កម្លាំងក្រុមភេរវកម្ម IS បានផ្សព្វផ្សាយនៅឃ្លីបវីដីអូមួយ អំពាវនាវដល់ពលរដ្ឋដែលគាំទ្រក្រុមមរបស់ខ្លួននៅទូទាំងពិភពលោក បន្តធ្វើដំណើរ តែពេលនេះ មិនមែនទៅកាន់ស៊ីរីឬអីរ៉ាក់នោះឡើយ គឺទៅកាន់ប្រទេសហ្វីលីពីនវិញម្តង។
ឃ្លីបវីដីអូខាងលើគឺជាភស្តុតាងបង្ហាញឲ្យឃើញថាក្រុមភេរវកម្ម IS កំពុងតែបាត់បង់ទីតាំងយុទ្ធសាស្ត្រនៅក្នុងប្រទេសតំបន់មជ្ឈឹមបូព៌ា មានអីរ៉ាក់និងស៊ីរីជាដើម។ក្រុម IS មិនត្រឹមតែ ឲ្យធ្វើសកម្មភាពនៅក្នុងប្រទេសហ្វីលីពីនតែមួយនោះទេ គឺនៅតំបន់អាស៊ានទាំងមូល។
នៅពេលនេះក្រុម IS នៅមជ្ឈឹមបូព៌ាកំពុងតែចុះខ្សោយ ពីមួយថ្ងៃទៅមួយថ្ងៃ ដោយសារតែការវាយប្រហារ ពីសំណាក់ទាហានរដ្ឋាភីបាលស៊ីរី គាំទ្រដោយទាហានអាកាសរុស្ស៊ី។ ដោយបរាជ័យជាបន្តបន្ទាប់ ក្រុម ភេរវកម្មកំពុងស្វែងរកទីតាំងថ្មីសម្រាប់ ដំណើរការ គេចផុតពីអាមេរិកនិងរុស្ស៊ី ក្នុងនោះមានតំបន់អាស៊ាន។
នៅក្នុងប្រទេសហ្វីលីពីន ក្រុមភេរវកម្ម ដូចជា Abu sayyaf បានបង្កើតឡើងជាច្រើនឆ្នាំមកហើយ នៅក្នុងប្រទេសហ្វីលីពីនជិតព្រំដេន ម៉ាឡេស៊ី និងឥណ្ឌូនេស៊ី។ ក្រុមភេរវកម្មងាយស្រួលក្នុងការ ជ្រើសរើសកម្លាំងរបស់ខ្លួន ក៏ដូច ជាការជួញដូរអាវុធឆ្លងព្រំដែន។ នៅពេលនេះដែរ ក្រុមភេរវកម្ម បានធ្វើសកម្មភាពដោយបើកជំហរនៅក្នុងទីក្រុងម៉ារ៉ាវី ដោយបានបង្ហូតទង់IS នៅទីក្រុងនោះផងដែរ។ ប្រធានាធិបតីហ្វីលីពីន លោកឌូទើរទេបានសារភាពថា កម្លាំងទាហាននិង ប៉ូលិសពិបាកក្នុងការគ្រប់គ្រងតាមបណ្តោយព្រំដែន ។
នៅតំបន់ភាគខាងត្បូងហ្វីលីពីន មានជំរុំហ្វឹកហាត់ក្រុមឧទ្ទាម មកពីម៉ាឡេស៊ី ឥណ្ឌូនេស៊ី ថៃ ប្រុយណេ សឹង្ហបុរី បានកើតឡើងជាច្រើនឆ្នាំមកហើយ។ខ្មាន់កាំភ្លើងជាច្រើននៅតំបន់អាស៊ីភាគអាគ្នេយ៍ធ្លាប់បានចូលរួមនៅក្នុងសង្គ្រាម តំបន់មជ្ឈមប៉ូពា ដោយបានឆ្លងកាត់ការហ្វឹកហាត់ ស្ទាត់ជំនាញនៅទីនោះ។
