ខេត្តកណ្តាល ៖ កម្លាំងផ្នែកប្រឆាំងគ្រឿងញៀន សហការជាមួយកម្លាំងប៉ុស្តិ៍នគរបាលរដ្ឋបាលកោះខ្សាច់ទន្លា បានបើកប្រតិបត្តិការបង្រ្កាបមុខសញ្ញាជួញដូរនិងរក្សាទុកនូវសារធាតុញៀនខុសច្បាប់ (ម៉ាទឹកកក) ក្នុងនោះឃាត់ជនសង្ស័យបាន៦នាក់ជាបន្តបន្ទាប់ និងដកហូតវត្ថុតាងបានមួយចំនួនធំ ។
ប្រតិបត្តិការណ៍នេះធ្វើឡើងនៅភូមិចុងកោះលិច ឃុំ កោះខ្សាច់ទន្លា ស្រុកស្អាង ខេត្តកណ្ដាល កាលពីវេលាម៉ោង១០និង៤០នាទី ថ្ងៃទីថ្ងៃទី ១៤ ខែ ឧសភា ឆ្នាំ២០១៧ ។
លោកអនុសេនីយ៍ឯក ពុយ ទ្រី នាយប៉ុស្តិ៍តត្រើយស្លាបានឲ្យដឹងថា កម្លាំងផ្នែកប្រឆាំងគ្រឿងញៀន សហការជាមួយកម្លាំងប៉ុស្តិ៍នគរបាលរដ្ឋបាលកោះខ្សាច់ទន្លា បានធ្វើការឃាត់ត្រួតពិនិត្យឈ្មោះ ចែម សុខហួន និង ឈ្មោះ ពុយ ចិត្ត នៅចំណុចភូមិ ចុងកោះលិច ឃុំខ្សាច់ទន្លា ស្រុកស្អាង ខេត្តកណ្តាល និងបានរកឃើញគ្រឿងញៀនចំនួន០២កញ្ចប់តូច ។ រួចបញ្ជូនជនសង្ស័យទាំងពីរនាក់មកកាន់ប៉ុស្តិ៍នគរបាលកោះខ្សាច់ទន្លា ដើម្បីសាកសួរ ។
នៅចំពោះមុខសមត្ថកិច្ចនគរបាល ឈ្មោះ ពុយ ចិត្ត និង ឈ្មោះ ចែម សុខហួន បានសារភាពថា ខ្លួនពិតជាបានទិញគ្រឿងញៀនចំនួន០៤កញ្ចប់តូច ពីឈ្មោះ លឹម លី ភេទប្រុស អាយុ៣៩ឆ្នាំ ជនជាតិខ្មែរ មានទីលំនៅភូមិពោធិកណ្តាល ឃុំត្រើយស្លា ស្រុកស្អាង ខេត្តកណ្តាល ដើម្បីយកទៅប្រើប្រាស់ ។ ចំណែកគ្រឿងញៀនចំនួន០២កញ្ចប់តូចទៀត ខ្លួនបានអោយទៅឈ្មោះ ម៉ៃ វ៉ា ភេទ ប្រុស អាយុ៣០ឆ្នាំ ដែលអោយលុយខ្លួនទៅទិញ ។
ជាជំហានបន្ទាប់ កម្លាំងបានបន្តទៅឃាត់ខ្លួន ឈ្មោះ លឹម លី រួចធ្វើការត្រួតពិនិត្យឆែកឆេរផ្ទះរបស់ឈ្មោះ លឹម លី នៅចំណុចភូមិ ពោធិ៍កណ្តាល ឃុំត្រើយស្លា ស្រុកស្អាង ខេត្តកណ្តាលបានរកឃើញថ្នាំញៀនប្រភេទម៉ាទឹកកកចំនួន១កញ្ចប់ធំ និងបន្តទៅឃាត់ខ្លួន ឈ្មោះ ង៉ុយ ចិន , ឈ្មោះ រ៉ា ថារ៉ាន់ , ឈ្មោះ រី សុភា បានរកឃើញគ្រឿងញៀន ចំនួន ០១កញ្ចប់ធំ និង ឧបករណ៍វេចខ្ចប់ និងប្រើប្រាស់គ្រឿងញៀនមួយចំនួន។
