ភ្នំពេញ៖ នៅថ្ងៃទី ១៩ ខែ កញ្ញា ឆ្នាំ ២០១៥ ក្រុមស្ម័គ្រចិត្តណាហ្គាវើលបេះដូងសប្បុរស ដែលដឹកនាំដោយ លោក James Ma នាយកផ្នែកទំនាក់ទំនងបុគ្គលិក និងការងារសង្គមណាហ្គាវើល បាននាំយកកាបូបដាក់សៀវភៅ សៀវភៅសរសេរ ប៊ិច និងថវិកាមួយចំនួនដើម្បីចែកជូនដល់កុមារកំព្រាដែលកំពុងរស់នៅក្នុងអង្គការអភិវឌ្ឍន៍កុមារ និងសហគមន៍ក្រីក្រ ស្ថិតក្នុងខណ្ឌពោធិ៍សែនជ័យ រាជធានីភ្នំពេញ។ កុមារទាំងនោះមានទឹកមុខញញឹមរីករាយបន្ទាប់ពីទទួលបានសម្ភារៈសិក្សា និងថវិកាពីណាហ្គាវើលបេះដូងសប្បុរស។
លោក James Ma នាយកផ្នែកទំនាក់ទំនងបុគ្គលិក និងការងារសង្គមណាហ្គាវើល បានមានប្រសាសន៍ថា “ណាហ្គាវើលបេះដូងសប្បុរស បានចែកសម្ភារៈសិក្សាទៅដល់កុមារក្រីក្រីដែលមិនមានលទ្ធភាពទិញសម្ភារៈសិក្សាដោយខ្លួនគេនៅតាមបណ្តាខេត្ត និងរាជធានីភ្នំពេញ។ យើងខិតខំព្យាយាមអស់ពីកម្លាំងកាយចិត្តដើម្បីបង្កើតបរិយាកាសសិក្សាល្អប្រសើរជាងមុនសម្រាប់កុមារដើម្បីឲ្យពួកគេអាចកសាងទំនុកចិត្ត បើទោះបីជាស្ថានភាពបច្ចុប្បន្នរបស់ពួកគេមានការលំបាកយ៉ាងណាក៏ដោយ។ តាមរយៈកិច្ចខិតខំប្រឹងប្រែងរបស់យើង យើងសង្ឃឹមថា កុមារទាំងនោះ នឹងកាន់ខិតខំប្រឹងប្រែងសិក្សារៀនសូត្រដើម្បីអនាគតភ្លឺស្វាងរបស់ខ្លួន និងសម្រាប់អនាគតនៃប្រទេសកម្ពុជាផងដែរ”។
លោក ប៊ូ សំអាត តំណាងឲ្យអង្គការអភិវឌ្ឍន៍កុមារ និងសហគមន៍ក្រីក្រ បានមានប្រសាសន៍ថា “យើងសប្បាយរីករាយណាស់ដែលឃើញបុគ្គលិករបស់ក្រុមហ៊ុនណាហ្គាវើលមកទីនេះដើម្បីជួយកុមាររបស់យើង។ នេះគឺជាលើកទី៣ហើយ ដែលណាហ្គាវើលបេះដូងសប្បុរសបានមកទស្សនកិច្ច និងបានឧបត្ថម្ភសម្ភារៈចាំបាច់មួយចំនួនដល់កុមារកំព្រាដែលរស់នៅទីនេះ។
នាពេលបច្ចុប្បន្ននេះ អង្គការអភិវឌ្ឍន៍កុមារ និងសហគមន៍ក្រីក្រ កំពុងតែជួបប្រទះនូវការខ្វះខាតថវិកា ដូចនេះហើយយើងមានការខ្វះខាតនូវការគាំទ្រលើការអប់រំរបស់កុមារ។ ណាហ្គាវើលបេះដូងសប្បុរស បានមក និងបានឧបត្ថម្ភសម្ភារៈសិក្សា និងថវិកាមួយចំនួនដល់កុមារបស់យើង។ វាមានន័យខ្លាំងណាស់ចំពោះពួកយើង។ យើងមកទីនេះដើម្បីជួយកុមារកំព្រាដែលមកពីតាមបណ្តាខេត្ត និងរាជធានីភ្នំពេញ។ កុមារមួយចំនួនក្នុងចំណោមពួកគេ គឺមានផ្ទុកមេរោគអេដស៍។ យើងសូមអរគុណយ៉ាងជ្រាលជ្រៅដល់ណាហ្គាវើលបេះដូងសប្បុរសចំពោះសណ្តានចិត្តល្អរបស់ពួកគេដែលបានជួយគាំទ្រការងាររបស់យើង”។ លោក ស៊ីម ចិន បុគ្គលិកណាហ្គាវើលដែលបានចូលរួមក្នុងកម្មវិធីនេះបានមានប្រសាសន៍ថា “កុមារទាំងនេះគឺប្រៀបដូចជាកូនរបស់យើងដែរ។ យើងស្រឡាញ់ និងយកចិត្តទុកដាក់ចំពោះពួកគេ។
យើងរីករាយណាស់ដែលបានមកលេងសួរសុខទុក្ខពួកគេ ហើយបានឧបត្ថម្ភសម្ភារៈសិក្សា និងកាបូបដាក់សៀវភៅដល់ពួកគេ។ យើងក៏បានលើកទឹកចិត្តពួកគេឲ្យរស់នៅប្រកបដោយសុទិដ្ឋិនិយម និងព្យាយាមរៀនសូត្រឲ្យអស់ពីសមត្ថភាពដើម្បីអនាគតភ្លឺស្វាងរបស់ខ្លួន។ ខ្ញុំពិតជាចូលចិត្តកម្មវិធីដែលរៀបចំដោយណាហ្គាវើលបេះដូងសប្បុរសនេះណាស់” ៕
ដោយ៖ ស ដារ៉ា
