ភ្នំពេញ៖ ជនសង្ស័យម្នាក់ក្នុងចំណោម២នាក់ត្រូវនគរបាលប៉ុស្តិ៌បឹងកក់ទី១ ឃាត់ខ្លួនបន្ទាប់ពីពួកគេបានធ្វើសកម្មភាពគាស់ទ្វាផ្ទះរបស់ប្រជាពលរដ្ឋតែមិនបានសម្រេច ក៏ត្រូវប្រជាពលរដ្ឋប្រទះឃេីញដេញចាប់បានម្នាក់ ចំណែកឯបក្ខពួកម្នាក់ទៀតរត់គេចខ្លួនបាត់ ។

ករណីឃាត់ខ្លួនជនសង្ស័យខាងលេីនេះ បានកើតឡើងកាលពីវេលាម៉ោង០១និង១០នាទីរំលងអធ្រាត្រ ឈានចូលថ្ងៃទី១៤ ខែតុលា ឆ្នាំ២០១៥ ស្ថិតនៅចំណុចដីឡូត៍មួយកន្លែង តាមផ្លូវលេខ៦០៨ ក្រុម៥៦ ភូមិ១៤ សង្កាត់បឹងកក់១ ខណ្ឌទួលគោក ។

ជនសង្ស័យឈ្មោះ លី ណូរ៉ា ហៅតោ ភេទប្រុស អាយុ២៩ឆ្នាំ ស្នាក់នៅផ្ទះជួល ផ្លូវ២៧៣ សង្កាត់ទួលសង្កែ ខណ្ឌឬស្សីកែវ រាជធានីភ្នំពេញ និងមុខរបរមិនពិតប្រាកដ។ ចំណែកផ្ទះជនរងគ្រោះ ឈ្មោះ ភី ផរ ភេទស្រី អាយុ៥៣ឆ្នាំ ស្នាក់នៅចំណុចដីឡូត៍ទំនេរ ផ្លូវលេខ៦០៨ ក្រុម៥៦ ភូមិ១៤ សង្កាត់បឹងកក់១ ខណ្ឌទួលគោក រាជធានីភ្នំពេញ និងមុខរបរមេផ្ទះ ។

តាមប្រភពព័ត៍មានពីមន្រ្តីនគរបាលមូលដ្ឋាន បានឲ្យដឹងថា នៅមុនពេលឃាត់ខ្លួនជនសង្ស័យខាងលើនេះ គឺជនរងគ្រោះ កំពុងតែរៀបចំបបរសាច់ជ្រូកនៅក្នុងផ្ទះ ខណៈនោះ ក្មួយប្រុសរបស់ជនរងគ្រោះ បានរត់មកប្រាប់ជនរងគ្រោះ ថា មានជនសង្ស័យ២នាក់ចូលលួចសម្ភារៈ  ពេលនោះជនរងគ្រោះក៏បានចេញមកក្រៅឃើញមានជនសង្ស័យ២នាក់ជិះម៉ូតូ១គ្រឿងម៉ាកហុងដាសេ១០០ (សង់កូរ៉េ) ស្រាប់តែម្ចាស់ផ្ទះឃើញបែបនេះបានស្រែកឆោឡោ ក៏បានអ្នកជិតខាងចេញមកជួយអន្តរាគមន៍ ហេីយជនសង្ស័យភ័យក៏បានឡើងជិះម៉ូតូគេចខ្លួនបាត់ភ្លាម ។ ចំណែកឯបក្ខម្នាក់ទៀតត្រូវប្រជាពលរដ្ឋជិតខាងឡេីងព័ទ្ធចាប់ខ្លួនប្រគល់ជូនសមត្ថកិច្ច តែម្ដង ។

បច្ចុប្បន្នជនសង្ស័យត្រូវសមត្ថកិច្ចឃុំខ្លួនបណ្ដោះសន្ននៅអធិការដ្ឋាននគរបាលខណ្ឌទួលគោក ដើម្បីសួរនាំនិងកសាងសំណុំរឿង បញ្ជូនខ្លួនទៅតុលាការចាត់ការតាមច្បាប់ ៕

ដោយ៖ ស ដារ៉ា