ភ្នំពេញ៖ នាព្រឹកថ្ងៃទី១៥ ខែតុលា ឆ្នាំ២០១៥ គឺជាថ្ងៃគម្រប់ខួប៣ឆ្នាំគត់ ដែលសម្តេចឪ សម្តេចតា សម្តេចតាទួត ព្រះបិតាឯករាជ្យជាតិខ្មែរ ព្រះបាទសម្តេចព្រះនរោត្តម សីហនុ ព្រះអង្គបានសោយទិវង្គត នៅទីក្រុងប៉េកាំងប្រទេសចិន ។ រាជរដ្ឋាភិបាល ថ្នាក់ដឹកនាំ តាមស្ថាប័នរដ្ឋ និងប្រជារាស្ត្រខ្មែរទូទាំងប្រទេសសែនក្តុកក្តួល និងសោកស្តាយឥតគណនាដែលកម្ពុជាបានបាត់បង់ព្រះមហាវីរក្សត្រដ៏ឆ្នើមបំផុត ។ ទោះបីព្រះអង្គបានសោយទិវង្គត់ទៅហើយក្តី ក៏ប្រជារាស្ត្រទូទាំងប្រទេសនៅចងចាំចំពោះព្រះរាជ្យបូជនីយកិច្ចដ៏ឧដុង្គឧត្តម្ភបំផុតរបស់ព្រះអង្គ ។
នៅឯម៉ាកាវ ប្រទេសចិន សម្តេចតេជោ នាយករដ្ឋមន្ត្រីនៃព្រះរាជាណាចក្រកម្ពុជា ក៏បានសរសេរក្នុងផេករបស់សម្តេចដោយលើកឡើងថា ពេញមួយជីវិតរបស់សម្តេចឪ សម្តេចតា សម្តេចតាទួតនៃយើង គឺព្រះអង្គបានបូជា និងបំពេញនូវកាតព្វកិច្ចជាព្រះប្រមុខរដ្ឋ និងជាព្រះមហាក្សត្រដែលបាននាំមកនូវម្លប់សុខសន្តិភាពដល់ប្រទេសជាតិទាំងមូល ។ ប្រជារាស្ត្រទូទាំងប្រទេសបានចងចាំគ្មានថ្ងៃបំភ្លេចចំពោះស្នាព្រហស្ថព្រះអង្គក្នុងការទាមទារឯករាជ្យពីបារាំងនៅថ្ងៃទី៩ ខែវិច្ឆិកា ឆ្នាំ១៩៥៣ ដែលបានធ្វើឲ្យកម្ពុជាងើបមុខមាត់ រីកចម្រើនជាបន្តបន្ទាប់រហូតមកដល់សព្វថ្ងៃនេះ ។
សម្តេចតេជោ ហ៊ុន សែន បានសម្តែងនូវការគោរពដឹងគុណដ៏ខ្ពង់ខ្ពស់បំផុតថ្វាយចំពោះព្រះបរមរតនកោដ្ឋដែលព្រះអង្គបានលះបង់ និងបូជាចំពោះជាតិ ។ ទន្ទឹមនឹងនេះ សម្តេចតេជោ ក៏បានប្តេជ្ញាបន្តដង្ហែតាមព្រះរាជតម្រិះដ៏ខ្ពង់ខ្ពស់បំផុតរបស់ព្រះអង្គ ដើម្បីផ្តល់សុខសន្តិភាពជូនប្រជារាស្ត្រខ្មែរ និងថែរក្សា ការពារព្រះមហាក្សត្រកម្ពុជា និងសម្តេចម៉ែ សម្តេចយាយ សម្តេចយាយទួត ដើម្បីព្រះអង្គទាំងទ្វេគង់ជាម្លប់ដ៏ត្រជាក់សម្រាប់ប្រទេសជាតិទាំងមូល ។ សម្តេចតេជោបានបន្តថា នៅក្នុងថ្ងៃគម្រប់ខួបទី៣ នៃថ្ងៃដែលព្រះអង្គចូលទិវង្គត សម្តេចសូមក្រាបថ្វាយព្រះពរដល់ព្រះវិញ្ញាណក្ខន្ធព្រះបរមរតនកោដ្ឋ សូមបានយាងទៅសោយសុខនៅឋានសួគ៌ា និងសូមឲ្យកម្ពុជាទទួលបានតែសុខសន្តិភាព វិបុលភាព និងការរីកចម្រើនជានិច្ចនិរន្តរ៍ ។
គួររំលឹកផងដែរថា នាព្រឹកថ្ងៃទី១៥ ខែតុលា ឆ្នាំ២០១៥ មន្ត្រីរាជការតាមស្ថាប័នរដ្ឋ ក៏ដូចជាមន្ត្រីរាជការតាមមន្ទីរជុំវិញរាជធានី ខេត្ត កងកម្លាំងប្រដាប់អាវុធ បានរៀបចំរំលឹកខួបទី៣ នៃថ្ងៃដែលព្រះអង្គចូលទិវង្គតយ៉ាងច្រើនកុះករ និងបង្ហាញការសោកស្តាយយ៉ាងខ្លាំងពីការបាត់បង់ព្រះបិតាឯករាជ្យជាតិ ៕
ដោយ៖ សុខ ខេមរា
