ខេត្តសៀមរាប៖ កិច្ចប្រជុំបានធ្វើឡើងនាព្រឹកថ្ងៃទី៩ ខែតុលា ឆ្នាំ២០១៥ នៅទីបញ្ជាការកងពលធំអន្តរាមន៍លេខ២ ស្ថិតក្នុងស្រុកក្រឡាញ់ ខេត្តសៀមរាប ក្រោមអធិបតីភាពអគ្គមេបញ្ជាការរង និងជានាយសេនាធិការចម្រុះកងយោធពលខេមរភូមិន្ទ នាយឧត្តមសេនីយ៍ គន់ គីម ។
នាយឧត្តមសេនីយ៍ ជា តារា ដែលជាអគ្គមេបញ្ជាការរង និង មេបញ្ជាការប្រចាំទិសយោធភូមិភាគទី៤ មេបញ្ជាការតំបន់ប្រតិបត្តិការសឹករងតាមបណ្តាខេត្តជាប់ព្រំដែនមួយចំនួន ក៏មានវត្តមាននាឱកាសនោះដែរ។ តាមសេចក្តីរាយការណ៏របស់គណៈបញ្ជាការឯកភាពទិសទី៣បានឲ្យដឹងថា៖ ក្នុងរយៈពេល១ឆ្នាំមកនេះ សភាពការណ៏សន្តិសុខតាមបណ្តាយព្រំដែន រវាងកម្ពុជា នឹងថៃ ជាមូលដ្ឋានគឺស្ថិតក្នុងសភាពមានលំនឹងល្អ។ តែទោះជាយ៉ាងនេះក្តីក៏កងកម្លាំងនៃកងយោធពលខេមរភូមិន្ទ នៅតែបន្តយកចិត្តទុកដាក់ដល់ពង្រឹងប្រៀប ការពារជាតិជាប់ជាប្រចាំ ដោយធ្វើការតាមដានគ្រប់គ្រងសភាពការណ៏ ការចេញល្បាតត្រួតពិនិត្យភូមិសាស្ត្រ និង ការរក្សាទំនាក់ទំនងល្អជាមួយកម្លាំងប្រទេសជិតខាង។
សេចក្តីរាយការណ៏បានឲ្យដឹងទៀតថា៖ក្រៅពីកិច្ចការងារស្នូល បណ្តាកងឯកភាពនៃទិសទី៣ ក៏នៅបានយកចិត្តទុកដាក់ក្នុងកិច្ចការងារបង្កបង្កើនផល ការដាំដំណាំរួមផ្សំ និងចិញ្ចឹមសត្វ ដើម្បីលើកកម្ពស់ជីវភាពប្រចាំថ្ងៃ ។
មានប្រសាសន៏នោះ នាយឧត្តមសេនីយ៍ គន់ គីម បានថ្លែងកោតសរសើរដល់កងកម្លាំងឈរជើងតាមបណ្តោយព្រំដែនទិសទី៣ទាំងអស់ ព្រមទាំងបានរលឹកពីភារកិច្ចការពារបូរ ណភាពដែនដី រក្សាស្ថិរភាពព្រំដែន តាមបទបញ្ជា និងអនុសាសន៍១០ចំណុចរបស់សម្តេចតេជោ ហ៊ុន សែន ដែលដាក់ចេញគោលដៅជាយុទ្ធសាស្ត្រក្នុងការប្រែក្លាយតំបន់ព្រំដែនជាតំបន់មិត្តភាព សន្តិភាព សហប្រតិបត្តិការ និងការអភិវឌ្ឍន៍ ៕
