ខេត្ដឧត្តរមានជ័យ ៖ លោក នាយឧត្តមសេនីយ៍ គន់ គីម អគ្គមេបញ្ជាការរង នាយសេនាធិការចម្រុះ នៃកងយោធពល ខេមរភូមិន្ទ និងជាអនុប្រធានទី១ បញ្ជាការសមរភូមិព្រំដែនកម្ពុជា-ថៃ បានណែនាំដល់កងទ័ពក្នុង ទីបញ្ជាការវរសេនាតូចលេខ ៤១២ ទាំងអស់ ត្រូវពង្រឹងសមត្ថភាពក្នុងការសិក្សាជំនាញយុទ្ធវិធីកងទ័ព ទាក់ទងនឹងការប្រើប្រាស់ផែនទី និងភូមិសាស្រ្ដឲ្យបានច្បាស់លាស់ ។
ក្នុងពិធីបិទវគ្គហ្វឹកហ្វឺនកងទ័ពនៅសមរភូមិព្រំដែនកម្ពុជា ថៃ កាលពីថ្ងៃទី៣១ ខែសីហា ឆ្នាំ២០១៧ នៅទីបញ្ជាការវរសេនាតូចលេខ៤១២ ស្រុកត្រពាំងប្រាសាទ ខេត្តឧត្តរមានជ័យ លោក នាយឧត្តមសេនីយ៍ គន់ គីម បានមានប្រសាសន៍ថា នាយទាហាន នាយទាហានរង និងពលទាហាន ទាំងអស់ ត្រូវយកចិត្តទុកដាក់ក្នុងការសិក្សា ការឈ្វេងយល់ និងចេះប្រើប្រាស់យុទ្ធវិធីរបស់កងទ័ពដូចជា មុខវិជ្ជាលំហាត់របៀប មុខវិជ្ជាយល់ដឹងរួមអំពីផែនទី និងភូមិសាស្ត្រ មុខវិជ្ជាការងារគ្រប់គ្រង មុខវិជ្ជា សព្វាវុធ បច្ចេកទេស អាវុធថ្មើរជើង មុខវិជ្ជាយុទ្ធវិធី មុខវិជ្ជាភស្តុភារ មុខវិជ្ជាសុខាភិបាល មុខវិជ្ជាអប់រំចិត្ត សាស្ត្រ ជាដើម។
លោក នាយឧត្តមសេនីយ៍ បានបញ្ជាក់ថា ការហ្វឹកហ្វឺននេះ នឹងជួយដល់សិកា្ខកាមបានយល់ដឹង និងយកទៅប្រើប្រាស់បានតាមគោលដៅរៀងៗខ្លួន ដើម្បីរក្សាសន្តិសុខសណ្ដាប់ធ្នាប់តាមបណ្ដោយព្រំដែន ឲ្យបានល្អ និងស្របតាមប្រសាសន៍ របស់ប្រមុខរាជរដ្ឋាភិបាលដែលបានលើកឡើងថា ការពារទឹកដីមិន ឲ្យបាត់សូមតែ១មីលីម៉ែត្រ ពីប្រទេសជិតខាងឈ្លានពាននោះឡើយ។
លោកឧត្តមសេនីយ៍ត្រី នាង ឃីម មេបញ្ជាការកងពលតូចថ្មើរជើងលេខ៤១ បានអានរបាយ ការណ៍សង្ខេបទាក់ទងដំណើរការវគ្គហ្វឹកហ្វឺនទាក់ទងនឹង អនុវត្តន៍តាមសច្ចាប័នស្តីពីការងារហ្វឹកហ្វឺនកង យោធពលខេមរភូមិន្ទឆ្នាំ២០១៧ របស់គណៈកម្មការដឹកនាំការងារបណ្តុះបណ្តាល និងហ្វឹកហ្វឺនកងយោធ ពលខេមរភូមិន្ទ។
លោក ស ថាវី អភិបាលនៃគណៈអភិបាលខេត្តឧត្តរមានជ័យបានសម្ដែងនូវការកោតសរសើរ ចំពោះកងខេមរភូមិន្ទ ដែលមានសុឆន្ទៈស្នេហាជាតិ ហ៊ានលះបង់អាយុជីវិតដើម្បីជាតិមាតុភូមិ តួយ៉ាងដូច សភាពការណ៍កាលពីថ្ងៃទី១១ និង១២ ខែសីហាកន្លង មក តាមព្រំដែនកម្ពុជា-ឡាវនៅតំបន់អូរអាឡៃ និងតាង៉ាវស្ថិតក្នុងភូមិសាស្រ្តស្រុកសៀមប៉ាងខេត្តស្ទឹងត្រែង ឃើញថាកងទ័ពកម្ពុជាបានស្រុះស្រួលឯក ភាពគ្នា និងបានទប់ស្កាត់ទាន់ពេលវេលា ដែលធ្វើឲ្យសភាពការណ៍វិលទៅរកសភាពដើមវិញ៕ ហេង សូរិយា
