ខេត្តប៉ៃលិន៖ បើតាមប្រភពព័ត៌មានពីមន្ត្រីយោធាកម្ពុជានៅអង្គភាពទំនាក់ទំនងព្រំដែនកម្ពុជា-ថៃ ប្រចាំច្រកអន្តរជាតិព្រំ ខេត្តប៉ៃលិន ប្រាប់ឱ្យដឹងថា មកដល់ថ្ងៃទី៥ ខែតុលា ឆ្នាំ២០១៥ សមត្ថកិច្ចកម្ពុជា និងថៃ ពុំទាន់ស្វែរកចាប់ឃាត់ខ្លួនជនសង្ស័យបាញ់សម្លាប់ពលរដ្ឋខ្មែរម្នាក់ ស្លាប់នៅ ក្នុងដីថៃ នៃខេត្តច័ន្ទ បុរី នៅឡើយនោះទេ ។
មិនតែប៉ុណ្ណោះសូម្បីតែមូលហេតុនៃរឿងរ៉ាវពាក់ព័ន្ធនិងអំពើឃាតកម្មបាញ់សម្លាប់ពលរដ្ឋខ្មែរម្នាក់នោះ សមត្ថកិច្ចក៏ពុំទាន់ស្រាវជ្រាវរកឃើញនោះដែរគេពុំទាន់ហ៊ានសនិ្នដ្ឋានថាករណីនេះជាប់ពាក់ព័ន្ធនិងអ្វីនោះឡើយ ។ សមត្ថកិច្ចកម្ពុជា និងថៃបន្តស្រាវជ្រាវស៊ើបអង្កេតបន្តទៀត។
សូមបញ្ជាក់ថា បុរសជនជាតិខ្មែរម្នាក់ ឈ្មោះ ពេជ្រ សេត អាយុ៣៨ឆ្នាំ រស់នៅភូមិអូរឈើក្រំ ឃុំស្ទឹងកាច់ ស្រុកសាលាក្រៅ ខេត្តប៉ៃលិន កាលពីវេលាម៉ោង១០យប់ ថ្ងៃទី១ ខែតុលា ឆ្នាំ២០១៥ ត្រូវបានជនមិនស្គាល់មុខ បាញ់សម្លាប់ក្នុងដីថៃនៅលើផ្លូវជាតិចម្ងាយពីទីរួមខេត្តច័ន្ទបុរី ប្រហែលជាង៦គីឡូម៉ែត្រ។ លុះនៅថ្ងៃទី៣ ខែតុលា ទើបសមត្ថកិច្ចកម្ពុជា ប្រចាំ ការនៅច្រកអន្តរជាតិព្រំ ទទួលបានដំណឹងមកថា ជនរងគ្រោះឈ្មោះ ពេជ្រ សេដ្ឋ ត្រូវបានគេ បាញ់សម្លាប់។ ក្រោយពីទទួលដំណឹងនោះហើយ សមត្ថកិច្ចកម្ពុជា ក៏បានទំនាក់ទំនងទៅក្រុមគ្រួសារសពដើម្បីទៅទទួលសពជនរងគ្រោះនៅមន្ទីរពេទ្យក្នុងខេត្តច័ន្ទ បុរី នោះ ។សាកសព ជនរងគ្រោះឈ្មោះ ពេជ្រ សេដ្ឋ ត្រូវបានរថយន្តពេទ្យថៃ ដឹកបញ្ជូនតាមច្រកអន្តរជាតិព្រំ ដល់ ទឹកដីកម្ពុជា នៅវេលាម៉ោង៦ល្ងាច ថ្ងៃទី៣ ខែតុលា ហើយបន្ទាប់មកនៅយន់ថ្ងៃដដែលត្រូវបានក្រុមគ្រួសារ យកមកចាត់ចែងធ្វើបុណ្យតាមប្រពៃណី និងបូជានៅវត្តសារ៉ាវ៉ាន់ ក្នុងខេត្តប៉ៃលិន តែម្តង ។
គួរបញ្ជាក់ថា ជនរងគ្រោះឈ្មោះ ពេជ្រ សេដ្ឋ អាយុ៣៨ ឆ្នាំ មានប្រពន្ធឈ្មោះ ជា ស៊ីណា អាយុ៣៥ឆ្នាំ ប្រកបមុខរបរលក់ដូរលក់ដូរនៅផ្សារព្រំ មានកូនស្រី២នាក់អាយុ១២ឆ្នាំ ម្នាក់និងអាយុ៧ឆ្នាំ ម្នាក់។ ជនរងគ្រោះ ត្រូវបានក្រុមគ្រួសារមានការលាក់លៀម មិនប្រាប់ មុខរបរពិតប្រាកដនោះទេ ក៏ប៉ុន្តែបើតាមប្រភពពីអ្នកភូមិនិងធ្លាប់ស្គាល់ជនរងគ្រោះប្រាប់ឱ្យដឹងថា ឈ្មោះ ពេជ្រ សេដ្ឋ កន្លងមកជាអ្នករកស៊ីម៉ូតូគេចពន្ធ និងជាអ្នកនាំមនុស្សឆ្លងដែនខុសច្បាប់ ហើយនៅថ្ងៃកើតហេតុគេនិយាយថា ជនរងគ្រោះបានជិះរថយន្តធុនធំដឹកលួចលាក់ដឹកទំនិញចូលដីថៃ តាមច្រកអន្តរជាតិព្រំ ដោយ ខុសច្បាប់ ហើយជនរងគ្រោះមិនបានចូលផ្ទះ រស់នៅជាមួយប្រពន្ធជាង១ឆ្នាំទៅហើយ ។ ជនរងគ្រោះគេឧស្សាហ៍គេឃើញចេញចូលដីខ្មែរថៃទៅវិញទៅមក មិនដឹងថាប្រកបមុខរបរអ្វីពិតប្រាកដនោះឡើយ ៕
ដោយ៖ សំ វិច្ឆិកា
