ខេត្តតាកែវ ៖ ជីរណា និងសសៃគុយទាវបាញ់កាញ់ ដែលលក់នៅក្នុងផ្សារតាកែវមួយចំនួន ត្រូវបានរកឃើញថាមាននូវសំណល់ជាតិពុលដែល ការរកឃើញសំណលជាតិពុលនេះនៅព្រឹកថ្ងៃទី១៦ ខែសីហា ឆ្នាំ២០១៧ ដោយរថយន្តពិសោធន៍ចល័តរបស់អគ្គនាយកដ្ឋានកាំកុងត្រូលបានចុះត្រួតពិនិត្យទំនិញ បន្លែ ផ្លែឈើនៅក្នុងផ្សារតាកែវ។
បន្ទាប់មកមន្ត្រីក៏បានដកហូតបន្លែផ្លែឈើជាគំរូចំនួន៥៦មុខ សម្រាប់យកទៅពិសោធន៍ក្នុងរថយន្តចល័ត ជាលទ្ធផលក្រោយពីពេលធ្វើតេស្តពិសោធន៍លើបន្លែ ផ្លែឈើ និងសសៃគុយទាវហើយនោះ មន្ត្រីជំនាញកាំកុងត្រូលបានរកឃើញនូវសំណល់ថ្នាំកសិកម្មនៅលើជីរណា និងសារធាតុប៉ូរ៉ាក់លើសសៃគុយទាវបាញ់កាញ់។ ទំនិញដែលរកឃើញ នូវសារធាតុគីមីហាមឃាត់ និងសំណល់ថ្នាំកសិកម្មនេះ មន្ត្រីជំនាញកាំកុងត្រូលនឹងចាត់ វិធានការណ៍ដោយហាមមិនឲ្យចរាចរណ៍លើទីផ្សារតទៅទៀតទេ ។
នៅក្នុងយុទ្ធនាការណ៍ត្រួតពិនិត្យទំនិញ បន្លែ ផ្លែឈើដោយរថយន្តពិសោធន៍ ចល័តកាំកុងត្រូលនេះ ធ្វើឡើងក្រោមការដឹកនាំ និងចូលរួមដោយលោក ខាន់ សុខា អភិបាលរងខេត្តតាកែវ លោក ប៉ោ លាងគង់ ប្រធានសាខាកាំកុងត្រូលខេត្ត សហការជាមួយ និងមន្ត្រីមន្ទីរពាណិជ្ជកម្មខេត្ត និងមន្ត្រីនគរបាលប្រចាំការនៅផ្សារតាកែវ ។
ក្រោយពេល រថយន្តពិសោធន៍មន្ត្រីជំនាញកាំកុងត្រូលរកឃើញថាមានកាកសំណល់ជីកសិកម្មនៅលើជីរណា និងសារធាតុគីមីប៉ូរ៉ាក់នៅលើសរសៃគុយទាវបាញ់កាញ់នោះលោក ខាន់ សុខា បាន អំពាវនាវឲ្យបងប្អូនប្រជាពលរដ្ឋក្នុងខេត្តតាកែវទាំងអស់ ត្រូវមានការប្រុងប្រយ័ត្នលើប្រភេទសរសៃគុយទាវបាញ់កាញ់ និងជីរណានេះ ព្រោះថាប្រសិនជាបងប្អូនបរិភោគអាចនិងប៉ះពាល់ដល់សុខភាពខ្លាំង ។
ដូច្នេះដើម្បីសុខមាលភាពរបស់បងប្អូនប្រជាពលរដ្ឋទាំងអស់គ្នា យើងគួរបញ្ឈប់ការបរិភោគលើសរសៃគុយទាវបាញ់កាញ់ណាសង្ស័យមានថ្នាំពុលពីព្រោះថា ការផលិតរបស់ពួកគាត់ភាគច្រើនគឺបានដាក់នៅសារធាតុគីមីប៉ូរ៉ាក់ច្រើនទៅលើសរសៃគុយទាវបាញ់កាញ់ ដើម្បីរក្សាបានយូរ និងសាច់ស្វិត ។ ជាក់ស្តែងឆ្លងកាត់ការពិនិត្យរបស់មន្ត្រីជំនាញកាំកុងត្រលមួយរយៈ កន្លងមកនេះ គឺមានពីរករណីហើយដែលមន្ត្រីជំនាញចាប់បាននិងរកឃើញនៅសរសៃគុយទាវប្រភេទបាញ់កាញ់នេះដែលសុទ្ធសឹងតែបានដាក់នៅសារធាតុគីមីប៉ូរ៉ាក់កំរិតខ្ពស់៕ ភ្នំដា
