កាលពីថ្ងៃទី៨ ខែតុលា ឆ្នាំ២០១៥ ថ្នាក់ដឹកនាំកម្លាំងយោធារុស្ស៊ី និងអ៊ីស្រាអែលបានជួបពិភាក្សាគ្នាដើម្បីស្វែងរកយន្តការរួមមួយដើម្បីបញ្ចៀសកុំឲ្យគ្រោះថ្នាក់កើតឡើងរវាងកងកម្លាំងយោធារុស្ស៊ី និងកងកម្លាំងទាហានអ៊ីស្រាអែល ខណៈ ដែលកងទ័ពរុស្ស៊ីបាននិងកំពុងធ្វើប្រតិបត្តិការវាយប្រហារតាមដែនអាកាសប្រឆាំងទៅលើក្រុមរដ្ឋអ៊ិស្លាមស្ថិតនៅក្នុងទឹកដីស៊ីរី ។ នេះបើតាមការបញ្ជាក់ឲ្យដឹងពីកងកម្លាំងការពារជាតិអ៊ីស្រាអែល (IDF) ។
សេចក្តីថ្លែងការណ៍របស់កម្លាំងទាហានអ៊ីស្រាអែលបានបញ្ជាក់ថា កាលពីសប្តាហ៍មុនក៏មានការជួបពិភាក្សាកើតឡើងផងដែររវាងកម្លាំងយោធាអ៊ីស្រាអែល នឹងកងកម្លាំងយោធារុស្ស៊ី ទាក់ទងបញ្ហាខាងលើនេះ ។ កិច្ចពិភាក្សានោះ ភាគីទាំងពីរបានយល់ព្រមបង្កើតយន្តការរួមមួយដើម្បីបញ្ចៀសគ្រោះថ្នាក់កុំឲ្យកើតមានរវាងកងកម្លាំងយោធាប្រទេសទាំងពីរ ។ ជាមួយគ្នានេះដែរ ភាគីទាំងពីរនឹងជួបពិភាក្សាគ្នាបន្ថែមទៀតក្នុងបញ្ហានេះនៅទីក្រុងមូស្គូដែលនឹងត្រូវធ្វើឡើងនៅក្នុងខែខាងមុខ ។
នាយអគ្គសេនាធិការរងរបស់ប្រទេសរុស្ស៊ី លោក Nikolai Bogdanovski បានទៅកាន់ទីក្រុងតែលអាវីវ កាលពីថ្ងៃទី៧ ខែតុលា ឆ្នាំ២០១៥ រួមជាមួយមន្ត្រីយោធាជាន់ខ្ពស់ផងដែរ ដើម្បីជួបជាមួយសមភាគីអ៊ីស្រាអែលដែលមានលោក Yair Golan ជាប្រធានគណៈប្រតិភូ និងជាម្ចាស់ផ្ទះក្នុងកិច្ចប្រជុំនេះ ។ កិច្ចពិភាក្សានេះបានធ្វើឡើងក្រោយពីនាយករដ្ឋមន្ត្រីអ៊ីស្រាអែល លោកបែនចាមីន នេតាន់យ៉ាហ៊ូ និងលោកវ្ល៉ាឌីមៀរ ពូទីន ប្រធានាធិបតីរុស្ស៊ីបានយល់ព្រមសម្របសម្រួលគ្នារួចហើយកាលពីអំឡុងពេលមេដឹកនាំប្រទេសទាំងពីរជួបគ្នានៅទីក្រុងមូស្គូនោះ ។
ប្រភពពី IDF បានបញ្ជាក់ថា នៅក្នុងអំឡុងពេលកិច្ចពិភាក្សានោះ ភាគីទាំងពីរបានផ្តោតសំខាន់ទៅលើសកម្មភាពសម្របសម្រួលទៅលើការវាយប្រហារតាមផ្លូវអាកាស ផ្លូវទឹក ក៏ដូចតាមប្រព័ន្ធបច្ចេកវិទ្យាដទៃផ្សេងទៀត ។
មន្ត្រីការពារជាតិអ៊ីស្រាអែលបានបញ្ជាក់ថា ភាគីទាំងពីរបាននិងកំពុងពិភាក្សាទៅរកការព្រមព្រៀងគ្នាមួយ ប៉ុន្តែព័ត៌មានលម្អិតមិនទាន់ត្រូវបានបញ្ចេញប្រាប់ជាសាធារណៈនៅឡើយ ។
ប្រភពបានបញ្ជាក់ថា ការដឹកនាំវាយប្រហារពីលើដែនអាកាសរបស់កងទ័ពរុស្ស៊ីនៅក្នុងប្រទេសស៊ីរីបានធ្វើឲ្យប៉ះពាល់ផងដែរដល់ប្រព័ន្ធរ៉ាដារបស់អ៊ីស្រាអែលដែលដាក់នៅតាមបន្ទាត់ព្រំដែនជាមួយស៊ីរីនោះ ។
កាលពីសប្តាហ៍មុននេះ រុស្ស៊ីបានចាប់ផ្តើមធ្វើប្រតិបត្តិការវាយប្រហារពីលើដែនអាកាសប្រឆាំងទៅលើក្រុមរដ្ឋអ៊ីស្លាមនៅលើទឹកដីស៊ីរី ។ ប្រទេសរុស្ស៊ីទើបតែបានវត្តមានកម្លាំងយោធារបស់ខ្លួននៅលើទឹកដីស៊ីរីនាពេលនេះ បន្ទាប់ពីនៅទីនោះមានការផ្ទុះសង្គ្រាមស៊ីវិលយ៉ាងបង្ហូរឈាមតាំងពីឆ្នាំ២០១១មកម្ល៉េះ ។ រុស្ស៊ីបានអះអាងថា សកម្មភាពរបស់ខ្លួនគឺក្នុងគោលដៅបោសសម្អាតក្រុមឧទ្ទាមរដ្ឋអិស្លាមឲ្យអស់ពីទឹកដីស៊ីរី ។
ប៉ុន្តែទោះបីមានការអះអាងបញ្ជាក់បែបនេះពីរុស្ស៊ីក៏ដោយ ក៏អាមេរិក និងសម្ពន្ធមិត្តបានសម្តែងការព្រួយបារម្ភចំពោះសកម្មភាពរបស់កងកម្លាំងយោធារុស្ស៊ីដែលមិនត្រឹមតែប្រឆាំងទៅលើក្រុមរដ្ឋអ៊ីស្លាមប៉ុណ្ណោះទេ ថែមទាំងបោសសម្អាតក្រុមប្រឆាំងរដ្ឋាភិបាលស៊ីរីដែលទទួលការគាំទ្រ និងឧបត្ថម្ភពីអាមេរិក និងសម្ពន្ធមិត្តលោកខាងលិចនោះទៀតផង ។
អ៊ីស្រាអែលបានប្រកាន់ជំហរថា ខ្លួនមិនបានអន្តរាគមន៍ទៅក្នុងសង្គ្រាមស៊ីវីលដែលកំពុងកើតឡើងនៅក្នុងប្រទេសស៊ីរីនោះទេ ប៉ុន្តែខ្លួនការពារយ៉ាងខ្លាំងក្លាទាក់ទងផលប្រយោជន៍ និងសុវត្ថិភាពរបស់អ៊ីស្រាអែលតែប៉ុណ្ណោះ ៕
ប្រែសម្រួល៖ ម៉ែវ សាធី
