ភ្នំពេញ៖ នគរបាលប៉ុស្តិ៍ចោមចៅបានធ្វើការឃាត់រថយន្តតាក់ស៊ីមួយគ្រឿងដឹកម៉ូតូម៉ាកស្កុកពីចំនួន១២គ្រឿង ដែលអត់មានឯកសារគ្រប់គ្រាន់និងជាម៉ូតូគេចពន្ធទទួលផលចោរកម្ម យកទៅរក្សាទុក កាលពីវេលាម៉ោង៩និង៣០នាទីយប់ថ្ងៃទី២ ខែតុលា ឆ្នាំ២០១៥តាមបណ្ដោយផ្លូវវេងស្រេង ក្នុងភូមិត្រពាំងថ្លឹង សង្កាត់ចោមចៅ ខណ្ឌពោធិ៍សែនជ័យ ។
សមត្ថកិច្ចបានអោយដឹងថា នៅមិនពេលកើតហេតុកម្លាំងអន្តរាគមន៍ខណ្ឌពោធិ៍សែនជ័យសហការជាមួយនគរបាលប៉ុស្តិ៍ចោមចៅ ដោយមានបញ្ជាផ្ទាល់ពីលោក យឹម សារាន់ អធិការខណ្ឌពោធិ៍សែនជ័យ ចាក់កម្លាំងល្បាតក្នុងមូលដ្ឋានតាមផ្លូវវេងស្រេងដើម្បីការពារសុវត្ថិភាពជូនប្រជាពលរដ្ឋ កុំអោយមានបទល្មើសផ្សេងៗខណៈកំពុងល្បាតស្រាប់់តែប្រទះឃើញរថយន្តម៉ាក់ហ៊ីលុច ពណ៌ឈាមជ្រូកឆ្នូតទឹកប្រាក់ ពាក់ស្លាកលេខ ឆ 3733.ភព2 ជាប្រភេទរថយន្តតាក់ស៊ីមានដឹកម៉ូតូចំនួន១២គ្រឿងសុទ្ធតែម៉ាកស្កុកពីទាំងអស់។ លុះពេលសមត្ថកិច្ចសួររកមើលឯកសាររបស់ម៉ូតូបែរជាមិនមានគ្រប់គ្រាន់ ហើយម៉ូតូទាំង១២គ្រឿងនោះអត់ស្លាកលេខ ថែមទាំងដោះក្បាំងដោះស្តុបចេញអស់ហើយ ប៉ុន្តែមានម៉ូតូ៣គ្រឿងពាក់ស្លាកលេខអក្សរថៃ ទើបសមត្ថកិច្ចឃាត់យកទៅរក្សាទុកនៅប៉ុស្តិ៍នគរបាលចោមចៅ ដោយតំណាងខាងម្ចាស់ម៉ូតូអះអាងថា៣ថ្ងៃទៀតនឹងយកឯកសារមកបង្ហាញសមត្ថកិច្ច ។
តាមសម្តីរបស់អ្នកបើកបររថយន្តដឹកម៉ូតូមានឈ្មោះឈឹត ឌុល ភេទប្រុស អាយុ48ឆ្នាំមុខរបរត់តាក់ស៊ីរស់នៅភូមិអង្គតាសោម ឃុំអង្គតាសោមស្រុកត្រាំកក់ ខេត្តតាកែវ បានឲ្យដឹងថា ម៉ូតូនេះគាត់ដឹកពីឃ្លាំងរំសេវយកទៅដាក់នៅអង្គតាសោម ស្រុកត្រាំកក់ ខេត្តតាកែវ។
បើតាមសម្តីរបស់លោក សុខ ឡាយ អាយុ37ឆ្នាំទីលំនៅភូមិស្ទឹងមានជ័យ សង្កាត់ស្ទឹងមានជ័យ ខណ្ឌមានជ័យដែលជាអ្នកតំណាងចេញមុខមកអះអាងថាម៉ូតូទាំង១២គ្រឿងនេះបាននាំចេញពីឃ្លាំងរំសេវឃ្លាំងលេខ19នាំចេញទៅស្រុកត្រាំកក់ ខេត្តតាកែវ ហើយម៉ូតូទាំងអស់នេះសុទ្ធតែមានពន្ធ រង់ចាំ៣ថ្ងៃទៀតគាត់នឹងឯកសារមកបង្ហាញសមត្ថកិច្ច ។
បច្ចុប្បន្នរថយន្តដែលដឹកម៉ូតូខាងលើត្រូវបានសមត្ថកិច្ចឃាត់ទុកនៅទីស្នាក់ការនគរបាលប៉ុស្តិ៍ចោមចៅរងចាំធ្វើការស្រាវជ្រាវបន្ត ៕
...
ដោយ៖ សុខា សែនជ័យ
