ភ្នំពេញ៖ មនុស្សចំនួន៤នាក់បានរងរបួសធ្ងន់ស្រាលត្រូវបានរថយន្តសង្គ្រោះដឹកទៅមន្ទីរពេទ្យភ្លាមៗដោយសារតែរថយន្តកុងតឺន័ររបស់គ្រុមហ៊ុន ផែស្ងួត តេង ឡាយបើកបត់ចូលក្រុមហ៊ុនមិនប្រយ័ត្ន ។
ហេតុការណ៍នេះកើតឡើង កាលពីវេលាម៉ោង ៨និង២៥នាទីយប់ថ្ងៃទី៣០ ខែកញ្ញា ឆ្នាំ២០១៥ នៅតាមបណ្តោយផ្លូវអូដឹមកប់ស្រូវ មុខក្រុមហ៊ុនផែស្ងួត តេងឡាយ ស្ថិតក្នុងភូមិជម្ពូវ័ន សង្កាត់ចោមចៅ ខណ្ឌពោធិ៍សែនជ័យ ។
តាមប្រភពព័ត៌មានពីកន្លែងកើតហេតុបានអោយដឹងថា មុនពេលកើតហេតុគេឃើញមានម៉ូតូហុងដាសេ១២៥ ពណ៍ខ្មៅមួយគ្រឿង ពាក់ស្លាកលេខ ភ្នំពេញ 1DG-3453 បើកដោយបុរសម្នាក់ឌុបនារី៣នាក់ ធ្វើដំណើរតាមបណ្តោយផ្លូវអូឌឹម ក្នុងទិសដៅពីត្បូងទៅជើង លុះមកដល់ចំណុចកើតហេតុក៏មានរថយន្តកុងតឺន័ររបស់ក្រុងហ៊ុនផែស្ងួតតេង ឡាយ ពណ៍ក្រហម ពាក់ស្លាកលេខភ្នំពេញ3A-5729 បើកបរដោយបុរសម្នាក់ធ្វើដំណើរស្របទិសគ្នា ហើយរថយន្តបានបត់ស្តាំចូលក្រុមហ៊ុនដោយមិនបានមើលក៏ជ្រុលកិនម៉ូតូបណ្តាលអ្នកជិះម៉ូតូរងរបួសធ្ងន់ស្រាល៤នាក់ ចំណែកម៉ូតូត្រូវរថយន្តកិនចំពីលើរងការខូចខាតយ៉ាងដំណំ ។
ក្រោយពេលកើតហេតុ ជនរងគ្រោះត្រូវបានរថយន្តសង្គ្រោះដឹកទៅមន្ទីរពេទ្យភ្លាមៗ ចំណែករថយន្តនិងម៉ូតូសមត្ថកិច្ចបានធ្វើការវាស់វែង យក ទៅរក្សាទុកនៅការិយាល័យចរាចរណ៍ជើងគោករាជធានីភ្នំពេញ ដើម្បីធ្វើការដោះស្រាយតាមផ្លូវច្បាប់ ៕
...
ដោយ៖ សុខា សែនជ័យ