ភ្នំពេញ៖ លោក ឃ្លាំង ហួត អភិបាលនៃគណៈអភិបាលខណ្ឌជ្រោយចង្វារ និងក្រុមគ្រួសារ ព្រមទាំងក្រុមប្រឹក្សាខណ្ឌ មន្ត្រីរាជការនៃសាលាខណ្ឌ និងសង្កាត់ជ្រោយចង្រវាទាំងអស់ បានចូលរួមកាន់បិណ្ឌវេនទី៦ នៅវត្តប្រជុំសាគរ ហៅវត្តថ្មី នៅក្នុងពិធីកាន់បិណ្ឌ និងភ្ជុំបិណ្ឌនេះដែរ នាព្រឹកថ្ងៃសៅរ៍ ៦រោច ខែភទ្របទ សប្តស័ក ព.ស ២៥៥៩ ត្រូវនឹងថ្ងៃទី៣ ខែតុលា ឆ្នាំ២០១៥ នេះ ស្ថិតក្នុងសង្កាត់-ខណ្ឌជ្រោយចង្វារ ។

នាឱកាសនេះដែរលោកអភិបាលខណ្ឌបាននាំយកបច្ច័យ និងទ័យវត្ថុប្រគេនដល់ព្រះសង្ឃដែលគង់ចាំព្រះវស្សាអស់រយៈកាលត្រីមាស ដែលទ័យវត្ថុទាំងនោះរួមមាន៖

1. អង្ករ២បាវ (១០០គីឡូក្រាម)
2. មី៤កេស
3. ទឹកក្រូច៤កេស
4. ទឹកសុទ្ធ៤កេស
5. ទឹកត្រី៤យួរ
6. ទឹកស៊ីអ៊ីវ៤យួរ
7. ត្រីខ១កេស
8. ទឹកដោះគោ១កេស
9. តែ៤កញ្ចប់
10. ស្ករស១ការ៉ុង(២៥Kg)
11. បច្ច័យធ្វើចង្ហាន់ ៤០០.០០០រៀល
12. បច្ច័យបង្សុកូល និងកសាង ១.៥៥០.០០០រៀល និង៤០$
13. ប្រគេនព្រះចៅអធិការវត្ត១អង្គ ៥០.០០០រៀល
14. ប្រគេនគ្រូសូត្រឆ្វេង-សូត្រស្តាំ២អង្គ ក្នុងមួយអង្គ ៣០.០០រៀល
15. ប្រគេនព្រះសង្ឃ១១អង្គ ក្នុងមួយអង្គ ២០.០០០រៀល និងបានចែកជូនក្មេងៗជាច្រើននាក់ទៀត ក្នុងមួយនាក់ ២.០០០រៀល ផងដែរ។

តាមទំនៀមទំលាបប្រពៃណីពុទ្ធសាសនា ប្រជាពលរដ្ឋខ្មែរតាំងពីបុរមបុរាណ តែងតែប្រារព្ធពិធីកាន់បិណ្ឌ និងភ្ជុំបិណ្ឌដែលប្រព្រឹត្តិឡើងចាប់ពីថ្ងៃ១រោច ខែភទ្របទ រហូតដល់ថ្ងៃ១៥រោច ដែលត្រូវនឹងថ្ងៃភ្ជុំបិណ្ឌធំ ដើម្បីឧទ្ទិសកុសលដល់បុព្វការីជន មានជីដូនជីតា ញាត្តិការទាំងប្រាំពីរសន្តាន ។

ក្នុងឱកាសដ៏មហាមង្គលនោះ លោក ឃ្លាំង ហួត បានសម្តែងនូវក្តីរីករាយ ជាមួយប្រជាពុទ្ធបរិស័ទទាំងអស់ ដែលបានអញ្ជើញចូលរួមកាន់បិណ្ឌក្នុងទីអារាមនេះ ហើយលោកក៏បានសុំបួងសួង និងឧទិ្ទសចំពោះវិញ្ញាណក្ខន្ធបុព្វការីជន និងជនស្នេហាជាតិទាំងអស់ដែលបានពលីជីវិត ក្នុងបុព្វហេតុជាតិ និងមាតុភូមិ។

ទន្ទឹមនោះ លោកអភិបាលខណ្ឌ ក៏បានថ្លែងថានឹងខិតខំគៀងគររកសប្បុរសជនពីទីជិតទីឆ្ងាយ ដើម្បីចូលរួមកសាងទីវត្តទាំងមូលឲ្យកាន់តែមានសម្រស់ស្រស់បំព្រង សមជាទីកន្លែងគោរពសក្ការៈនៃពុទ្ធសាសនិក និងក្លាយជាបេតិកភ័ណ្ឌជាតិ រក្សាបាននូវវប្បធម៌ អរិយធម៌ជាតិ ទុកជាកេរ្តិ៍​តំណែល សម្រាប់កូនចៅជំនាន់ក្រោយសិក្សាស្រាវជ្រាវ ស្វែងយល់ និងប្រើប្រាស់តរៀងទៅ ៕

ដោយ៖ ស ដារ៉ា