ភ្នំពេញ ៖ នាព្រឹកថ្ងៃទី៩ ខែកញ្ញា ឆ្នាំ២០១៧ សម្តេចអគ្គមហាសេនាបតីតេជោ ហ៊ុន សែន នាយក រដ្ឋមន្រ្តីបានអញ្ជើញចុះសួរសុខទុក្ខ និងសំណេះសំណាលជាមួយបងប្អូនប្រជាពលរដ្ឋ និងអាជីវករនៅក្នុង ផ្សារអូឡាំ ពិក រាជធានីភ្នំពេញ ដើម្បីពិនិត្យអំពីស្ថានភាពលក់ដូររបស់បងប្អូន និងការរីកចម្រើននៅក្នុងផ្សារ ។

ក្នុងឱកាសដ៏វិសេសវិសាលនេះ សម្តេចតេជោនាយករដ្ឋមន្ត្តី ត្រូវបានទទួលស្វាគមន៍យ៉ាងរីករាយរាក់ទាក់ពីសំណាក់ប្រជាពលរដ្ឋ ដែលមានអ្នកខ្លះចាប់ឱប ចាប់ថើប ចាប់ដៃ និងចាប់សុំថតរូប (Selfie) អស់ជាង ២ម៉ោងនៅក្នុងផ្សារ។ បងប្អូនប្រជាពលរដ្ឋទាំងក្មេងចាស់ប្រុសស្រី គឺម្នាក់ៗគោរពស្រឡាញ់ សម្តេចតេជោ ហើយស៊ូរង់ចាំ ជួបសម្តេច ទោះបីយូរបន្តិចមែន ហើយចង្អៀតណែនយ៉ាងណា ក៏បងប្អូនបាននៅរង់ចាំ សម្តេចតេជោ គ្រប់ៗគ្នា។ ម្នាក់ៗ មានទឹកមុខរីករាយ រំភើបហើយលាន់មាត់សរសើរថា សម្តេចតេជោ នៅខាងក្រៅ ទូរទស្សន៍គឺឃើញនៅក្មេងហើយស្អាតជាងក្នុងទូរទស្សន៍។

សម្តេចតេជោ ហ៊ុន សែន នឹងបន្តជួបជាមួយបងប្អូនកូនក្មួយកម្មករ កម្មការនី នៅតាមរោងចក្រនានា និង បងប្អូនអាជីវករ ពាណិជ្ជករ នៅតាមផ្សារនានាក្នុងទីក្រុងភ្នំពេញ ដើម្បីបានដឹងអំពីសុខទុក្ខបងប្អូន ក៏ ដូចជាទទួលនូវសំណូមពរ និងសំណើរចាំបាច់ផ្សេងៗរបស់បងប្អូនដើម្បីជួយជំរុញអោយការងាររកស៊ី ទទួលទានរបស់បងប្អូនកាន់តែរីកចម្រើន​  ៕