រហូតដល់ម៉ោង១៣និង៤០នាទី ថ្ងែខែដដែល លោក លាវ ស្រេង ព្រះរាជអាជ្ញាសាលាដំបូងខេត្ត កណ្តាល បានអនុញាត្តិឲ្យធ្វើការឃាត់ខ្លួនជនសង្ស័យទាំង០៦នាក់ រួមជាមួយវត្ថុតាងបញ្ជូនមកកាន់អធិការដ្ឋាននគរបាលស្រុកស្អាង ដើម្បីសាកសួរបន្ត និងអនុវត្តន៍តាមនីតិវិធី។
ជនសង្ស័យទាំង៦នាក់ ១- ឈ្មោះ លឹម លី ភេទ ប្រុស អាយុ ៣៩ឆ្នាំ ជនជាតិ ខ្មែរ មុខរបរ លក់ថ្នាំញៀន ទីលំនៅភូមិ ពោធិកណ្តាល ឃុំ ត្រើយស្លា ស្រុកស្អាង ខេត្តកណ្តាល ,២- ឈ្មោះ ង៉ុយ ចិន ភេទ ប្រុស អាយុ ២៥ ឆ្នាំ ជនជាតិ ខ្មែរ មុខរបរ លក់ថ្នាំញៀន ទីលំនៅភូមិ ពោធិកណ្តាល ឃុំ ត្រើយស្លា ស្រុកស្អាង ខេត្តកណ្តាល ,៣-ឈ្មោះ រ៉ា ថារ៉ាន់ ភេទ ប្រុស អាយុ ២០ឆ្នាំ ជនជាតិ ខ្មែរ មុខរបរ កម្មករ ទីលំនៅភូមិ ពោធិលើ ឃុំ ត្រើយស្លា ស្រុកស្អាង ខេត្តកណ្តាល ,៤- ឈ្មោះ រី សុភា ភេទ ប្រុស អាយុ ២០ឆ្នាំ ជនជាតិ ខ្មែរ មុខរបរ កម្មករ ទីលំនៅភូមិ ពោធិលើ ឃុំ ត្រើយស្លា ស្រុកស្អាង ខេត្តកណ្តាល ,៥- ឈ្មោះ ចែម សុខហួន ហៅ ឡយ ភេទ ប្រុស អាយុ ២២ ឆ្នាំ ជនជាតិ ខ្មែរ មុខរបរ កម្មករ ទីលំនៅភូមិ ក្បាលកោះលិច ឃុំកោះខ្សាច់ទន្លា ស្រុកស្អាង ខេត្តកណ្តាល និង៦-ឈ្មោះ ពុយ ចិត្ត ភេទ ប្រុស អាយុ ២៣ ឆ្នាំ ជនជាតិ ខ្មែរ មុខរបរ កម្មករ ទីលំនៅភូមិ ក្បាលកោះលិច ឃុំកោះខ្សាច់ទន្លា ស្រុកស្អាង ខេត្តកណ្តាល ។
វត្ថុតាងចាប់យក ៖ ១-ម្សៅក្រាមពណ៌សថ្លា សង្ស័យជាគ្រឿងញៀន ប្រភេទម៉ាទឹកកក ចំនួន ០៤ កញ្ចប់ ក្នុងនោះ ធំ ០២ កញ្ចប់ និង តូច ០២ កញ្ចប់ ,២-ទូរសព្ទ័ចំនួន០១គ្រឿង ម៉ាក់ ណូគា ចុចពិល ពណ៍ខ្មែរ ,៣-ឧបករណ៍វេចខ្ចប់ និងប្រើប្រាស់គ្រឿងញៀនមួយចំនួន ៕ ស្អាងជ័យ
