ភ្នំពេញ ៖ នៅរសៀលថ្ងៃទី២៤ ខែកញ្ញា ឆ្នាំ២០១៧នេះ លោកព្រឹទ្ធាចារ្យ កោសសល្យវោហា គង់ ណៃ បានយកពានរង្វាន់សិល្ប: វប្បធម៌ ហ្វូគុអូកា ឆ្នាំ២០១៧ ពីប្រទេសជប៉ុន មកដល់កម្ពុជាហើយ ជាមួយនឹងជ័យលាភី ដ៏កម្រមួយនេះ ។ ឱកាស ដ៏រីករាយនេះ កម្ពុជាបានរៀបចំក្បួនដង្ហែស្វាគមន៍ និងអបអរសាទរជូនលោកព្រឹទ្ធាចារ្យ គង់ ណៃ ចាប់តាំងពីព្រលានយន្តហោះអន្តរជាតិភ្នំពេញ រហូតដល់សាលមហោស្រពចតុមុខ។
ពិធីដង្ហែរក្បួន និងអបអរសាទរនាពេលនេះ គឺមានការហែជាក្បួនរថយន្ត និងម៉ូតូ ភ្ជាប់នឹងពាក្យបដាថា «អបអរសាទរនៅ ព្រឹទ្ធាចារ្យ កោសល្យ គង់ ណៃ ទទួលបានពានរង្វាន់សិល្ប: វប្បធម៌ហ្វូគុអូកា ពីប្រទេសជប៉ុន ឆ្នាំ២០១៧» និងបដាដែល មានរូបលោកព្រឹទ្ធាចារ្យ កោសល្យ គង់ ណៃ កាន់ចាប៉ីដង វែងផងដែរ។ ការទទួលបានពានរង្វាន់ របស់លោកព្រឹទ្ធាចារ្យ កោសល្យ គង់ ណៃ បានធ្វើឡើង ក្រោយពេលដែលចាប៊ីដងវែងខ្មែរ ត្រូវបានចុះក្នុងបញ្ជីបេតិកភណ្ឌវប្បធម៌អរូបិ នៃមនុស្សជាតិ។
លោកព្រឹទ្ធាចារ្យកោសល្យ គង់ ណៃ ដែលជាសិល្បករចាប៉ីដងវែងរបស់កម្ពុជា ត្រូវបានគណៈកម្មាធិការពានរង្វាន់ក្រុងហ្វុគុអូកានៃប្រទេសជប៉ុន សម្រេចជ្រើសរើសជាជ័យលាភី នៃពានរង្វាន់សិល្បៈវប្បធម៌ហ្វុគុអូកា ឆ្នាំ២០១៧។
ពានរង្វាន់ ហ្វុគុអូកានេះ បានបង្កើតឡើងតាំងពីឆ្នាំ១៩៩០ ក្នុងគោលបំណងផ្តល់កិត្តិយសដល់បុគ្គល ក្រុម ឬស្ថាប័ននានា ដែលមានស្នាដៃលេចធ្លោ ក្នុងការថែរក្សា និងបង្កើតនូវវប្បធម៌អាស៊ីមួយ ប្រកបដោយ លក្ខណៈពិសេសនិងភាពចម្រុះ សំដៅជំរុញការផ្លាស់ប្តូរវប្បធម៌ទៅវិញទៅមក និងលើកកម្ពស់ការយល់ដឹងអំពីតម្លៃនៃវប្បធម៌អាស៊ី ។
គួរបញ្ជាក់ថា នៅថ្ងៃទី២៩ ខែកញ្ញា ឆ្នាំ២០១៧ នាវេលាម៉ោង ៨និង៣០នាទីព្រឹក សម្តេចនាយករដ្ឋមន្ត្រីហ៊ុនសែន នឹងអញ្ជើញបំពាក់មេដាយជូនព្រឹទ្ឋាចារ្យកោសល្យវោហា គង់ ណៃ នៅទីស្តីការនាយករដ្ឋមន្ត្រី ៕ ដោយ ៖ សុផល
