ខេត្តមណ្ឌលគិរី៖ បុរសម្នាក់មានតួនាទីជាមន្ត្រីនគរបាលត្រូវប្រពន្ធចុងជ្រុលដៃចាក់មួយកាំបិតចិតបន្លែត្រូវចំត្រង់ពោះបណ្តាលឲ្យធ្លាយពោះ ស្លាប់ពេលដឹកមកសង្គ្រោះនៅមន្ទីរពេទ្យកាលវេលាម៉ោង២២និង០០នាទីយប់ ថ្ងៃទី៣០ ខែកញ្ញា ឆ្នាំ២០១៥ នៅចំណុចផ្ទះជួល ឋិតក្នុងភូមិអូរស្ពាន សង្កាត់ស្ពានមានជ័យ ក្រុងសែនមនោរម្យ ខេត្តមណ្ឌលគិរី។
ប្រភពមួយចំនួនបានឱ្យដឹងថា មុនពេលកើតហេតុ ប្តីប្រពន្ធទាំង២នាក់ឈ្លោះប្រកែកគ្នា ក្នុងស្ថានភាពស្រវឹងទាំងពីរនាក់ ហើយប្រពន្ធបានយកកាំបិតមកជន្លធ្វើជាអារដៃខ្លួនឯង ឯប្តីចេះតែឃាត់ ដោយទាញទៅទាញមក ក៏ជ្រុលចំពោះប្តីលេចធ្លាយពោះវៀនចេញមកក្រៅស្លាប់ពេលដឹកចូលដល់មន្ទីរពេទ្យ ។
លោកវរសេនីយ៍ឯក សូ សុវណ្ណ ស្នងការរងនិងជាប្រធានការិយាល័យព្រហ្មទណ្ឌខេត្តមណ្ឌលគិរីបានឲ្យដឹងថា ជនរងគ្រោះឈ្មោះ ទូចចាន់ហេង ភេទ ប្រុស អាយុ ៤២ ឆ្នាំ មុខរបរ មន្ត្រីនគរបាល នៅអធិការដ្ឋាននគរបាលក្រុងសែនមនោរម្យ។ចំណែកជនសង្ស័យជាប្រពន្ធឈ្មោះ មាសចន្ទ្រា អាយុ ២៦ ឆ្នាំមានមុខរបររកស៊ីកោសជប់ ម៉ាស្សា។
បើតាមចំលើយរបស់ជនសង្ស័យជាប្រពន្ធបានសារភាពថា ខ្លួនបានយកកាំបិតបំរុង ចាក់សំលាប់ ខ្លួនឯង តែជនរងគ្រោះបានទៅឃាត់ខ្លួនក៏វាសកាំបិតបណ្តាលអោយត្រូវប្តីតែម្តងទៅខ្លួនមិនមានចេតនាចាក់ប្តីទេ។បច្ចុប្បន្នសមត្ថកិច្ចជំនាញឃាត់ខ្លួនបញ្ជូនទៅឃុំខ្លួននៅស្នងការខេត្តដើម្បីសាកសួរ កំពុងកសាងសំណុំរឿងបញ្ជូនទៅសាលាដំបូងចាត់ការតាមនីតិវិធី។ចំណែកសាកសពត្រូវបានក្រុមគ្រួសារយកទៅធ្វើបុណតាមប្រពៃណី៕
ដោយ៖ ឦសាន