ចំណុចដែលគួរឲ្យចាប់អារម្ភបំផុតនោះគឺ បើទោះបីមានការជួយអន្តរគមន៍ពីអាមេរិក និងអូស្ត្រាលី ក៏ទាហានហ្វីលីពីន មិនអាច រំដោះបានទីក្រុងម៉ារ៉ាវី ពីក្រុងភេរវកម្ម IS ដែលដណ្តើមគ្រប់គ្រងនៅទីនោះ តាំងពីខែឧសភាមកទលពេលនេះ។
ការបម្លាស់ទី របស់ក្រុម IS ទៅកាន់តំបន់ភាគខាងត្បូង ហ្វីលីពីនបានធ្វើឲ្យស្ថានភាពកាន់តែស្មុគ្រស្មាញ។ អ្វីដែលគួរឲ្យបារម្ភជានេះនោះ គឺក្រុមឧទ្ទាមអិស្លាមនៅ មីយ៉ានាម៉ាដែលកំពុងតែធ្វើសង្គ្រាមប្រឆាំងកម្លាំងទាហានរដ្ឋាភិបាល ក៏អាចបង្កើតទីតាំង គ្រប់គ្រងវាយប្រហារ ប្រឆាំងរដ្ឋាភិបាល ។
កន្លងមករដ្ឋាភិបាលហ្វីលីពីនបានប្រកាសថា ប្រទេសរបស់ខ្លួន កំពុងតែត្រូវបាន ក្រុមភេរវកម្ម ឈ្លានពាន។ នៅពេលនេះ៣ភាគ៤នៃទីក្រុង ម៉ារ៉ាវីដែលមានពលរដ្ឋ ប្រមាណ២សែននាក់រស់នៅ ស្ថិតនៅភាគខាងត្បូងកោះមីនដាណាវ ត្រូវបានក្រុមម៉ៅទេនិងគ្រុម អាប៊ូ សាយ៉ាហ្វ គ្រប់គ្រង ។ នៅក្នុងសារផ្ញើរទៅកាន់រដ្ឋសភា លោកឌូទើរទេ បានបញ្ជាក់ថា កម្លាំងក្រុមភេរវកម្ម បានរំដោះអ្នកទោស និង គ្រប់គ្រងទីតាំងជាច្រើនក្នុងនោះមានស្ពាន៣ធំៗ។
កម្លាំងភេវកម្មនៅពេលនេះកំពុងតែ ស្វែងរកនឹងបណ្តេញអ្នកកាន់សាសាន គ្រឹស្ត ចេញពីទីក្រុងម៉ារ៉ាវីផងដែរ ដោយក្រុមនេះស្វែងរកចាប់ខ្លួនអ្នកកាន់សាសនាគ្រឹស្តមកធ្វើជារនាំងការពារ សម្រាប់វាយប្រហារជាមួយកម្លាំងទាហានហ្វីលីពីន។
តាមតួលេខដែលកម្លាំងទាហានហ្វីលីពីនបានផ្តល់មកទល់ពេលនេះមានមនុស្ស ៤២នាក់ស្លាប់ ។
កម្លាំងខ្មាន់កាំភ្លើងម៉ៅទេ គឺជាក្រុមដែលសមត្ថភាព ធ្វើសង្គ្រាមអាចទប់ទល់និងការវាយប្រហាររបស់កម្លាំងទាហានរដ្ឋាភិបាល ។បច្ចុប្បន្នក្រុមអាប៊ូសាយ៉ាហ្វ ដែលមានទំនាក់ទំនងជិតស្និតនិងក្រុម IS ក៏បានចូលរួមជួយដល់ក្រុមម៉ៅទេ ក្នុងការវាយប្រហារទៅលើទាហានរដ្ឋាភិបាលហ្វីលីពីន។ តាមរបាយការណ៍ចារកម្ម ហ្វីលីពីន បានឲ្យដឹងថា មេដឹកនាំក្រុមភេរវកម្មឈ្មោះ Isnilon Hapilon ជាអ្នកប្តេជ្ញាស្មោះត្រង់ជាមួយក្រុម IS ដែលមានរហ័សនាមថា Daesh ត្រូវបានក្រុមភេរវកម្មIS