ភ្នំពេញ ៖ សត្វគោមួយក្បាល ក្នុងចំណោមគោមួយហ្វូងដើរឆ្លងផ្លូវ ត្រូវបុរស២នាក់ជិះរ៉ឺម៉កម៉ូតូកង់បី និងម្នាក់ទៀតជិះម៉ូតូលឿនចាប់ហ្វ្រាំងមិនទាន់ក៏ជ្រុលបុកបណ្តាលអោយរងរបួសទាំង២នាក់ និងម៉ូតូកង់បីក្រឡាប់ ចំណែកគោ១ ក្បាលបានរងរបួសដួលងើបមិនរួចផងដែរ ។
ហេតុការណ៏នោះបានកើតឡើង កាលពីវេលាម៉ោង៧និង២០នាទីព្រឹកថ្ងៃទី២០ ខែកក្កដា ឆ្នាំ២០១៧ នៅលើកំណាត់ផ្លូវអូរដឹមកប់ស្រូវ ស្ថិតនៅក្នុងភូមិចែងម៉ែង សង្កាត់សំរោងក្រោម ខណ្ឌពោធិ៍សែនជ័យ រាជធានីភ្នំពេញ។
តាមប្រភពព័ត៌មានបានឲ្យដឹងថា នៅមុនពេលកើតហេតុម៉ូតូកង់បីដឹកទំនិញ ពាក់ស្លាកលេខភ្នំពេញ 1B-7826 បានបើកបរធ្វើដំណើរក្នុងទិស ដៅពីជើងទៅត្បូង ចំណែកម៉ូតូម៉ាក ស៊ុយហ្ស៊ុយគីវីវ៉ាពណ៏ខ្មៅ ពាក់ស្លាកលេខ ច-8315 ភព1 ធ្វើដំណើរក្នុងទិសដៅពីត្បូងទៅជើង ។ លុះពេលទៅដល់ ត្រង់ចំណុចកើតហេតុខាងលើ ស្រាប់តែមានគោមួយហ្វូងរត់ឆ្លងផ្លូវពីលិចទៅកើត បណ្ដាលឲ្យម៉ូតូទាំងពីរ គ្រឿងនោះវាក់ជាន់ហ្វ្រាំងមិនជាប់ ក៏បានបុកគោហើយខណៈនោះម៉ូតូង់បីបានក្រឡាប់ និងម៉ូតូវីវ៉ាបានដួល បោកទៅលើថ្នល់រងរបួសអ្នកបើកបរទាំងសង្ខាង ដោយឡែកមេគោ១ក្បាលដែលត្រូវម៉ូតូកង់បីបុកនោះ បានដួលងើបលែងរួចទៀតផង។
ក្រោយពេលកើតហេតុ នគរបាលប៉ុស្ដិ៍សំរោងក្រោមបានចុះទៅកាន់កន្លែងកើតហេតុ ហើយបានបញ្ជូនជនរង គ្រោះទៅកាន់មន្ទីរពេទ្យ និងបាននាំយកម៉ូតូទាំងពីរគ្រឿងទៅរក្សាទុកបណ្ដោះអាសន្ននៅប៉ុស្ដិ៍ ព្រមទាំងធ្វើ ការស្រាវជ្រាវ រកម្ចាស់គោឲ្យចូលខ្លួនទៅទទួលខុសត្រូវលើហេតុការណ៏នោះផងដែរ ៕ សុខាសែនជ័យ
