ក្រុមឈ្មួញរកស៊ីដឹកឈើប្រណីតក៏ដូចជាអ្នកដឹកជន្លង់ម្រេចឆ្លងកាត់ទឹកដីខេត្ដ ក្រចេះត្រូវតែបង់ប្រាក់ឱ្យមន្ដ្រីយោធាស៊ើបការណ៍ប្រចាំខេត្ដក្រចេះក្រោមអំណាច ចាត់ការរបស់លោកវរសេនីយ៍ទោ ឈឹម ផល្លី ។ គេរាយការណ៍ថា មិនថាតែនៅ ផ្លូវជាតិក្នុងស្រុកស្នួល និងស្រុកសំបូរនោះទេ ដែលមានកម្លាំងកងទ័ពក្រោមបញ្ជា របស់លោក ឈឹម ផល្លី ចាំប្រដេញរថយន្ដដឹកឈើយកប្រាក់នោះ នៅឯស្រុកឆ្លូង ក៏មានកម្លាំងលោក ឈឹម ផល្លី ចាំយកលុយពីរថយន្ដដឹកឈើដែរ ។
ប្រភពរាយការណ៍ថា រថយន្ដដឹកឈើទោះតិចក្ដីច្រើនក្ដីរាប់ទាំងរថយន្ដដឹកជន្លង់ ម្រេចផងត្រូវតែបង់ប្រាក់ឱ្យកូនចៅលោក ឈឹម ផល្លី ក្រោមលេសថា បន្ដិចបន្ដួច គ្រាន់នឹងបាយទឹក ឬថាតាមសមានចិត្ដរបស់ឈ្មួញ ។ ប៉ុន្ដែការពិតវាមិនយ៉ាង ដូច្នោះទេ? គេរាយការណ៍ថា ប្រសិនបើមិនបង់ប្រាក់ទៅតាមការទាមទារទេនោះ នឹងត្រូវលោក ឈឹម ផល្លី រាយការណ៍ឱ្យសមត្ថកិច្ចខាងតុលាការចាប់រឹបអូសយក ឈើនោះជាមិនខាន ។ គេរាយការណ៍ទៀតថា ក្រុមកូនចៅរបស់លោក ឈឹម ផល្លី ធ្លាប់ប្រដេញរថយន្ដដឹកឈើជួបគ្រោះថ្នាក់ទៀតផង ។ ជួនកាលនៅពេលដែលដេញ ឃាត់បានហើយទើបហៅជំនាញ ឬតុលាការមកជាក្រោយ ។
ក្រុមអ្នករកស៊ីដឹកទំនិញផ្សេងៗក៏បាននិយាយអំពីរឿងនេះដែរ ជាពិសេសក្រុម អ្នកដឹកជន្លង់ម្រេច ។ គេមិនដឹងថា តើក្រុមមន្ដ្រីយោធាដឺបេ មានអំណាចអ្វីខ្លះក្នុង ការបង្ក្រាបបទល្មើសនោះទេ ។ ប៉ុន្ដែយ៉ាងណាក៏ដោយប្រសិនបើមានសិទ្ធិបង្ក្រាប យ៉ាងណានោះគួរតែធ្វើជាទូទៅ មិនមែនពង្រាយកម្លាំងយកលុយគេទេ៕
