឡូវនេះតម្លៃដំឡូងមីថោកខ្លាំងណាស់គឺគេទិញក្នុងតម្លៃ១០០រៀលក្នុងមួយគីឡូក្រាម ហើយប៉ុន្មានថ្ងៃនេះតាមស្តង់ខ្លះគេអត់ទិញទៀតដឹកទៅដល់ស្តង់ហើយដឹកមកផ្ទះវិញតែពួកគាត់សុទ្ធតែខ្ចីបុលលុយគេ យកមកធ្វើដល់ពេលសងគេវិញនិងអ្នកខ្លះជួលដីគេដាំដល់ពេលគេយកដីវិញ ទោះថោកយ៉ាងណាក៍បង្ខំចិត្តដល់លក់ដែរ។ ពួកគាត់មានការព្រួយបារម្មយ៉ាងបើនៅឆ្នាំក្រោយតម្លៃដំឡូងមីនិងពោតថោកយ៉ាងនេះពួកគាត់និងលក់ដីឈបើធ្វើចំការទៀតហើយព្រោះជំពាក់គេច្រើនទៅៗ ឥឡូវនៅខេត្តប៉ៃលិននេះមិនសូវមានកម្មករធ្វើការព្រោះគេចំណាកស្រុកទៅធ្វើការនៅប្រទេសថៃស្ទើរតែស្ងាត់ស្រុកអស់ហើយ៕ ស សារ៉េត