ជឿទុកចិត្ត ឲ្យដឹកនាំ បង្កើតទីតាំងគ្រប់គ្រងនៅហ្វីលីពីន។ កាលពីឆ្នាំ២០០៥ ក្រសួងហិរញ្ញវត្ថុអាមេរិកបានរិបអូសទ្រព្យសម្បត្តិ របស់ Hapilon ដោយសារតែមានសកម្មភាព ពាក់ព័ន្ធនិងក្រុមភេរវកម្ម ក្នុងនោះមានទំនាក់ទំនងជាមួយអូស្មាន ប៊ីនឡាឌិនទៀតផង។
កាលពីថ្ងៃទី២៣ខែឧសភា កម្លាំងទាហានហ្វីលីពីន បានបើកការវាយប្រហារ ទៅលើទីបញ្ជាការរបស់មេដឹកនាំក្រុមភេរវកម្ម Hapilon ប៉ុន្តេ ការវាយប្រហារនោះត្រូវបាន ក្រុមភេរវកម្មវាយមកវិញ ធ្វើឲ្យទាហានរដ្ឋាភិបាលបរាជ័យ។ នៅពេលនេះក្រុម IS បានដាក់ទង់ជាតិនៅគ្រប់ទិសទីក្នុងទីក្រុង ម៉ារ៉ាវី។
កម្លាំងទាហានហ្វីលីពីន បានបើកការវាយប្រហារជាទ្រង់ទ្រាយធំ កាលពីថ្ងៃទី ២៥ខែឧសភា ក្នុងគោលដៅ បណ្តេញក្រុម IS ចេញពីទីក្រុងម៉ារ៉ាវី។ប៉ុន្តែទាហានហ្វីលីពីនរងការវាយបកយ៉ាងខ្លាំង បណ្តាលឲ្យទាហាន៦នាក់ស្លាប់និងរងរបួសជាច្រើន ។ ក្រុម IS បានបណ្តេញទាហានហ្វីលីពីនចេញពីទីក្រុង ខាងលើ។
កាលពីថ្ងៃទី២៦ខែឧសភា ការវាយប្រហារនៅតែបន្តកើតឡើងនៅទីក្រុងម៉ារ៉ាវី ដោយខ្មាន់កាំភ្លើងក្រុម IS វាយប្រហារ បំផ្លាញរថពាសដែករបស់កម្លាំងទាហានហ្វីលីពីន និងដុតបំផ្លាញទីតាំងយោធា នៅជាយក្រុងផងដែរ។
ដើម្បីវាយប្រហារយកឈ្នះក្រុមភេរវកម្ម ហ្វីលីពីនបានបញ្ជូនកម្លាំងទាហាន និងអាវុធទំនើបៗជាច្រើនទៀត ដើម្បីដណ្តើមទីក្រុងខាងលើមកវិញ។
កម្លាំងទាហាន ហ្វីលីពីនកំពុងតែ ស្វែករកចាប់ខ្លួនមេដឹកនាំ អាប៊ូសាយ៉ាហ្វ និង Hapilon ដែលដឹកនាំខ្មាន់កាំភ្លើងជាង ៥០០នាក់គ្រប់គ្រងទីក្រុងនេះ។ ក្រុម IS កំពុងតែដាក់ក្តីសង្ឃឹម ប្រែក្លាយទីក្រុងម៉ារ៉ាវី ទៅជាទីតាំងគ្រប់គ្រងរបស់ក្រុមនេះនៅតំបន់អាស៊ាន។
ក្រុមអ្នកកាន់សាសនាអិស្លាមនិកាយសាន់នី រាប់រយនាក់ ស្ម័គ្រចិត្តចូលរួមជាមួយក្រុម IS នៅម៉ារ៉ាវី ក្នុងនោះមានទាំងអ្នកទោសជាច្រើនត្រូវក្រុមនេះរំដោះចេញពីមន្ទីរឃុំឃាំង កាលពីថ្ងៃទី២៤ខែឧសភាផងដែរ៕
ដោយ៖ មែវ សាធី