ខេត្តតាកែវ៖ ជនសង្ស័យម្នាក់ក្នុងចំណោមបក្ខពួក២នាក់ ត្រូវពលរដ្ឋចាប់វាយទ្រោមខ្លួន បន្ទាប់ពីពួកគេបានធ្វើសកម្មភាពកាច់សោកម៉ូតូ របស់អ្នកភូមិដែលបញ្ឈរទុកលើភ្លឺស្រែ បំណងលួចយកទៅ។
ហេតុការណ៍នេះ បានកើតឡើងកាលពីល្ងាច ថ្ងៃទី៦ ខែតុលា ឆ្នាំ២០១៥ នៅចំណុចភូមិចាន់ទាប ឃុំសំរោង ស្រុកត្រាំកក់ ខេត្តតាកែវ។
ប្រភពព័ត៌មានពីមន្ដ្រីនគរបាលបានឲ្យដឹងថា ពេលជនរងគ្រោះទុកម៉ូតូម៉ាក ហុងដាឌ្រីម ស៊េរី ២០០៩ ពណ៌ខ្មៅ ពាក់ស្លាក់លេខ តាកែវ1C-0027 នៅលើភ្លឺស្រែ ដើម្បីដើរមើលភ្លឺស្រែ ក៏ស្រាប់តែមានជនសង្ស័យ២នាក់ បានជិះម៉ូតូម៉ាកអ៊ែរប្ល៊ែដមកធ្វើសកម្មភាពកាច់សោ.ក រួចជិះទៅបាត់។ លុះពេលម្ចាស់ក្រឡេកទៅឃើញ ក៏ស្រែកឆោឡោឡើងដើម្បីឲ្យប្រជាពលរដ្ឋជាអ្នកភូមិជួយដេញតាម។ ចៃដន្យដោយប្រទះនឹងរថយន្ដដែលដឹកកម្មកររោងចក្រ ទើបធ្វើឲ្យជនសង្ស័ម្នាក់ដែលជិះម៉ូតូ Air Blackបានដួល ហើយត្រូវពលរដ្ឋចាប់វាយទ្រោមខ្លួនតែម្ដង។ ចំណែកជនសង្ស័យម្នាក់ទៀតបានជិះម៉ូតូជនរងគ្រោះគេចបាត់។
ក្រោយពេលចាប់បានជនសង្ស័យ ប្រជាពលរដ្ឋក៏បានរាយការណ៍ដល់សមត្ថកិច្ច ដើម្បីអន្ដរាគមន៍។ ក្រោយពីចុះដល់កន្លែងកើតហេតុ សមត្ថកិច្ចក៏បានដឹងថា ជនសង្ស័យគឺជាមុខសញ្ញាចាស់ ហើយអ្នកដែលត្រួវពលរដ្ឋចាប់បានឈ្មោះ ថន ផល្លី ភេទប្រុស អាយុ២៧ឆ្នាំ មុខរបរមិនពិតប្រាកដ សា្នក់នៅក្នុងភូមិនាល ឃុំត្រាំកក់ ស្រុកត្រាំកក់ ខេត្តតាកែវ។ រីឯអ្នកគេចខ្លួនបាត់នោះ ឈ្មោះ ប៉ាន់ ធន ភេទប្រុស អាយុ ២៩ឆ្នាំ មុខរបរមិនពិតប្រាកដ ស្នាក់នៅភូមិ-ឃុំជាមួយគ្នា៕
ដោយ៖ វិបុល
