ភ្នំពេញ៖ ព្រឹកថ្ងៃទី២៩ ខែកញ្ញា ឆ្នាំ២០១៥ សាលា ប៊ែលធី អន្តរជាតិ បានរៀបចំពិធីសំណេះសំណាល និងចែករំលែកនូវបទពិសោធន៍ការសិក្សារបស់សិស្សប៊ែលធីជាប់ និន្ទេស A ចំនួន ០៦នាក់ ជូនដល់សិស្សថ្នាក់ទី១២ ឆ្នាំសិក្សាថ្មី ក្រោមអធិបតីភាពលោក លី ឆេង អគ្គនាយក ប៊ែលធី គ្រុប និងជាសាកលវិទ្យាធិការ សាកលវិទ្យាល័យ ប៊ែលធី អន្តរជាតិ និងលោកជំទាវ។
តាមរបាយការណ៍លោក លី ប៊ុនឆៃ អគ្គនាយករង ប៊ែលធី គ្រុប ទទួលបន្ទុកសាលា ប៊ែលធី អន្តរជាតិ បានអោយដឹងថា៖ បច្ចុប្បន្ននេះ សាលា ប៊ែលធី អន្តរជាតិ បានពង្រីកសាខារបស់ខ្លួន ចំនួន ១៦ទីតាំង ដែលក្នុងនោះ១៥ ទីតាំងបាននឹងកំពុងដំណើរ និង១ទីតាំងទៀតកំពុងសាងសង់ និងមានសិស្សចំណេះទូទៅ និងភាសាអង់គ្លេស ទាំងពេញម៉ោង និងក្រៅម៉ោង ចំនួន ៣០.៤៥១នាក់។
នៅក្នុងឆ្នាំសិក្សាថ្មី២០១៥-២០១៦នេះ មានសិស្សថ្នាក់ទី១២ ចំនួន ១.១៧៣នាក់ ហើយឆ្នាំសិក្សា២០១៤-២០១៥កន្លងមកនេះ មានសិស្សចូលរួមប្រឡងសញ្ញាបត្រមធ្យមសិក្សាទុតិយភូមិ ចំនួន ១.១០២ នាក់ បានប្រឡងជាប់ ចំនួន ៨៦៤នាក់ ស្មើនឹង ៧៨.៤០% ក្នុងនោះជាប់និទ្ទេស A ចំនួន៦នាក់ និទ្ទេស B ចំនួន ៣២នាក់ និទ្ទេស C ចំនួន ៩៤ នាក់ និទ្ទេស D ចំនួន ១៣៨ នាក់ និង និទ្ទេស E ចំនួន ៥៩៤ នាក់ ដោយឡែកថ្នាក់ទី៩ មានសិស្សពូកែជាប់ទូទាំងរាជធានីភ្នំពេញ ចំនួន ០៧នាក់ និងជាប់សិស្សពូកែទូទាំងប្រទេស ផ្នែកអក្សរសិល្ប៍ខ្មែរ ចំនួន ០២នាក់ផងដែរ ។
ក្នុងឱកាសនោះផងដែរ លោក លី ឆេង អគ្គនាយក ប៊ែលធី គ្រុប បានកោតសរសើរដល់សិស្សនិទ្ទេសA ទាំង៦នាក់ និងសិស្សពូកែទាំងអស់ ដែលបានខិតខំប្រឹងប្រែងរៀនសូត្រ រហូតទទួលបានជោគជ័យនាពេលនេះ និងបានថ្លែងអំណរគុណដល់ មាតាបិតា និងអាណាព្យាបាលសិស្សទាំងអស់ ដែលបានបង្កលក្ខណៈឲ្យកូនរបស់ខ្លួន មានឳកាសបានសិក្សានៅផ្ទះបន្ថែម និងគោរពវិន័យសាលាបានល្អ។ លោក ក៏បានបន្ថែមទៀតថា សាលា ប៊ែលធី អន្តរជាតិ បាននឹងកំពុងពង្រឹងគុណភាពអប់រំ ចាប់តាំងពីថ្នាក់បឋមសិក្សា រហូតដល់ថ្នាក់មធ្យមសិក្សា សំខាន់គឺ ផ្នែកបង្រៀនរបស់គ្រូ និងការរៀនរបស់សិស្ស ព្រមទាំងបានរៀបបញ្ជូលកម្មវិធីថ្មីៗជាច្រើន ដូចជា ១-កម្មវិធីបង្កើន ចំណេះដឹងទូទៅ ២-កម្មវិធីពង្រឹងស្មារតី ៣-កម្មវិធីទស្សនកិច្ចសិក្សា ៤-កម្មវិធិសិក្សាតាមទូរទស្សន៍ និង ៥-កម្មវិធីប្រឡងសំណេរ ដើម្បីឲ្យសិស្សទទួលបាននូវចំណេះដឹងគ្រប់មុខវិជ្ជា ចាប់តាំងពីថ្នាក់ទី១ រហូតដល់ ថ្នាក់ទី១២ និងប្រឡងជាប់ បានភាគរយច្រើន ព្រមទាំងទទួលបានលទ្ធផលនិទ្ទេស A កាន់តែច្រើនឡើងថែមទៀត ។
ជាទីបញ្ចប់ លោក អគ្គនាយក ប៊ែលធី គ្រុប និងលោកស្រី ក៏បានប្រគល់លិខិតសរសើរ និងអាហារូបករណ៍ថ្នាក់ បរិញ្ញាបត្រ១០០% ដល់សិស្សនិទ្ទេសA ទាំង ០៦នាក់ ក្នុងនោះសិស្ស ០៥នាក់ ទៅសិក្សា នៅប្រទេសសឹង្ហបុរី និងសិស្ស ០១នាក់ទៀត ទៅសិក្សាផ្នែកពេទ្យនៅសាធារណរដ្ឋប្រជាមានិតចិន ព្រមទាំង ជួយឧបត្ថម្ភថវិកាសម្រាប់ចំណាយផ្សេងៗ ប្រចាំឆ្នាំចំនួន ៣.០០០ ដុល្លារសហរដ្ឋអាមេរិកក្នុងម្នាក់ រហូតដល់បញ្ចប់ ថ្នាក់បរិញ្ញាបត្រ ផងដែរ ៕
