ខេត្តពោធិ៍សាត់៖ ម៉ូតូ ២ គ្រឿងបានបុកគ្នាពេញទំហឹង ខណៈធ្វើដំណើរបញ្ច្រាស់ទិសគ្នា បណ្ដាលឱ្យបុរស ២នាក់ស្លាប់ ពេលបញ្ជូនដល់មន្ទីរពេទ្យ និងម្នាក់ទៀតរងរបួសធ្ងន់ កំពុងសម្រាកព្យាបាល នៅក្នុងមន្ទីរពេទ្យនៅឡើយ ។
ហេតុការណ៍គ្រោះថ្នាក់ចរាចរណ៍បណ្ដាលឱ្យមនុស្សស្លាប់ និងរបួសរណូករណេលខាងលើនេះ កើតឡើងកាលពីវេលាម៉ោង ១២និង៣៩នាទីរសៀល ថ្ងៃទី៦ ខែតុលា ឆ្នាំ២០១៥ នៅលើកំណាត់ផ្លូវកៅស៊ូ ត្រង់ចំណុចមុខក្លោងទ្វារវត្តព្រៃវាំង ស្ថិតក្នុងភូមិបួច្រេស ឃុំតាលោ ស្រុកបាកាន ខេត្តពោធិ៍សាត់ ។
លោកអធិការនគរបាលស្រុកបាកានបានឱ្យដឹងថា ជនរងគ្រោះឈ្មោះ ង៉ែត វិត ភេទប្រុស អាយុ ៤៤ ឆ្នាំ រស់នៅភូមិបឹងខ្នារ ឃុំបឹងខ្នារ ស្រុកបាកាន ខេត្តពោធិ៍សាត់ បានស្លាប់បន្ទាប់ពីបញ្ជូនមកមន្ទីពេទ្យបង្អែកស្រុកបាកាន ជនរងគ្រោះធ្វើដំណើរម៉ូតូ១គ្រឿង ម៉ាកវ៉េវអាល់ហ្វា ពណ៌ខ្មៅ គ្មានស្លាកលេខ ធ្វើដំណើរក្នុងទិសដៅពីជើងទៅត្បូង លុះដល់ចំណុចកើតហេតុខាងលើ បានបុកជាមួយម៉ូតូម៉ាកវ៉េវអាល់ហ្វា ពណ៌ខ្មៅ គ្មានស្លាកលេខដូចគ្នា ពេញទំហឹង ខណៈធ្វើដំណើរបញ្ច្រាស់ទិសគ្នា ដែលបើកបរដោយឈ្មោះ វឿន ម៉ឺន ភេទប្រុស អាយុ ២៧ឆ្នាំ រស់នៅភូមិរហាលទិល ឃុំតាលោ ស្រុកបាកាន ខេត្តពោធិ៍សាត់ របួសធ្ងន់ កំពុងសម្រាកព្យាបាលនៅមន្ទីពេទ្យខាងលើ និងអ្នករួមដំណើរឈ្មោះ អ៊ុន វុទ្ធី ប្រុស អាយុ ២៧ឆ្នាំ រស់នៅភូមិបឹងកក់ ឃុំតាលោ ស្រុកបាកាន ខេត្តពោធិ៍សាត់ ស្លាប់នៅពេលបញ្ជូន ទៅមន្ទីពេទ្យជាមួយគ្នា ។
លោកអធិការបន្តទៀតថា នៅហេតុការណ៍គ្រោះថ្នាក់ចរាចរណ៍នេះ សមត្ថកិច្ចនគរបាលកំពុង ស្រាវជ្រាវវាស់វែងរកមូលហេតុ ហើយម៉ូតូបង្កហេតុទាំង ២គ្រឿងរក្សាទុកនៅប៉ុស្តិ៍នគរបាលរដ្ឋបាលតាលោ ដើម្បីរង់ចាំការដោះស្រាយគ្នាជាក្រោយ ៕
ដោយ៖ ប៉ឹម ពិន
