ភ្នំពេញ៖ ម្ចាស់អាខោនហ្វេសប៊ុកមួយមានឈ្មោះថា«ផែង វណ្ណះ »ដែលពេញនិយមផងដែរចំពោះការហ៊ានរិះគន់ចំៗពីសង្គមឬថ្នាក់ដឹកនាំប្រព្រឹត្តមិនប្រក្រតីដោយមិនសំចៃមាត់ និងទទួលការគាំទ្រពីមជ្ឈដ្ឋានទូទៅ ក៏ដូចជាអ្នកនិយមលេងហ្វេសប៊ុកផងនោះ បានសម្រេចប្តឹងអ្នកកាន់ផេក Facebook ការិយាល័យនគរបាលចរាចរផ្លូវគោករាជធានីភ្នំពេញ។ នេះបើតាមការលើកឡើងលើផេករបស់ខ្លួន ពាក់ព័ន្ធនិងផេកនគរបាលចរាចរបានប្រមាថមើលងាយយ៉ាងធ្ងន់ដល់កូនរបស់គាត់។
ម្ចាស់អាខោនហ្វេសប៊ុកមួយមានឈ្មោះថា«ផែង វណ្ណះ »បាននិយាយយ៉ាងដូច្នេះថា៖ អាទិត្យក្រោយខ្ញុំនឹងរៀបចំពាក្យបណ្ដឹងទៅព្រះរាជអាជ្ញាអមសាលាដំបូងរាជធានីភ្នំពេញ ដើម្បីស្រាវជ្រាវរកមុខអ្នកកាន់ផេក Facebook ការិយាល័យនគរបាលចរាចរផ្លូវគោករាជធានីភ្នំពេញ យកមកផ្ដន្ទាទោសតាមច្បាប់ បន្ទាប់ពីផេក Facebook ការិយាល័យនគរបាលចរាចរផ្លូវគោករាជធានីភ្នំពេញ បានប្រមាថកូនស្រីខ្ញុំយ៉ាងធ្ងន់ធ្ងរមិនអាចលើកលែងបាន ។
លោកបន្តថា៖ កន្លងមកខ្ញុំបានដាក់ពាក្យបណ្ដឹងទៅអគ្គស្នងការនគរបាលជាតិ តែស្ងាត់ឈឹងរហូតមកដល់ថ្ងៃនេះ ។
ដូច្នេះខ្ញុំត្រូវបន្តរឿងក្ដីទៅមុខទៀត មិនអាចអោយជនល្មើសបង្កើត ផេក Facebook អង្គភាពកងកម្លាំងមកប្រមាថពលរដ្ឋតាមអំពើចិត្តនោះទេ៕
ដោយ៖ សិលា
