ភ្នំពេញ៖ ក្រុមចោរឆក់បានធ្វសកម្មភាពឆក់កាបូបស្ពាយចំហៀងពីនារីយកទៅបាត់ធ្វឲ្យនាងដួលម៉ូតូ បោកទៅនឹងថ្នល់សន្លប់វង្វេងស្មារតីហើយត្រូវបានប្រជាពលរដ្ឋដែលនៅម្តុំនោះនាំគ្នាជួយសង្គ្រោះគក់ច្របាច់ឲ្យ ដឹងខ្លួនវិញតែមួយសន្ទុះក៏សន្លប់ទៅវិញ។
ហេតុការណ៍នេះបានកើតឡើងកាលពីវេលាម៉ោង៨ និង៥៥នាទីយប់ ថ្ងៃទី១ ខែតុលា ឆ្នាំ២០១៥ នៅចំណុចមុខក្រសួងការងារនិងបណ្តុះបណ្តាលវិជ្ជាជីវៈ តាមបណ្តោយមហាវិថីសហព័ន្ធរុស្ស៊ី ស្ថិតក្នុងសង្កាត់ទឹកល្អក់១ ខណ្ឌទួលគោក ។
សាក្សីបានឱ្យដឹងថា មុនពេលកើតហេតុគេឃើញនារីវ័យក្មេងម្នាក់ជិះម៉ូតូ ម៉ាកស្គូពី ពណ៌ឈាមជ្រូកមួយគ្រឿង ពាក់ស្លាកលេខ ភ្នំពេញ 1AQ-9145 ធ្វើដំណើរតាមបណ្តោយមហាវិថីសហព័ន្ធរុស្ស៊ី ពីកើតទៅលិច ។លុះមកដល់កន្លែងកើតហេតុស្រាប់តែមានជនសង្ស័យ២នាក់ជិះម៉ូតូ១គ្រឿង ម៉ាកហុងដា សេ១២៥ ពណ៌ខ្មៅ មិនចាំស្លាកលេខ ជិះមកពីក្រោយនាងរួចពេលជិះមកទន្ទឹមក៏ធ្វើសកម្មភាពឆក់កាបូបស្ពាយចំហៀងរបស់នាងបណ្តាលឱ្យ នាងដួលម៉ូតូបោកទៅនឹងថ្នល់សន្លប់ស្តូកស្តឹងតែម្តង។ ចំណែកក្រុមចោរបានជិះម៉ូតូគេចខ្លួនបាត់ដោយសុវត្ថិភាព។
ប្រភពព័ត៌មានបានឲ្យដឹងទៀតថា ពេលឃើញដូច្នេះ ប្រជាពលរដ្ឋដែលនៅម្តុំនោះបាននាំគ្នាជួយគក់ច្របាច់ឲ្យដឹងខ្លួនវិញតែពេលនាងដឹងខ្លួនបានមួយស្របក់និយាយបានបន្តិចក៏សន្លប់ទៅវិញ សូ ម្បីតែលេខទូរស័ព្ទទំនាក់ទំនងទៅក្រុមគ្រួសារសាច់ញាតិឬអាសយដ្ឋាននៅទីណាក៏នាងមិនចាំដែរក្រៅពីប្រាប់គេឯងថា នាងឈ្មោះថា រ័ត្ន អាយុ២៣ឆ្នាំប៉ុណ្ណោះ ។ បើតាមការពិនិត្យមើលសកម្មភាពនេះ ទំនងជានាងទើបជិះម៉ូតូចេញពីធ្វើការផង ទើបនាងជួបហេតុការណ៍ចោរឆក់កាបូបបែបនេះ ។
ក្រោយពេល កើតហេតុភ្លាមៗ សមត្ថកិច្ចនគរបាលមូលដ្ឋានបានមកដល់ជួយអន្តរាគមន៍ និងហៅរថយន្តសង្គ្រោះដឹកយកទៅសង្គ្រោះនៅមន្ទីរពេទ្យ ។ ចំណែកម៉ូតូត្រូវបានសមត្ថកិច្ចយកទៅរក្សាទុកនៅប៉ុស្តិ៍នគរបាល ទឹកល្អក់១ ដើម្បីរង់ចាំសាច់ញាតិមកទទួល ៕
ដោយ៖ ប្រាថ្នា